2001 оны есдүгээр сарын 11-ний халдлагын дараагаас эхэлсэн АНУ, Пакистан хоёр улсын нягт хамтын ажиллагаа дуусгавар болов. Энэ талаар “The New York Times” сонин нэрээ хэлэхийг хүсээгүй Америкийн өндөр албан тушаалтны хэлсэнийг эш татан өнөөдрийн дугаартаа мэдээлэв. Уг хүний хэлсэнээр Исламабад Вашингтонтой баримталж буй харилцаагаа бүрэн хэмжээгээр эргэн харна гэдгээ тов тодорхой мэдэгджээ. Хэдийгээр хамтын ажиллагаа зарим хэмжээгээр хадгалагдах ч, Пакистаны шинэ байр суурь хэдэн долоо хоногийн дараа тодорхой болно гэнэ.
    Шинэ харилцааны хүрээнд АНУ Афганистанд буй цэргийнхэндээ хүргэдэг ачааг Пакистанаар дамжуулахдаа тус улсад тодорхой хэмжээний мөнгө төлдөг болж магадгүй байгаа аж. Нөгөө талаас Пакистанд үзүүлдэг тусламжийн хэмжээ нь нэлээд буурах ажээ.
   Өнгөрсөн 11 дүгээр сарын 26-нд Америкийн цэргийнхний дайралтаас болж Афганистаны хил дээр Пакистаны цэргийн 26 албан хаагч амь үрэгдсэнээр хоёр улсын харилцаа мэдэгдэхүйц хурцадсан юм. Болсон явдлын дараа Пакистан Афганистан дахь НАТО-гийн цэргийнхэнд хангамж нийлүүлдэг замыг хааснаас гадна Афганистаны байдлыг зохицуулах бага хурлыг бойкотлож, Пакистаны баруун өмнөд нутагт байдаг цэргийн баазаасаа америкчуудыг явахаас аргагүйд хүргэсэн юм. ТТГ чухам уг баазаас нисгэгчгүй тагнуулын онгоцоо хөөргөдөг байсан билээ. Үүнээс өмнө Лахор хот дахь Америкийн консулын газрын ажилтан хоёр хүний аминд хүрсэн, Осама бин Ладеныг устгах ажиллагааг явуулахдаа америкчууд Пакистаны эрх баригчдад мэдэгдээгүй зэрэг нь ч харьцаа муудах шалтгаан болсон юм.