Цагаатгах ажлыг удирдан зохион байгуулах комиссынхон өнөөдөр хурлаа хийж, байгуулагдсанаасаа хойш 20 жил хийсэн ажлаа УИХ-д танилцуулахаар шийдвэрлэлээ. Мөн өнгөрсөн онд хийсэн ажлаа дүгнэж, энэ оны ажлын чиглэлээ гаргажээ.

   ТЕГ-ын Цагаатгалын тасгийн мөрдөн байцаагчид улс төрийн хэрэгт баривчлагдсан, мөрдөгдсөн, шийтгүүлсэн, хэрэг нь шалгагдаагүй, шинээр илэрсэн 6600 гаруй хүний хэргээс сүүлийн гурван жилд 4131 хүний хэргийг шалгажээ. Энэ онд үлдсэн хүний материалтай танилцах юм байна. Өнгөрсөн онд уг комисс 689 хүнийг улс төрийн хилс хэргээс цагаатгаж, нэр төрийг сэргээсэн бол 71 хүнд цагаатгалын үнэмлэх олгосон аж. Эцсийн тайлан буюу 2011 оны 12 дугаар сарын 30-ны байдлаар 31.1 мянган иргэний нэр төрийг сэргээжээ. Эдгээр нь 1939 оны дөрөвдүгээр сараас хойш хэлмэгдэгсдийг бүгдийг хамруулсан баримт юм.

  1998 оноос хойш цагаатгагдсан 17483 хэлмэгдэгсдийн ар гэрт зориулсан нөхөн олговорт сүүлийн 14 жилд нийтдээ 16.2 тэрбум төгрөг төрөөс зарцуулжээ. Зөвхөн өнгөрсөн онд багтаж цагаатгагдсан хүмүүсийн ар гэрийн 68 хүнд 63.5 сая төгрөг олгосон байна. Гэтэл 14 жилийн турш баримт материал нь бүрдээгүй, шүүхээр тогтоолгож чадаагүй 1153 хүн байгаа гэнэ.  

   Цагаатгалын комисс 2011 онд 855 иргэнд 5.42 сая төгрөгийн нэг удаагийн буцалтгүй мөнгөн тэтгэмжийг төрөөс олгуулсан байна. Мөн 316 хүнд 6.1 төгрөгийн эд зүйл, хүнс барааны туслалцаа хүргүүлжээ. Үүнээс гадна орон сууц авахад хөнгөлөлт болгох, байрных нь нөхцлийг сайжруулахын тулд төрөөс 360 сая төгрөг төсөвт тусгуулсныг хурлын үеэр мэдээллээ.