Засгийн газрын бүтцийн өөрчлөлтийн асуудлаар МАН-ын бүлэг таван өдрийн завсарлага авлаа. Тэд бүх сайд нарын нэрсийг нэгэн зэрэг өргөн мэдүүлж шийдвэрлүүлэх шаардлагатай гэж үзэж байгаагаа илэрхийлсэн. Мөн ҮХХАЯ-ны сайд Л.Түвдэндорж, ЭМЯ-ны Н.Удвал, ССАЖЯ-ны сайд Ц.Оюунгэрэл нарт хариуцлага тооцож огцруулах асуудлыг дэвшүүлээд байгаа. Ингэснээр шинээр сайд нарыг томилох асуудал бүтэн долоо хоногоор хойшлох болов. Харин энэ хооронд АН-ын бүлэг фракцуудын дунд шинээр томилогдох сайд нарын тохироо дахин задарч тэмцэл өрнөх болсон нь эрх баригчдад багагүй бэрхшээлийг авчраад байна. Тэд уг нь санал нэгдэж гишүүдээ барьсан дээрээ асуудлаа түргэхэн шиг түрээд явах нь хэрэгтэй байсан. Гэвч асуудал сунжрах тусам шийдэл нь улам ярвигтай болж, дотроо хагаралдах болсон гэдгийг эх сурвалж мэдээллэж байгаа юм.

Албан тушаалд очих гэж яваа хэсэг нь хоорондоо учраа олохгүй байгаа бол ажлаасаа хусуулсан гомдогчид “намайг ингээд гудамжинд гаргачихгүй юм байгаа биз дээ” гэж өр нэхэн Ерөнхий сайдыг зовоож байна. УИХ-ын гишүүн О.Баасанхүү “А.Гансүх сайдыг яах гэж байна? сайн ажилласан хүнээ гудамжинд гаргачихгүй юм байгаа биз дээ?” гэж асуусан нь хэний дохио зангаагаар донгодож байгааг тод харуулсан явдал болсон гэж дүгнэх хүн цөөнгүй байна. 

Ерөнхий сайдын бүтцээ цомхон болгох санаачлага олны дэмжлэгийг аваад байгаа. Урьд өмнө зургаан яамыг нэгтгэж байсан томоохон бүтцийн шинэтгэл хийгдэж байсан түүхгүй. Харин Ерөнхий сайдын энэхүү санаачлагын үр дүнд цөөнгүй улстөрчид эрх мэдэл албан тушаалаас салах дээрээ тулаад байгаа. Тэдний ихэнхи нь албан тушаалаа өгөх дургүй байгаа. Мөн “манай хүнийг чөлөөлбөл бид хариуд нь зүгээр суухгүй” гэсэн ил шантааж ч газар авах боллоо. Эх сурвалжуудын мэдээллэж байгаагаар гомдогсодыг багтаах сав болгож нийлсэн яамдыг хоёр дэд сайдтай байлгах тухай яригдаж эхэлжээ. Өмнө нь С.Баярын хамтарсан Засгийн газрын үед хоёр салбарыг нэгтгэсэн яамд хоёр дэд сайдтай байсан жишиг бий. Энэ жишгийг хэрэгжүүлж хэдэн хүний аазгайг дарахгүй бол албан тушаалын төлөөх цусгүй тулаан намжих шинжгүй болоод байгаа гэнэ. Эх сурвалжуудын мэдээллэж байгаагаар Зам тээврийн сайд асан А.Гансүх шинээр нийлсэн яамныхаа нэг дэд сайдаар үлдчих санаатай нэлээд идэвхтэй гүйж байгаа сураг байна. Түүний шүглийг О.Баасанхүү чуулган дээр үлээж үзүүлсэн гэж зарим хүмүүс тайлбарлаж байгаа юм.


