Иргэдийг 350.000, 650.000, 4.000.000 төгрөгийн төлбөртэйгээр орон сууцтай болгоно хэмээн залилж, их хэмжээний хохирол учруулсан төрийн бус байгууллага, ХХК-ийн хэргүүдийг УМБГ-аас харьяаллын дагуу прокурорын газарт шилжүүллээ. Залилангийн хэрэгт давхардсан тоогоор 12650 иргэнд 5.584.000.000 сая төгрөгийн онц их хэмжээний хохирол учраад байгаа аж. Мөн хэрэгт “Байгаль эрдэнэ сан” ТББ, “Айсуу жаргал” ТББ, “Хөгжлийн хөтөч” ТББ, “Говийн хөгжлийн ирээдүй” ТББ, “Барагдашгүй алмаз” ХХК, “Хүсэл мөрөөдлийн хүч” ТББ, “Түшигт хан Цэцээ” ТББ, “Рич максимум” ХХК, “Эрүүл амьдралын төлөө хөгжлийн хөтөч” ТББ зэрэг есөн байгууллагыг шалгасан байна.
Уг хэргүүдийг харьяаллын дагуу, тухайлбал 466 иргэнээс 295.000.000 төгрөг залилсан “Говийн хөгжлийн ирээдүй” ТББ-ын захирал Ч.Мөнхбат нарын зургаан хүнд холбогдох хэргийг, 137 иргэнээс 74.500.000 төгрөг залилсан “Барагдашгүй алмаз” ХХК-ийн захирал Б.Мөнхтуяа нарын найманд хүнд холбогдох хэргийг, 634 иргэнээс 120.000.000 төгрөг залилсан “Хүсэл мөрөөдлийн хүч” ТББ-ын захирал С.Баатар нарын зургаан хүнд холбогдох хэргийг, 143 иргэнээс 85.000.000 төгрөг залилсан “Түшигт хан Цэцээ” ТББ-ын захирал У.Наранбаатар нарын таван хүнд холбогдох, 2100 иргэнээс 996.400.000 төгрөг залилсан “Эрүүл амьдралын төлөө хөгжлийн хөтөч” ТББ-ын захирал З.Энхжаргал нарт холбогдох хэргийг яллах дүгнэлт үйлдүүлэхээр Баянгол дүүргийн прокурорын газарт шилжүүлсэн байна. Мөн 2323 иргэнээс 3.200.000.000 төгрөг залилсан “Байгаль эрдэнэ сан” ТББ-ын захирал Т.Уранчимэг нарын 12 хүнд холбогдох хэргийг яллах дүгнэлт үйлдүүлэхээр Чингэлтэй дүүргийн прокурорын газарт шилжүүлжээ. Түүнчлэн 1540 иргэнээс 539.000.000 төгрөг залилсан “Айсуу жаргал” ТББ-ын захирал Г.Батхүү нарын найман хүнд холбогдох хэргийг, 560 иргэнээс 850.000.000 төгрөг залилсан “Рич максимум” ХХК-ын захирал Н.Сувдаа нарт холбогдох хэргийг Сүхбаатар дүүргийн прокурорын газарт шилжүүлсэн байна.
Мөрдөн байцаалтын явцад иргэдэд учирсан 5.584.000.000 төгрөгийн хохирлоос 2.960.000.000 төгрөгийг хохирогч нарт төлүүлж, 2.229.000.000 төгрөгийг төлүүлэхээр тогтоон, 254.770.000 төгрөгийн бэлэн мөнгө, данс, автомашин, эд зүйдийг битүүмжлэн иргэдийн хохирлыг төлүүлэхээр болсон байна.
Б.Чимэг
