Статискчдийн үзэж буйгаар 3 сая дахь иргэн 2014 онд багтаж мэндэлнэ хэмээн тооцжээ. Тэгвэл 3 сая дахь иргэнийг хэрхэн хүлээн авах талаар Засгийн газрын шийдвэр гарсан бөгөөд Нийслэлийн 9 дүүрэг, 21 аймгаас тус бүр нэг хүүхдийг сонгож нийтдээ 30 хүүхдийг “З сая дахь иргэн”-ээр бүртгэхээр болов.
Мөн хүүхэд тус бүрт орон сууц буюу түүнтэй тэнцэх мөнгөн урамшуулал, тус бүр 3 сая төгрөг дагалдуулан олгох шийдвэрийг Засгийн газраас гаргаад байна. Статистикийнхан жилд төрж буй болон өдөрт төрж байгаа хүүхдийн судалгааг авч, дэлхийн хүн амаа жишиглэн тооцдог аргаар энэ ондоо багтаж 3 сая дахь иргэн төрөх магадлалыг дэвшүүлжээ. Тухайлбал, манай улсад 10 минут 30 секунд тутамд нэг хүүхэд шинээр мэндэлж байна. 2013 онд 79780 хүүхэд мэндэлсэн шиг 2014 онд хүн амын цэвэр өсөлт 71000-д хүрвэл шинэ оны өмнөхөн 3 сая дахь иргэнээ өлгийдөн авах боломжтой юм байна. Өнгөрсөн онд анх удаа 4 ихэр хүүхэд мэндэлсэн нь ч бэлгэдэлтэй гэж эх баригч эмч нар ярив.
Монгол Улсын хүн ам сая саяар өссөн сонирхолтой тоог бас дуулгая. Манай улсын нэг сая дахь иргэн 1962 оны 2 дугаар сард төрсөн бол, 2 сая дахь иргэн 1988 оны 9 дүгээр сард мэндэлжээ. Тэр үед 2 сая дахь иргэнээр хот, хөдөөд зэрэг төрсөн 25 хүүхдийг тодруулан өргөмжлөл олгож байв.
Сэтгэгдэл (6)