Телевизийнхэн бид 1, 5, 8, 9, 25 гэж тооны нэрээр юм уу, эсвэл UBS, NTV, Eagle, SBN, BTV, TM, Боловсрол, Монгол, Шинэ дэлхий, Эх орон гэхчилэн монгол, англи үсгийн товчлолоор өөрсдөдөө нэр өгч, энэ телевизийн тийм нэвтрүүлгийн тэр явж байна гэж ярьдаг. Бид ялгарахыг хүсдэг. Энэ ялгарлаараа өрсөлддөг. Эрүүлээр өрсөлдөж, эвээр өөдлөхөд томоохон түлхэц өгдөг наадам бол  “Алтан шонхор” юм. “Алтан шонхор” наадамдаа бүтээлээ идэвхтэй ирүүлсэн бүх телевизийнхэнд баярлалаа.

   Мэдээж энэ бол мэргэжлийн ур чадварыг үнэлсэн нэр хүндтэй шагнал. Аль телевизийн хэн шилдгээр шалгарсныг арванхоёрдугаар сарын 30-нд цэнхэр дэлгэцээр үзэгч та хүлээн авч үзээрэй.

  Телевизэд бид шагналын төлөө орж ирсэн хүмүүс биш. Алдаа амжилт нь бүгдийн өмнө ил байдаг телевизийнхэн бид өөрсдөдөө бус үзэгчдэд зориулж ажилладаг мэргэжилтэй хүмүүс.

   Үзэгчид биднийг тэр энэ гэлгүй нийтэд нь телевизийнхэн л гэдэг. Сониныхон, уул уурхайнхан гэдэг шиг тийм нийтлэг нэр л дээ. Биднийг ялгаруулдаг бус ижилсүүлдэг зүйлсийнхээ төлөө, өөрснийхөө амбицаас илүүтэй үзэгчдийнхээ хүслийг удирдлага болгохын төлөө ажиллах жил 2012 он байх болтугай гэж хүсэн ерөөж байна. 2012 он бидэнд шонхор шувууны салхин хурд, хурц хараа хоёрыг илүү хайрлаасай гэж хүсэж байна.”Тулалдаанд зөвхөн шонхрууд нисдэг” гэдэг кино шиг л бид дараагийн тулалдаандаа хамтдаа нисэн мордож байна.

  Арабын шейхийн алтан торонд байдаг шиг биш, Азийн цээжинд салхи сөрөн эрх дураар дүүлсэн алтан шонхрууд - Монголын телевизүүд мандтугай!


МОНГОЛЫН ТЕЛЕВИЗҮҮДИЙН ХОЛБООНЫ ГҮЙЦЭТГЭХ ЗАХИРАЛ М.УЛАМБАДРАХ


“Монголын телевизүүдийн холбоо”–ноос жил бүр зохион байгуулдаг “Алтан шонхор” наадмын номинациуд: