Хөгжлийн бэрхшээлтэй иргэдэд тулгамддаг асуудал бол тэргэнцэр.  “Улс төрд шинэ манлайлагч” зорилтот телевизийн төслийн “Хорьт” багийн залуус өөрсдийн хэрэгжүүлж буй “Дэм дэмэндээ …” төсөлдөө дээрх сэдвийг хөндлөө. Манай улсын хэмжээнд 6000 гаруй хөгжлийн бэрхшээлтэй иргэд байдаг гэсэн судалгаа бий. Хэдийгээр залуус тэдгээр иргэдэд бүгдэд нь туслаж чадахгүй ч гэлээ өөрсдийн боломжийг дайчлан “Хөгжлийн бэрхшээл – Хүнлэг сэтгэл” төслийг санаачлан, ажлаа хэдийн эхлүүлсэн. Энэ ажлын үр дүнд Монгол хүний ур ухаан шингэж үйлдвэрлэгдсэн тэргэнцэр удахгүй үйлдвэрлэлээс гарах гэж байна. Төслийг санаачлагч залуусын яриаг хүргэе.

“Хорьт” багийн гишүүн Ч.Ариунаа: Бид “Хөгжлийн бэрхшээл – Хүнлэг сэтгэл” төслийнхээ хүрээнд “Никель Гамбаа” компани дээр тэргэнцэрээ үзэхээр ирээд байна. Залуус өөрсдөө хийж бүтээж, сэтгэж чадна гэдгийг эндээс харж болно. Монгол хүн өөрийн ур ухаанаа шингээж гадаадын улс орноос маш үнэтэй худалдаж авдаг тэргийг хамаагүй бага өртөгт багтаан чанартай хийснээр манай улсын олон хөгжлийн бэрхшээлтэй иргэд тулгамддаг асуудлаа хялбархнаар шийдэх боломжтой.

“Хорьт” багийн гишүүн Т.Ариунболд: Бидний санаачилсан энэ төсөлд эхний ээлжинд таван хөгжлийн бэрхшээлтэй иргэн хамрагдана. Тэдний төлөөлөл Д.Цолмон өнөөдөр ирж, өөрийн тэргэнцэр дээрээ сууж дахин хэмжээ өглөө. Ингэснээр тэргийг тухайн хүнд нь илүү тохиромжтой болгож, засаж сайжруулах дараагийн үйлдвэрлэлийн ажил явагдах юм. Хэдийгээр цөөхөн хүнд зориулж төсөл хэрэгжиж байгаа ч гэлээ Монголд үйлдвэрлэсэн тэргэнцэртэй болох боломжийг бид эхлүүлж байна.

“Хаанбанк сан”-гийн менежер Ц.Энх-Өлзий: Манай сангийн зүгээс энэ төсөлд хөрөнгө оруулалт хийн, дэмжин ажиллаж байгаадаа баяртай байгаа. Учир нь хөгжлийн бэрхшээлтэй иргэдэд тулгамддаг гол асуудлыг шийдэх гарцыг залуус санаачлан гаргаж, бодит ажил болгон хэрэгжүүлснээр удахгүй 5 иргэн өөрт нь зориулж хийсэн, стандарт хангасан тэргэнцэртэй болох гэж байна. Бидний зүгээс цаашдаа тэргэнцэр үйлдвэрлэх энэхүү жижиг дунд үйлдвэрлэлийн үйл ажиллагааг дэмжин ажиллах хүсэлтэй байгаа.

Д.Цолмон: Хөгжлийн бэрхшээлтэй хүмүүс өвчний шалтгааны тухайд харилцан адилгүй байдаг. Иймд нэг загвараар хийгдсэн тэргэнцэр тухайн хүнд шууд тохирох нь тун ховор байдаг тул тэргэнцэрт тохируулж суух, биеэ авч явах гэдэг эрүүл мэндийн хувьд эрсдэл дагуулдаг. Гэхдээ би удахгүй зөвхөн надад зориулж хийсэн тэргэнцэртэй болох гэж байна. Төсөлд хамруулж, үр дүнг нь хамтдаа харах гэж байгаа “Хорьт” багийн залуус болон “Улс төрд шинэ манлайлагч” төслийн хамт олон, “Хаанбанк сан” болон Монгол хүний чадварыг харуулан ажиллаж буй “Никель Гамбаа” компаний зохион бүтээгч нартаа баярлалаа. Энэ үйл ажиллагаа Монголын олон олон хөгжлийн бэрхшээлтэй иргэдэд баяртай мэдээ байх болно.