Маргааш Нийслэлийн Захиргааны хэргийн давж заалдах шатны шүүхэд "Алтай констракшн"-ы нэхэмжлэлтэй, Хотын дарга Г.Мөнхбаярыг хариуцагчаар татсан давж заалдах шатны шүүх хурал 9.30 цагаас болно. Маргааш болох шүүх хуралтай холбогдуулан Хан-Уул дүүргийн нэгдүгээр хорооны иргэд өнөөдөр хэвлэлийнхэнд хандаж мэдээлэл хийлээ. Өнгөрсөн хавар Хан-Уул дүүргийн нэгдүгээр хорооны 120 мянгатын автобусны буудлын хажууд байрлах 0,9 га газарт  “Алтай констракшн” ХХК-ынхан орон сууц барих ажил эхлүүлсэн. Тус компанид барилга барих эрхийг нь хотын дарга 370 тоот захирамж гаргаж зөвшөөрчээ. Гэвч оршин суугч, дүүргийн ИТХ-ын гишүүд эсэргүүцэн тэмцэж нийслэлийн шүүхэд хандсан байна. Анхан шатны шүүх хурал өнгөрсөн оны наймдугаар 31-нд болж, нийслэлийн засаг даргын 370 тоот захирамжийг хууль бус хэмээн үзэж тус компанийн газар эзэмших эрхийг нь  цуцалжээ. Гэвч “Алтай констракшн” ХХК захиргааны хэргийн шүүхэд гомдол гаргаж давж заалдсан бөгөөд шүүх хурал өнгөрсөн таван сараас хойш долоон удаа хойшлогдсоор 10 сарын 21-нд болсон байна. Тус хурлын шийдвэр “Алтай констракшн” ХХК-ны талд гарчээ. Иргэд шүүхийн тус шийдвэрийг эсэргүүцэж эцсийн гомдол гаргаснаар гуравдагч этгээдийн хүсэлтээр маргааш шүүх хурал болох юм. Хан-уул дүүргийн 120 мянгатын ногоон байгууламжийг 2000 оны дунд үед тухайн үеийн хотын удирдлагууд “Жигүүр Гранд” “Цаст констракшн” зэрэг компаниудад өгч дуусгаад байсан. Харин ахмад настан, хүүхдүүд салхилж нарладаг үлдсэн жаахан нийтийн эзэмшлийн газрыг одоо өгөх гэж байна. “Алтай констракшн”-д давуу эрх олгож нийтийн эзэмшлийн газрыг өгч байгаа нь хээль хахуультай холбоотой хэмээн сэжиглэж байна. Хүний эрх, эрх чөлөөг хүндэтгэсэн хуулийг Монголын дарга нар нь хэрэгжүүлдэггүй” хэмээн тус дүүргийн иргэд ярьж байна. Маргааш шүүх эцсийн шийдвэрээ гаргана. Хэрвээ шүүхийн шийдвэр иргэдийн талд гарахгүй бол одоогийн хотын захирагч  болоод өмнө нь дарга байсан М.Энхболд нарыг Хан-Уул дүүргийн 1 дүгээр хорооны 1000 өрх авлигатай тэмцэх газарт өгнө гэдгээ мэдэгдлээ.