Аргентины Засгийн газрын гишүүн Иван Хэйн Уругвайн нийслэл Монтевидео хотын “Radisson” зочид буудлын өрөөнд нас барсан явдал өнгөрсөн долоо хоногт гарсан билээ. Тэгвэл Уругвайн мэдээллийн хэрэгслүүд цагдаагийн байгууллагын эх сурвалжид үндэслэн өнөөдөр мэдээлэхдээ, сайдыг загас наадуулж байгаад нас барсан гэв.   
   И.Хэйн нь Аргентины Гадаад худалдааны дэд сайд байсан бөгөөд Монтевидеод олон улсын хуралд оролцож байжээ. Түүнийг буудлын өрөөндөө ганцаараа нүцгэн байхыг олсон ба хувцасны шүүгээний дам модноос өмдний тэлээгээр оосорлогдсон түүний бие дээр үрийн шингэн асгарсан байсан гэнэ. Цагдаагийнхан түүнийг энгийн бус хэлбэрээр секс үйлдэхдээ хүчтэй таашаал авахын тулд хэрэглэсэн арга нь уушги болон тархинд очих хүчилтөрөгчийг хязгаарласнаас амиа алдсан гэж дүгнэсэн байна. “Амьсгаагаа зохиомлоор боогдуулахдаа биемахбодын боломжоо зөв тооцоолоогүй, тухайн үед байдлыг хянах бололцоогоо гэнэт алдсан” гэж цагдаагийнхан өгүүлжээ.   
   33 настай И.Хэйн нь Аргентины Засгийн газрын эдийн засгийн бодлогын ганц сийрэг “толгой” байсан гэнэ. Буэнос-Айресийн их сургуулийг гялалзсан амжилттай төгссөн тэрбээр 12 дугаар сарын 10-нд шинэ ерөнхийлөгчийг албан тушаалаа авсан даруйд Эдийн засгийн дэд сайдаар томилогдсон бөгөөд Аргентиний хөнгөн цагааны аварга корпораци “Aluminio Argentino”-гийн захирлуудын зөвлөлд Засгийн газрыг төлөөлдөг байжээ. Ерөнхийлөгч Кристина Киршнэр түүний нас барсаныг сонсуутаа бие нь муудаж эмнэлгийн туслалцаа авсан гэнэ.
   Мэргэжилтнүүдийн тооцолсноор АНУ-д гэхэд гаж буруу бэлгийн ажлаас үүдэлтэй амьсгаа боогдох шалтгаанаар жилдээ 1000 шахам хүн нас бардаг байна. Тухайлбал “Kill Bill” кинонд тоглосон нэртэй жүжигчин Дэвид Кэррэдайн 2009 оны зургадугаар сард Тайландын Бангкок хотын зочид буудалд ингэж нас барсан билээ. Тэрбээр нэг нь хүзүү,  нөгөө нь бэлэг эрхтнээс нь уясан хоёр уяанаас дүүжлэгдсэн байдалтай нас барсан байсан бөгөөд шинжээчид амьсгаагаа боогдуулах замаар бэлгийн таашаал авахыг оролдож байгаад нас барсан гэж үзсэн юм. Асфиксиофил буюу ийм замаар таашаал авах зуршилтай хүмүүс энэ зуршлаа хамгийн ойр дотнын хүмүүсээсээ ч нуудаг учраас үхэлд хүрсэн тохиолдол нь л тэднийг илчилж өгдөг байна. Ийм хүмүүсийн ихэнх нь эрэгтэйчүүд бөгөөд нас барах үеийнх нь дундаж нас 26.5 гэж судлаачид үзжээ. Асфиксиофилуудын 11% нь садмазохист сонирхолтой, 20% нь хоолойгоо боохоос урьдаар таашаалаа илүүтэй болгохын тулд эмэгтэй хүний хувцас өмсдөг гэнэ.