МУИС-ийн оюутнууд тэнхимээрээ шинэ жил “хийхээр” Баянбүрд рүү өгсөх замын баруун талын “Маргад Центр” хэмээх солонгос эзэнтэй газрыг сонгожээ. 150 орчим хүний баяр үдшийн 22 цаг хүртэл үргэлжилсэн байна. Нүүрээ будаж, хувцсаа солих өрөө нь нийтийн танхимаасаа тусдаа. Халууцсан нэг бүсгүй хажуу өрөөнд орж, цүнхээ үзтэл гар утас, түрийвч нь байхгүй болсон байжээ. Бүх хэрэг эндээс мандсан гэнэ. Алдсан бүсгүй шууд л утасджээ. Хэд хэд залгасны эцэст нэг эмэгтэй “Байна уу” гэчихээд салгачихжээ. Хулгайч эмэгтэй гэдэг нь тодорхой болов. Гэтэл “Маргад”-ын зургаан үйлчлэгчийн нэг "Манайд өнөөдөр ажилд орсон эмэгтэйн цүнхэнд зөндөө утас дуугараад байна” гэжээ. Тэр л үгийг чиглэл болгон шалгатал хулгайлагдсан утас эзнийхээ гарт ирсэн гэнэ. Энэ мэтээр үдэшлэг өндөрлөж, бүгдээрээ хувцсаа солихоор орж байхад “Юмаа алдчихлаа!” гэсээр олон хүн гарчээ. Ингээд эд зүйлээ алдсан хүний тоо 20 хүрч. Утас, түрийвч, түрийвчин дэх мөнгө, бичиг баримт, гадуур хувцас гээд олон юм үгүй боллоо.

     Хохирогчид байгууллагын эздээс хариуцлага нэхэв. Гэтэл өөдөөс нь тэгэхгүй шүү, өөрсдийнхөө юмыг харгалзах нь яагаав гэлээ. Ашиггүй хэрүүл хагас цаг үргэлжилж, хулгайч үйлчлэгч баригдсан, батлагдсан гэдгээр дөрөөлөн, оюутны дуу өндөрсөж, байгууллагынхан дуугүй болж байлаа. Ингээд хулгайч-үйлчлэгчтэй уулзахаар өрөөнд нь давшин орж, олуулаа шалгааж, зүхэв. “Би аваагүй, тэнгэрт хальсан ээжийнхээ нэрээр андгайлъя” гээд нэг эмэгтэй уйллаа. Тэгэхэд алга болсон гадуур хувцас өрөөнөөс нь олдсон тул оюутнууд улам ч бухимдав. Улмаар хулгайч хүмүүстэй нэг нэгээр нь биечлэн уулзаж эд зүйлийг нь өгөхөөр шийджээ. Намхавтар нуруутай, цайлган царайтай, 20 гаруй насны туранхай эмэгтэй өрөөнөөс гарав. Бие засах газраас түрийвч, гал тогооны хогийн савнаас хоёр ч түрийвч гаргаж өглөө. Дотуур хувцаснаасаа утасны баттерей, өөр зүйл ч гаргаж өгсөн байна. Цүнхнээсээ, өрөөнийхөө энд тэндээс бас бус юм гаргаж өгөөд, цөөнгүй оюутныг хохиролгүй болгожээ.

     Маргалдаж асан “Маргад”-ынхан ч өөрсдөө гайхаж хоцорлоо. Манайх хэзээ ч тэгэхгүй, бид биш, гүтгээд байна, өөрөө харахаа яасан юм гэж байсан ч бууж өгч. Өнөөдөр шинээр ажилд орсон охин, нүдний булай юм аа гэхчилэн харуусал, хараалын үгс холин бувтнана. Тогооч, ажилчид нь бүгд гарч ирээд хөмсөг зангидан эгнэн зогсчээ. Удсан ч үгүй хоёр цагдаа ирж хулгайлсан бүхнийг гаргаж өгтөл хүлээнэ гэв. Гэвч түрийвчээ авч чадаагүй хоёр оюутан үлджээ. Хулгайч бүсгүй ашиггүй ажиллаж, “хохирохгүй” гэж шийдсэн бололтой.

     Мэргэжлийн хулгайч, шинэ жилийн үеэр үйлчлэгч болж, “ажлаа хийж” яваа гэх оюутан цөөнгүй байлаа. Хулгайчийг мэдээгүй бол оюутан, ресторан хоёр маргалдаад өнгөрөх байв. Оюутнууд солонгосчуудыг буруушааж, тэдний үйлчлэгч оюутныг хохь чинь гэж хэлсэн юм. Танд ийм зүйл учирвал хохироод үлдэх байв уу, ресторан хариуцах ёстой юу?