Өнгөрөгч 2014 онд Монгол Улсын Ерөнхийлөгч Ц.Элбэгдоржийн санаачилсан Шилэн дансны тухай хууль батлагдаж улмаар энэ оны нэгдүгээр сарын нэгний өдрөөс хэрэгжиж эхэлж байгаа юм. Шилэн дансны тухай хуулийн хэрэгжилтийн талаар Сангийн яамны Төрийн нарийн бичгийн дарга Х.Ганцогтоос дараах тодруулгыг авлаа.

-Энэ оны эхний өдрөөс эхлээд Шилэн дансны тухай хууль хэрэгжиж эхэлсэн. Төсвийн байгууллагууд бүгд цахим хуудсандаа төсвийн мэдээллээ ил тод байршуулах ёстой хэдий ч одоогоор хэрэгжилт нь хангалтгүй байна гэсэн шүүмжлэл гараад байна. Энэ нь төсвийн тогтвортой холбоотой гэж ойлгож байна?

-Он гарсаар төрийн сангийн гүйлгээнүүд хийгдэхгүй байгаатай холбоотойгоор гүйлгээтэй холбоотой мэдээлэл тавигдахгүй байгаа. Энэ долоо хоногийн дундаас төсвийн тодотголоор хөндөгдөөгүй байгууллагуудын цалин, тэтгэвэр тавигдана. Гүйлгээнүүд хийгдээд ирэхээр үүнтэй холбоотой мэдээллүүд тавигдаж эхэлнэ. 

-Сангийн яам энэ Шилэн дансны тухай хуулийн хэрэгжилтийг хэрхэн хангаж ажиллаж байна вэ?

-Шилэн дансны тухай хуулиар 37 төрлийн мэдээллийг тодорхой давтамжтайгаар тавина. Мэдээллийн төрлөөсөө шалтгаалаад заримыг нь жилд нэг удаа, заримыг нь сард нэг удаа, заримыг нь долоо хоног бүр гэх мэт тавина. Одоо жишээ, нь шилэн дансны сайтуудад энэ оны байгууллагын жилийн төлөвлөгөө, батлагдсан төсөв, жилийн худалдан авах ажиллагааны төлөвлөгөө болон 2014 оны төсвийн гүйцэтгэлүүд бүгд орчихсон байгаа.  Эдгээр мэдээллүүд бол бүгд байгаа. Харин долоо хоногт бүр, сар тутам тавигддаг мэдээллүүд хараахан тавигдаагүй байгаа.

-Шилэн дансны сайтад нийт хэдэн байгууллагын мэдээлэл тавигдана гэсэн үг вэ, төрийн өмчит аж ахуй нэгжүүдийн мэдээлэл тавигдах уу?

-Төсөвт 5000 орчим байгууллага, 160 төрийн өмчит үйлдвэрийн газар байгаа. Тэдгээр байгууллагын бүх  мэдээлэл тавигдах ёстой. Хөдөө орон нутагт байгаа интернэтэд холбогдох боломжгүй сургууль, цэцэрлэг, эмнэлэг болон бусад төрийн байгууллага бол мэдээллээ өөрсдийнхөө Мэдээллийн самбар дээр тавина.

-Интернэтэд холбогдоогүй байгууллагуудын төсвийн мэдээлэл ил тод байгаа эсэхийг хянах боломж ер нь хэр байгаа вэ?

-Сангийн яамны зүгээс тэр бүхнийг хянах боломжгүй. Бид аймаг бүрээр нь дамжуулж хяналтыг тавина. Нөгөө талаас энэ хуулийн үндсэн зорилт бол ард иргэдийн хяналт. Сангийн яам тэр байгууллагыг хянахаас илүүтэй тухайн байгууллагаар үйлчлүүлдэг ард иргэд өөрсдөө хянаж, энэ талаарх гомдлоо Сангийн яам болон аймгийнхаа Засаг даргын тамгын газарт тавих бүрэн боломжтой. Үндсэн зорилго нь бол энэ. Тэрнээс биш төр төрийгөө хянах зорилттой хууль биш.

-Ингэж мэдээллээ сайтад байршуулдаг болохоор үүнийг хариуцаж хийдэг ажлын орон тоо шинээр гарах уу. Уг нь бол энэ хуулийн төсөл ямар нэг орон тооны давхардал үүсгэхгүй байх зорилготой байсан?

-Шилэн дансны тухай хуулийг хэрэглэхтэй холбоотойгоор шинээр орон тоо үүсэхгүй. Хуулиар үүрэг хүлээсэн, гарын үсэг зурдаг албан тушаалтнууд тэр гарын үсэг зурсан мэдээллээ оруулна. Өөрөөр хэлбэл тэр гарын үсэг зурсан дарга, ерөнхий нягтлан бодогч болон бусад шийдвэр гаргах эрхтэй хүмүүс тухайн гаргасан шийдвэрийнхээ талаарх мэдээллийг тавих үүрэгтэй.

-Шилэн дансны сайтууд хэдийнээс жигдэрч ажиллах вэ?

-Нэгдүгээрт, улс орон даяар энэ долоо хоногийн сүүлээр гүйлгээнүүд хийгээд ирэхээр жигдэрнэ. Хоёрдугаарт, төсвийн тодотгол батлагдахаар бусад төрийн байгууллагуудын үйл ажиллагаа жигдрээд ирэхээр шилэн дансны мэдээллүүд нь баяжих байх. Тэгэхээр энэ сарын сүүл, хоёрдугаар сарын эхээр бол нилээд их мэдээлэл тавигдана.