Төрийн өмчийн хорооны дарга Д.Сугарыг ажлаас чөлөөлж, түүний оронд В.Энхболдыг томилох нь тодорхой болсон бололтой. Түүнийг Ашигт малтмалын газрын дарга болгохоор ярьж байсан ч М.Ариунбаярыг өрсүүлжээ. Тийм учраас ТӨХ-ны даргын суудалд Энэтхэг улсад элчин сайдаар ажиллаж байсан В.Энхболдыг оруулж, харин У.Хүрэлсүхийн санал унаж байна. МАН-ын ерөнхий нарийн бичгийн дарга У.Хүрэлсүх энэ албан тушаалд Х.Хэрлэнг тавих саналтай байсан юм. В.Энхболд элчин сайдаар ажиллахаасаа өмнө Үйлдвэр худалдааны яаманд Худалдаа, эдийн засгийн газрын дарга байжээ. Одоогийн дарга Д.Сугар гадаадад ажиллаж яваа бөгөөд эргэн ирэхэд нь шинэ дарга ажлаа хүлээж авах бололтой.

    Энэ сарын зургаанд ТӨХ хэд хэдэн асуудал хэлэлцэх байсан ч дарга эзгүй гэсэн шалтгаанаар хурал хойшлогдсон. Гэвч эдгээр асуудал нь шинэ даргын анхны ажил болохыг үгүйсгэхгүй. Хурлаар “Оргил” рашаан сувилалыг удирддаг Н.Энхбаярын аав Б.Намбар, Монгол-Солонгосын хамтарсан “Мон Сам” ТӨХК-ний захирал Ц.Очирбат, “Монголын төмөр зам” ТӨХК-ний захирал Б.Батзаяа нарыг огцруулах асуудлыг хэлэлцэх аж.

Б.Ганбилэг
ganbileg@24tsag.mn