Сүүлийн хэдэн долоо хоног толгой дээрээ хүйтэн ус асгаж буй олны танил хүмүүсийн сонирхолтой бичлэг фэйсбүүк, инстаграммаар дүүрэн байгааг та анзаарсан биз ээ. Энэ бол дэлхий даяар хүчээ авч буй "Ice Bucket Challenge" аян юм.

"Ice Bucket Challenge" буюу “Мөстэй усны сорилт /дуэль/”-ыг АНУ-ын "ALS Association" сангаас хандив цуглуулах зорилгоор эхлүүлжээ. ALS гэдэг нь хүний булчингийн үйл ажиллагааг саармагжуулж улмаар үхэлд хүргэдэг эдгэрэшгүй хүнд өвчин юм. Мөстэй цэл хүйтэн ус дээрээсээ асгаснаар хүний бие тэрхэн хугацаанд мэдээгүй болж, сааталд ордог бөгөөд тэрхүү өвчинг мэдрүүлэх зорилготойгоор энэхүү аянг эхлүүлсэн байна.

"Ice Bucket Challenge"-ийн дүрэм маш энгийн. Оролцогч дээрээсээ мөс шиг хүйтэн ус асгах ба ингэхдээ бичлэг хийж интернэтэд байрлуулна. Дараа нь яг адил үйлдлэл хийхийг найз нөхөд, танилууд, хамт ажилладаг хүмүүстээ санал болгоно. Үүний дараа саналыг авсан хүмүүс 24 цагийн дотор өөр дээрээ хүйтэн ус асгах ёстой. Эс тэгвэл хожигдсонд тооцогдож "ALS Association" сангийн дансанд 100 ам.доллар хандивлах юм.

Өнөөдөр дэлхийн олон алдартнууд энэхүү аянд нэгдэж бие биенийгээ уриалан дуудсаар байна. Тухайлбал АНУ-ын экс ерөнхийлөгч Жорж Буш, "Майкрософт"-ыг үүсгэн байгуулагч Билл Гейтс, "Фэйсбүүк"-ийг үндэслэгч Марк Зукарберг, дуучин Гвин Стефани, жүжигчин Роберт Даавни, дуучин Жастин Тимберлэйк, Жастин Бейбэр, алдарт хөлбөмбөгч Кристиан Роналду, Лейди Гага, жүжигчин Ван Дизель, Селена Гомез зэрэг олон алдартнууд өөр дээрээ ус цацаж буй бичлэгээ интернетээр түгээжээ.  Энэ арга хэмжээнд одууд оролцсоны дараа энгийн хүмүүс ч бас оролцож эхэлсэн бөгөөд "Ice Bucket Challenge" хоёрхон долоо хоногийн дотор дөрвөн сая ам.долларын хандив цуглуулж чадсан юм.

"Ice Bucket Challenge" аян Монголд ч бас өрнөж байна. Ингэхдээ ЭХЭМҮТ-д эмчлүүлж буй цусны хорт хавдартай хүүхдүүдэд 50-100 мянган төгрөг хандивлах болзолтой аж. Монгол дахь "Ice bucket challenge"-ийг “Мөрөөдлийн театр”-ын жүжигчин Батушка эхлүүлсэн бөгөөд тэрээр "Эмоци" продакшны жүжигчин Төтөг дуэльд дуудсан юм.

Өнөөдрийн байдлаар "Ice bucket challenge" аянд "Мөрөөдлийн театр"-ийн жүжигчин Батушка, "Эмоци" продакшны жүжигчин Төтө, "Гурван охин" хамтлагийн дуучин Анхмаа, жүжигчин Б.Тамир, "Маск" продакшны жүжигчин Алдар, реппер Жий, гавьяат тамирчин Ц.Шаравжамц, "Шинэ үе" продакшны жүжигчин Билгүүн, "Мөрөөдлийн театр"-ын жүжигчин Алтаншагай нар нэгдэж, өөрсдийнхөө дээрээс ус асгаад байна.

Тэд МУ-ын Ерөнхийлөгч Ц.Элбэгдорж, УИХ-дахь МАН-ын бүлгийн дарга С.Бямбацогт, УИХ-ын гишүүн Х.Баттулга, их аварга Д.Дагвадорж, олимпын аварга Н.Түвшинбаяр, Төрийн соёрхолт найруулагч Н.Наранбаатар, хөдөлмөрийн баатар Сэрдамба, дуучин Д.Болд, "Маск" продакшны жүжигчин М.Баярмагнай, "Мөрөөдлийн театр"-ын жүжигчин Батаа, реппер Цэцэ, Дандий, Quiza, "Эмоци" продакшны жүжигчин Тэмка, "Х түц" хамтлагийн жүжигчин Бархүү нарыг дуэльд дууджээ. Тун удахгүй тэдний сонирхолтой бичлэг интернэтэд байрших биз ээ.

Хүсвэл та ч энэхүү сорилтод оролцож болох бөгөөд өөр дээрээ мөстэй хүйтэн ус цацаж буй бичлэгээ фейсбүүк, твиттер дээрээ тавин танил найз нөхдийгөө уриалан дуудаарай.