Ийм дүгнэлтийг Монгол Улсын Ерөнхий сайд асан М.Энхсайхан хийсэн юм. Ерөнхий сайдын ажил гэдэг амаргүй, үүрэг хариуцлагаас гадна улс төрийн өндөр мэдрэмж шаарддаг гэдгийг үе үеийн ерөнхий сайд нар нэгэн дуугаар хэлдэг.  Н.Алтанхуягаас өмнө Ардчилсан хүчнээс М.Энхсайхан, Ц.Элбэгдорж, Ж.Наранцацралт, Р.Амаржаргал гэсэн дөрвөн Ерөнхий сайд гүйцэтгэх засагллыг тэргүүлж байсан. Харин хамгийн сүүлчийн Ерөнхий сайд Ц.Элбэгдоржоос хойш зургаан жилийн дараа Н.Алтанхуяг Монгол Улсын Ерөнхий сайдаар тохоон томилогдож байв. Өмнөх дөрвөн Ерөнхий сайдын танхимаас ал нь ч хоёр жилийн ойтойгоо золгож чадаагүй юм. Харин Н.Алтанхуягийн Засгийн газар анх удаа хоёр жилийн ойтойгоо золгож цаашид ч оршин тогтнох улс төрийн уур амьсгалаа бүрдүүлж авлаа. Энэ нь Н.Алтанхуягийг жирийн нэгэн зөөлөн чихэр биш улстөрчийнхөө хувьд өндөр мэдрэмжтэй нэгэн гэдгийг нотолсон үйл явдал болов. Харин цаашид улстөрчийнхөө уран арга ухаанаар тогтож чадсан танхимаа хэрхэн үр ашигтай ажиллуулж чадахаас их зүйл шалтгаална.

Сөрөг хүчний зүгээс "хариуцлаггүй ажилласан эдийн засгийн хөгжлийн сайдад хариуцлага тооц, үгүй бол Засгийг газрыг өөрийг нь огцруулна" гэсээр улстөрд хавар, зун, намрыг дамнасан элдэв яриа хүлээлт үүсээд байсан билээ. АН-ынхан Н.Батбаярыг өмгөөлөх тусам улам хүнд байдалд орж олон нийт ч илт дургүйцэх болсон. Н.Алтанхуягийн Засгийн газрыг огцруулж буцаад МАНАН байгуулах гэнэ гэсэн яриа амнаас ам дамжин тарж дараагийн Ерөнхий сайд, танхимын гишүүдийнх нь нэр хүртэл тодроод эхэлсэн. Улстөрд битүү үүл хурж, Засгаа төхөөрдөг Монголчуудын ээлжит араншин эвцэлээ олохоос урьтаж Н.Алтанхуяг санаачлагыг гартаа авлаа. Ийм маягаараа цаашаа явахгүй гэдгийг тэр маш сайн мэдэрчээ.

Засгийн газрынхаа танхимд бүтцийн өөрчлөлт хийнэ гэж мэдэгдснээс хойш  түүнтэй холбоотой янз бүрийн яриа тарж байв. Буцаад МАНАН байгуулахаар бодож төлөвлөж явсан хүмүүсийн хүсэл талаар болж Н.Алтанхуяг сөрөг хүчин, олон нийтийн зүгээс ирж байгаа шүүмжлэлийг өөр дээрээ тусган бүтцийн өөрчлөлт хийж 16 яамаа 13 болгон цөөлөхөөр болов. Нэгэнт шүүмжлэлийг нь ажил хэрэгтээ тусгаад эрсдэлтэй том алхам хийж байгаа тул түүнийг огцруулна, өөрчилнө гэдэг яриа утгагүй зүйл болж хувирсан. Ийм хэмжээний бүтцийн өөрчлөлт хийж байсан Ерөнхий сайд өмнө нь байгаагүй тул багадаа нэг жил түүнийг огцруулах өөрчлөх тухай ярихгүй л болов уу.

Хамгийн сонирхолтой нь Н.Алтанхуяг бүтцийн өөрчлөлтөөрөө Засгийн газрын танхимын нэгдмэл бодлогод хамгийн их хөндөлсөж ирсэн, олон нийтийн дунд нэр хүндээ алдсан гурван сайдыг хамруулж байгаа нь анхаарал татаж байгаа юм. Н.Батбаяр сайд хэдэн тэрбумын бондын хөрөнгийг гарын салаагаар урсгаж, улсынхаа эдийн засаг, мөнгөний бодлогын нэгдмэл байдлыг алдагдуулж жинхэнэ холион бантанг нь хутгасан. Д.Ганхуяг гадаадын хөрөнгө оруулагчдыг үргээх, хөөж туух ажлыг оройлон манлайлсан. А.Гансүх  сарруу хүрэх төмөр замын аугаа балайрал ярьж, экспортын төмөр замын төслийг өдий удтал гацаасан. Ерөнхий сайдынхаа төмөр замын талаар баримталж байгаа бодлоготой зөрчилдөж ирсэн. Товчхондоо энэ гурван сайд л Н.Алтанхуягийн танхимын нэгдмэл бодлогыг алдагдуулж дур зоргоороо авирлаж ирсэн билээ. Харин одоо Н.Алтанхуяг нэг талдаа олон нийтийн шүүмжлэл, сөрөг хүчний шахалтыг биелүүлж нөгөө талдаа бодлого таардаггүй дур зоргоороо нөхдийг замаасаа холдуулж жинхэнэ эрх мэдлийг гартаа авч нэг сумаар хоёр туулай буудлаа.  Засаглах нь битгий хэл тогтож чаддаггүй АН-ын Ерөнхий сайдуудын жишгийг эвдсэн түүнийг улстөрчийнх нь хувьд хэн ч басамжлаж аргагүй боллоо. Үлдэж буй хоёр жилд удирдагчийнхаа хувиар намтараа бичих бүх эрх мэдэл түүний гарт орлоо. 

                                                                                                                                                                                                            Т.Цагариг