Үнийн өсөлтийг зөвхөн малчидтай холбон тайлбарлаж байлаа. Малчид л малаа үнэтэй зарж, баяжаад байна гэж. Гэтэл энэ нь тийм биш, үнийн хөөрөгдлийг ченжүүд бий болгоод байгаа гэнэ.

   Үнийн өсөлтийг зөвхөн малчидтай холбон тайлбарлаж байлаа. Малчид л малаа үнэтэй зарж, баяжаад байна гэж. Гэтэл энэ нь тийм биш, үнийн хөөрөгдлийг ченжүүд бий болгоод байгаа гэнэ. Тэр ч бүү хэл ченжүүд хөдөөгүүр яван малчдаас малыг нь хямдхан худалдаж аваад Улаанбаатарт өндөр үнээр зарахаас гадна урд хөрш рүү нууцаар хил давуулан наймаалж байна. Манай улсаас нүүрс ачсан олон зуун хүнд даацын машинууд Хятад руу гарч байгааг нь манай ченжүүд ашиглан махаа нүүрсэн доор нуун гаргаж үнэтэй зарах болжээ. Тиймээс хууль зөрчин, хил дамнуулан наймаа хийж байгаа уг хэрэгт  нэгдсэн шалгалт хийж, хариуцлага тооцохоор Гаалийн ерөнхий газар болон Тагнуулын ерөнхий газар ажиллахаар болсон байна. Зөвхөн өөрсдийн ашгийг бодож олон хүнийг, цаашлаад нийгмийг хохироож байгаа ченжүүдэд хариуцлага тооцох нь зүйтэй.
  Өнгөрсөн жил манай орны малын тоо, толгой ихээр нэмэгдэж 36 саяд хүрсэн. Мөн энэ жил энэ тоо улам өсч 40 саяд хүрнэ гэсэн урьдчилсан тооцоог мэргэжилтнүүд гаргаад байгаа билээ. Ийм хэмжээний малтай, махны хэрэглээгээ дотоодоосоо бүрэн хангадаг мөртлөө яагаад үнэ нь ийнхүү нэмэгдээд байгааг олон хүн гайхаж, бас бухимдаж байна.
  Засгийн газраас махны үнийг бууруулахын тулд нөөцийн махыг энэ ням гарагаас худалдаанд гаргана. Нийтдээ 16 мянган тонн махыг нөөцлөөд байгаа бөгөөд 12 мянган тонн нь нийслэлд хэрэглэгдэх юм. Нөөцийн махны хувьд харьцангуй хямд үнээр зарагдаж, үнийн хөөрөгдлийг бууруулаад зогсохгүй улсын баяр наадам хүртэл хүрэлцэнэ гэж төлөвлөж байгаа. Дээр нь хилээр ченжүүдийн хууль бусаар гаргаад байгаа махыг зогсоож чадвал лангуун дээрх махны үнэ буурахад багагүй нөлөөлнө.