Өнгөрсөн оны арваннэгдүгээр сарын 15-нд Баянзүрх шүүхээс 20 настай охины амийг хөнөөж, цогцсыг нь шатаасан Ч.Ганжаргал, Э.Ууганбаяр нарт тус тус 15 жилийн хорих ял оноосон билээ. Тэднийг Эрүүгийн хуулийн 91.2.1, 91.2.7, 91.2.11, 91.2.15, 153.1 гэсэн зүйл ангиар бутуутгаж ялласан юм. Гэвч шүүгдэгчдийн ар гэрийнхэн шүүхийн шийдвэрийг хүлээн зөвшөөрөхгүй давж заалдахаа мэдэгдээд байсан. Харин давж заалдах шатны шүүх хурал өнөөдөр Нийслэлийн шүүхийн эрүүгийн танхимд болж, анхан шатны шүүхийн шийдвэрийг хэвээр үлдээлээ. Хуралд улсын яллагчаар Г.Мичиддорж, өмгөөлөгчөөр Г.Хишигжаргал, Б.Ганбаатар, Б.Баясгалан, илтгэгч шүүгчээр Д.Дамдин-Од нар оролцов.
Хэргийг сануулбал, Тэд өнгөрсөн оны зургадугаар сард Баянзүрх дүүргийн есдүгээр хорооны нутаг, Шархадны гэр хорооллын орчимд машин унах хүсэлдээ хөтлөгдөн, 20 настай охиныг хөнөөж, цогцсыг шатааж байсан юм. Тэднийг автомашин жолоодон хотын хөдөлгөөнд оролцож байхад нь Замын цагдаагийн ажилтнууд саатуулан шалгасан байна. Гэтэл тэд жолооны үнэмлэхгүй замын хөдөлгөөнд оролцож байжээ. Иймд тээврийн хэрэгсэл түр саатуулах журмын хашаанд машиныг нь тавиулаад өөрсдийг нь саатуулан хэний машиныг ямар зорилгоор жолоодож яваа талаар нь тайлбар авсан байна.
Гэтэл тэдний унаж явсан автомашиныг эзэмшигч бүсгүй гэртээ ирсэнгүй хэмээн нийслэлийн хэмжээнд зарлагдсан байсан гэнэ. Энэ дагуу тэднийг саатуулан УМБГ, Баянзүрх дүүргийн Цагдаагийн хэлтэст шилжүүлэн шалгажээ.
Ч.Ганжаргал, Э.Ууганбаяр нар нь алга болсон гэх охиныг Баянзүрх дүүргийн IX хорооны нутаг, Шархадны гэр хорооллоос цааш байдаг хогийн цэгийн орчимд, жалганд цогцсыг нуусан байна. Хэргийн газрын үзлэгээр талийгаачийн цогцсыг гэмт хэрэгтнүүд ул мөрөө баллахын тулд шатааж, улмаар булсан байжээ. Мөн шүүх эмнэлгийн задлан шинжилгээгээр талийгаачийг хөнөөгөөд дараа нь шатаасан гэдэг нь батлагдсан байна.
Тэд мөрдөн байцаалтын явцад “Машинтай болж, гудамжаар зугаалахын тулд уг эмэгтэйд халдсан. Тэгээд боомилж, ухаан алдуулах зорилготой байсан ч нас барсан болохоор нь ул мөрөө балласан” гэж мэдүүлж байсан юм.
Б.Чимэг
