Их хэмжээний чулуу ачиж хууль бусаар нэвтрүүлэхийг завдсан хүмүүсийг Гаалийн ерөнхий газрын харьяа Шивээхүрэн дэх Гаалийн газрын ажилтнууд илрүүлжээ. Гаалийн ажилтнууд уржигдар 5 машинд үзлэг хийхэд жолооч нар үнэт чулуу нууцаар ачихын тулд машинаа нэмж тоноглосон байжээ. Улмаар 20-20 ӨМА дугаартай тээврийн хэрэгслийн жолооч Т нь 40 кг байгалийн үнэт улаан чулууг түлхүүр багажны савны дотор нуусан, 24-82 ӨМА улсын дугаартай авто машины жолооч Г нь байгалийн үнэт 10 кг улаан хас чулууг тос маслын сав, оймс зэрэгт савлаж нуусан байжээ. Түүнчлэн, 18-92 ӨМӨ улсын дугаартай машины жолооч Д нь 10 кг байгалийн үнэт улаан чулууг тос маслын саванд, 72-73 ӨМӨ дугаартай тээврийн хэрэгслийн жолооч Н 50 кг улаан чулууг суудлын доогуур нууж хил нэвтрүүлэхийг завджээ. Тэдгээр иргэдээс нийт 110 кг улаан чулууг хураан улсын орлого болгосон байна. Үүнээс гадна М нь өөрийн эзэмшлийн 63-63 УБЗ улсын дугаартай УАЗ-Фургон автомашиндаа давхар шаллан нуувч хийж тэндээ 420 кг улаан хас чулууг хууль бусаар гаргахыг завджээ.