"Эмч, эмнэлгийн ажилтан өвчтөнд эмнэлгийн тусламж үзүүлэх үүргээ хариуцлагагүй биелүүлснээс өвчтөн нас барсан” гэх үндэслэлээр Хүний гавьяат эмч Б.Бүлтэн нарын таван эмчид эрүүгийн хэрэг үүсгэсэн бөгөөд өчигдөр шүүх хуралдаан нь боллоо. Тэдэнд холбогдох хэргийг анхан шатны шүүх хурал энэ сарын 1-ний өдөр товлогдсон ч хохирогч, шүүгдэгчийн өмгөөлөгч тодорхой шалтгааны улмаас хүрэлцэн ирээгүй учир хойшилсон ч өчигдөр шүүх хурал болсон юм. Улмаар шинжээчийн дүгнэлтийг хэрэгт холбогдсон эмч тус бүр дээр дахин гаргах шаардлагатай гэж үзэн хэргийг нэмэлт мөрдөн байцаалтад буцаалаа.

Дээрх хэрэгт Гавьяат эмч Б.Бүлтэнгээс гадна Улсын клиникийн III амаржих газрын эмч н.Цовоо, н.Энхзаяа нарын дөрвөн хүн холбогдсон юм.

Хэргийг сөхвөл, өнгөрөгч 2013 онд III амаржих газарт Баянзүрх дүүргийн иргэн Ц-г том хүүхэд тээж байгаа гэсэн заалтаар кесарево хагалгаа хийсэн байдаг. Харамсалтай нь эмч нар хариуцлага алдаж, эхэсийг нь саванд дутуу үлдээснээс таван удаа хагалгаанд орж, улмаар хагалгаагаа дийлэлгүй амиа алдсан юм. Эл харамсалтай хэрэг гараад жил гаруйн хугацаа өнгөрч байна. Талийгаачийн хувьд  анхны  үрээ тэврэх  гэж харьяа дүүргийн гуравдугаар амаржих газарт очсон 22 настай  эмэгтэй Ц гэгч байсан юм.

Шүүхийн шинжилгээний үндэсний төвөөс хийсэн задлан шинжилгээний дүгнэлтээр эмч нар ажил үүрэгтээ хайнга хандаж, хохирогчийн эхэсийг дутуу үлдээснээс үүдэн амь насаа алдсан гэж дүгнэгдсэн.  Тэднийг Эрүүгийн хуулийн 106.2-т заасан үндэслэлээр яллах дүгнэлт үйлдсэн нь энэ юм.

Гавьяат эмч Б.Бүлтэнгийн хувьд  “Таны төлөө бид” хувийн эмнэлгийн захирлаар ажиллахаас гадна I, III амаржих газарт зөвлөх эмчээр ажилладаг. Тэрбээр  хэргийн талаар “Миний хийсэн хэрэг биш. Гэтэл хэвлэл мэдээллээр Бүлтэнгийн хэрэг гэж ярьж, бичиж байгаад харамсч байна. Надад үнэхээр хүнд байна”  гэсэн юм.

Харин талийгаач охины аав “Ер нь III амаржих  газар мал нядалгааны газар   шиг л хүмүүсийг олноор хагалгаанд оруулж байдаг.  Одоогийн байдлаар ийм хариуцлагагүй байдлаас хохирсон, ойр дотны хүнээ алдсан 12 хүн надтай байнга холбоотой байгаа. Манай охиныг нас барсны маргааш  нь хүртэл 22 настай охин амиа алдлаа гээд шүүх эмнэлэгт ирж байх жишээтэй. Цэвэр эмч нарын алдаа. Мэс заслын бохирдол, эхэсийг хоцроосноос цусанд бохир орсноос миний охин амь насаа алдсан. Б.Бүлтэн эмч “Төгс сайн хагалгаа боллоо. Охины чинь амь нас аврагдлаа” гэж хүртэл хэлж байсан. Б.Бүлтэн эмчийг III амаржих газрынхан өөрсдөө дуудсан байсан. Хоёр дахь хагалгаанаас эхлээд орсон” гэв.

Юутай ч Гавьяат эмч Б.Бүлтэнг үнэлж, хайрлаж, хүндэлж явдаг маш олон хүн бий. Түүний ачаар эдгэрч, тэнхэрч, хайртай хүнээ аварч байсан хүмүүс ч олон. Гэвч энэ хэрэг гарсаны дараа Б.Бүлтэн эмч төдийгүй эмч нарын хайхрамжгүй, хариуцлагагүй байдлыг тоочих иргэд ч олширч байна.

Сайн эмч нар Монголд их байгаа. Гэвч манай нийгэмд эмнэлгийн ажилтнууд, эмч удирдлагуудад мөнгийг нь төлж гарыг нь хүндрүүлэх ёстой гэсэн бичигдээгүй хууль үйлчилдэг болсон. Харин мөнгийг нь төлж гарыг нь хүндрүүлвэл хатан шиг л халамжилдаг. Харин яг энэ уулзвар дээр Монголын бүх эхчүүд ирж байна. Тиймээс энэ нь зөвхөн Б.Бүлтэн нарын эмч нарын асуудлаар дуусчих биш. Цаашид эмнэлгийн байгууллага хийгээд эмч нарын үйлдэлд анхаарах зайлшгүй  хэрэгтэй байгааг харуулж байна. Төрөхийн стандарт гаргаж ирж,  Эрүүл мэндийн яамнаас эмнэлгээ үр ашгийн тогтолцоонд гаргах зүй ёсны шаардлагатай байна.