Хэн бэ? гэдгээ мэддэг ард түмэн хаашаа явахаа мэднэ

Д.Бат-Эрдэнэ Таныг одоогийн Батлан хамгаалахын их сургуульд багшилж, ажлын гараагаа эхэлсэн, монгол түүх, монгол цэргийн өв, монгол соёлоо шүтэж, хурдан ажнайгаа сойсон монгол эр хүн гэж боддог. Монгол Ойрадын цэрэг Манжийн илт давуу хүчтэй Тэрэлжийн Зуунмодонд тулалдан, тусгаар тогтнолын талаа амиа өргөсөн түүхийг хүндэтгэн үзнэ гэдэгт итгэн гурван асуулт илгээж байна. 
1. Монгол цэргийн түүх элсэнд дарагдах ёстой юу?

Цонжин Болдогийн цогцолборын наахна орших Тэрэлжийн Зуунмод хэмээх газарт 1696 онд Галдан Бошогт 30 мянган хааны цэрэг Манжийн давуу хүчтэй амь хайргүй тулалдсаныг Та мэдэх үү? Ану хатан, цөст баатар эрс амиа өргөснийг Та түүхээс уншсан болов уу? Харвасан сумных нь зэв одоо ч гарсаар байгаа энэ ариун газрыг төнхөхийн хэрээр түүх булшлагдсаар байна. Францад Ватерлоо, Орост Бородиногийн түүхт тулаан болсон газраа ухаж устгадаг болов уу?

2. Өвөг дээдсийнхээ ясаар байшин барьсаар байх уу?

Та монгол ёс заншил, адууны соёлоо дээдэлдэг хүн. Өнөөгийн бидний тусгаар тогтнолын төлөө цусаа асгаруулсан газар шороондоо шингэсэн өвөг дээдсийнхээ ясыг өндөлзүүлэх нь монгол хүний ёс журам мөн үү? Үеийн үед энэ ариун газар шороог замчин хэмээх сахиул айлууд хамгаалан, өмнөх нийгэмд ч нууцаар харж хандан, жил бүрийн зуны тэргүүн сарын шинийн 15-нд тахиж тайсаар байдгийг Та дуулсан уу? Аялал жуулчлал, амралтын бүс нутаг аж ахуйн зориулалтаар эвдэлсэн газартай хаяа залгах нь хэр зохистой вэ?
 
3. Хатан Туул минь гол мөн үү, биш үү?

Хэрэв мөн бол Тэрэлжийн Зуунмод орчимд Туул голын ай савд элсний хэд хэдэн карьер ажиллан, хөрсийг нь сэндийчэн ухсаар, асар том цүнхээл үүстэл нь  Урт нэртэй хуулийг уланд гишгэсээр байх уу? Улаанбаатарын хот ундны усны хомсдолд орох тухай ярьсаар, Туул голын эрэг ирмэгийг элсэнд дарах ёстой юу?
Жич: Тэрэлжийн Зуунмодыг хамгаалах талаар С.Оюун сайдад мөн асуулт тавьсан бөгөөд тусгай ажлын хэсэг томилсонд гүн талархал илэрхийлье. Төрийн хатан Анугийн залгамж халаа тасраагүй юм байна.