АН-ын ҮЗХ-ны гишүүд нам, намын даргаа хурцаар шүүмжилж байна. Ялангуяа шинээр элссэн гишүүд болох О.Магнай, М.Ичинноров нар намын хариуцлага, намын даргын ёс зүйн асуудлыг ил тод хөндөж байсан юм. Хурал дээр иргэний нийгмийн төлөөлөл гэгддэг О.Магнайн хэлсэн үгийг хүргэе. Гишүүдийн ихэнхи нь түүний шүүмжлэлийг дэмжиж байсан юм.

   Өмнө нь ядарсан, зүдэрсэн хүмүүс АН биднийг хамгаална гэдэг байсан. Сүхбаатарын зүүн талын умгар мухарт ямар ч зүйл болсон цугладаг байлаа. Өнөөдөр сөрөг байр суурь байхгүй болсны харгайгаар бүгд хулгайчид, луйварчид шиг харагдах болсон. Үүний гол буруутан нь хамтарсан Засгийн газарт орсон нөхдүүд гэж би ойлгож байна. Одоо гэнэт Засгийн газраас татгалзъя гэнэ. Өнөөдөр гэнэт МАН гэж том дайсан байгаа юм шиг босч ирээд байх юм. Ичих хэрэгтэй шүү дээ. С.Батболд, Н.Алтанхуяг хоёр зэрэгцэж суучихаад сайн сайхан байна, улс орон хөгжиж байна, Засгийн газрын биелэлт 80 хувьтай байна гэж дүгнэж нэгнийгээ бялдуучилж зусардаж байдгаа болих хэрэгтэй. Улаанбаатарт амьсгалах агаар ч алга яг үнэндээ. Та нарын эхнэр хүүхэд Монголд байхгүй удаж байгааг ойлгож байна л даа. АН ийм нийгмийг бий болгож байгаа нөхдүүдэд өнгөрсөн гурван жил тусаллаа. Энэ бол манай нийгэмд учруулсан хамгийн том гай нь. Өнөөдөр би тэр идсэн уусныг нь ярихгүй ээ. Харин үнэт зүйл, зарчим гэдэг зүйл байхгүй болсныг хэлье.
   1990 онд болсон ардчилсан хувьсгал бол манай нийгэмд шударга ёсыг ардчилалтай авчирсан юм. Харамсалтай нь өнгөрсөн гурван жилд энэ бүхэн байхгүй боллоо. АН, МАН хоёрын ялгаа ч харагдахаа болилоо. Гадныхан С.Баярцогт, Д.Зоригт хоёрыг хараад аль андуурч байна. Харахад ч адилхан, хийдэг, ярьдаг юм нь ч адилхан. Энэ хоёрын байрыг солилоо гээд ч адилхан.  Н.Алтанхуяг, Сү.Батболд хоёр ч гэсэн ямар ялгаатай юм бэ? Ямар ч ялгаа алга. Энэ хоёрын нэгийг ерөнхий сайд, нөгөөг нь шадар сайд болголоо гээд энэ нийгэмд юу өөрчлөгдөв? Урьд нь нэгийг нь нөгөөгөөр соливол бие биедээ хариуцлага тооно гэж хүлээдэг байсан. Одоо тийм хүлээлт байхгүй болсон байна. Зургаан сарын өмнө АН засгаас гарчихлаа  гээд өөр болохгүй. Хамгийн сүүлд сонгуулийн хууль баталсан нь УИХ-д сууж байгаа энэ нөхөд ялагдсан ч гэсэн дахиад УИХ-д орох тиим боломжийг өөрсөддөө бий болгосон. УИХ-д сууж хэдэн нөхөр батлахаар хууль болчихдог юм биш. Энийг чинь ард түмэн баталж байж хэрэгждэг юм. Ийм хууль баталчихаад өөрсдийгөө Ардчилсан нам гэж хэлэхээсээ ичэх хэрэгтэй. Энэ сонгуулийн хуулиар явуулсан сонгуулийн үр дүнг хүлээн зөвшөөрөхгүй байх эрх бидэнд бий. 2008 оны сонгууль ч гэсэн луйвартай булхайтай болсон. Одоо харин луйвар булхайгаа хуулийн дагуу болгочихоод дахиад дөрвөн жил дарлах гэвэл андуурч байна. Би энд сууж байгаа хүмүүсээс илүү гудамжинд байгаа хүмүүсийг төлөөлж ярьж байна. Дарга нарт хариуцлага тооцоод мянга саналаа өгөхгүй байгаад ч эцэстээ дахиад бидний орой дээр суудаг тогтолцоог бий болгочихлоо. Энэ Сү.Батболд, Н.Алтанхуягийг яаж эндээс явуулах юм бэ? АН бол АН шиг байж ард түмнээсээ уучлалт гуйх хэрэгтэй. АН-ын дарга гэхээр дур нь хүрэхээр хамтарсан Засгийн газарт ордог дургүй нь хүрэхээр гарчихдаг. Ингээд орой дээр сууж байдаг хаан юм уу, бурхан юм уу.  Өнөөдөр засаг барьж байгаа юм бол хуушуурны гуанзны зөвшөөрлийг төрөөс өгдөгөө больчих. Бүх юм даргаас хамаардаг, даргыг танихгүй бол юу ч хийж болдоггүй байдлыг өөрчлөөч ээ. АН Монголын ард түмнийг эцсийн эцэст хүчирхийлэл рүү түлхэж байна. Н.Алтанхуяг гуай, та хариуцлага хүлээх ёстой. АН-ын даргад ёс зүйгээ бодоод хариуцлага хүлээе гэдэг эр зориг байх ёстой.