Засгийн газрын бүтцийн өөрчлөлтөнд орж ажлаа өгсөн сайд нар бүгд ууртай байгаа гэнэ. Тэдний дунд ажлаа өгөх хүсэлтэй хүн бараг байсангүй. Гагцхүү Барилга хот байгуулалтын сайд Ц.Баярсайхан л аль эрт ажлаа өгөхөөр шийдээд байсан гэдгийг эх сурвалжууд мэдээллэж байна. Давхар дээлийг тайлах санал хураалтанд оролцохгүй гэсэн бичгийг УИХ-ын даргад илгээж үүнийхээ төлөө намын нөхдөөсөө багагүй зэмлэл сонссон тэрээр багтаа итгэл алдраад удаж байгаа гэнэ. Тэр ч бүү хэл “Энд байх сонирхол үнэхээр алга, гишүүнийхээ ч ажлыг өгмөөр байна” гэж ярьж яваа гэнэ. Албан тушаалаа өгөхийн хүслэн болж яваа нэгэн байхад албан тушаалгүй хоцорсондоо дэлбэртлээ уурлаж байгаа нэгэн ч байна. Тухайлбал УИХ-ын гишүүн Ж.Батзанданг хүн амын хөгжил нийгмийн хамгааллын сайдаар томилно гэсэн аман тохироог намынх нь удирдлагууд хийжээ. Үүнийг сонссон Ж.Батзандан “Засгийн газрын бүтцийн өөрчлөлтийг дэмжиж байна. Н.Алтанхуяг Ерөнхий сайд цаг үеэ олсон зөв шийдвэр гаргалаа. Баяр хүргэе” гэж ирээд л учиргүй намынхаа удирдлагуудыг долоогоод эхэлсэн. Гэтэл түүнд “молиг үмхүүлчихжээ” үүнд тэрээр дэлбэртлээ уурлаж “Н.Алтанхуяг, Ч.Сайханбилэг нар 1000 дахин огцор!” хэмээн хамаг уураа гаргаж явна.


Эдийн засгийн хөгжлийн сайд асан Н.Батбаяр бол энэ Засгийн газартаа хамгийн нөлөөтэй байсан нэгэн. Түүний огцруулах асуудлыг МАН-ынхан өргөн барихад АН-ынхан яаж хамгаалж байсан нь үүнийг тодхон илтгэнэ. Мөн хэд хэдэн танхимд сайдаар суусан мэдлэг боловсролын хувьд арай дөмгөр гэгддэг Л.Болдыг сайдаас огцруулсан нь анхаарал татаж байгаа. Тэгвэл тэд дараагийн сонгуульд АН-ын жагсаалтын дээгүүрт эрэмбэлэгдэх тохироог намынхаа удирдлагуудтай хийж чадсан гэнэ. Л.Болд Хан-Уул дүүргээс дахин сонгогдохоосоо нэгэнт өнгөрсөн. Тиймээс дараагийн сонгуульд жагсаалтаар л орохгүй бол гарч ирэх газаргүй болсон гэдгийг намынх нь нөхөд онцолж байгаа юм.


Н.Энхбаяр бүх асуудлыг шийдчихнэ гэж байгаа ч тийм биш бололтой. Тэрээр ээж аавтай цагийг өнгөрөөж зав зай гарсан дээрээ хөдөө гарч айраг цагаа эргүүлэн улстөрөөс  түрхэн холдсон гэж эх сурвалж мэдээллэж байна. Харин энэ хойгуур МАХН-ын жижиг цагаан байраар дүүрэн хэрүүл маргаан хор, хов өрнөж байна гэх. Шадар сайд Д.Тэрбишдагвын оронд Ц.Шаравдорж, Г.Шийлэгдамба хоёрын аль нэг нь очихоор хоорондоо тэмцэлдэж байна. Д. Тэрбишдагва ч суудлаа тавих дургүй байгаа нь засгийн газрын долоон сайдыг огцруулахад түүний нэр байгаагүйгээс харагдана. Харин МҮАН-ынхан нэг сайдын суудал авах дээрээ тохирч Н.Батцэрэг гишүүнийг дэвшүүлсэн бол шинээр нийлсэн яамдад нэг дэд сайдын суудал илүү авна гэж МАХН-нд шахалт үзүүлэх болжээ. Энэ мэтээр шинэ бүтэц бүрэлдэхүүнийг томилох асуудал нэлээд ярвигтай үргэлжилсээр байна.