Өвөрхангай аймгийн засаг дарга Д.Тогтохсүрэнг албан тушаалаа хэтрүүлэн ашиглаж, хууль бус үйлдэл хийж байгааг эсэргүүцэн тус аймгийн АН-аас мэдэгдэл гаргаж, АТГ-т шалгуулахаар болжээ. Уг мэдэгдэлд:
   "Өвөрхангай аймгийн Засаг дарга Д.Тогтохсүрэн орон нутгийн өмчит компанийн үйл ажиллагаанд хяналт тавих чиг үүргээ умартан Өвөрхангай аймгийн “Баянтээг” төрийн өмчит ХК-ны захирал Н.Ганболдын хууль бус үйлдэлтэй хамтрагч эсэх, аймгийн төвийн "А" зэрэглэлийн бүсийн газрыг авлигын шинжтэйгээр танил талдаа олгосон, уул уурхайд ашигт малтмалын үйл ажиллагаа явуулж байгаа компаниудаас их хэмжээний хөрөнгө барьцаалж авдаг тухайд, түүнчлэн засаг даргын тамгын газрын хуулийн хэлтсийн дарга, Мэргэжлийн хяналтын газрын даргыг хууль бусаар албан тушаалаа хэтрүүлэн томилсон, Өндөр Гэгээн Занабазарын сэрэг дүр бүхий хөшөө, цэцэрлэгт хүрээлэн цогцолборт ажлыг гүйцэтгэхэд төсвийн хөрөнгөөр зах зээлийн дунджаас дээгүүр үнээр эд хөрөнгө худалдан авсан, албаны эрх мэдлээ урвуулан ашиглаж улсад онц их хэмжээний хохирол учруулсан байж болзошгүй эрүүгийн гэмт хэргийн шинжтэй үйлдлүүдийг таслан зогсоох зорилгоор АТГ-т хандаж байна” гэжээ.

  Өвөрхангай аймгийн “Баянтээг”-ийн нүүрсний уурхайн захирал Н.Ганболдыг аймгийн Аудитын газар шалгаад хууль бусаар мөнгө идсэн, хувьдаа завшсаныг тогтоочихоод байхад түүнийг аймгийн Өмчийн газрын дарга болгон тушаал дэвшүүлжээ. Түүнчлэн аймгийн Мэргэжлийн хяналтын газрын даргыг хууль зөрчин томилсон байна. Улмаар хууль бусаар гарч ирсэн дарга нь 10 гаруй байцаагчийг мөн хууль зөрчин, танил тал, ах дүү нараасаа томилсон аж. Уг байцаагчид нь уул уурхайн компаниудын үйл ажиллагааг зогсооно хэмээн дарамтлах замаар аж ахуйн нэгж болгоноос гурван сая төгрөгийг аймгийн мэргэлжийн хяналтын газрын даргын хувийн дансанд оруулсан байна. Эдгээр улсын байцаагчдын албан тушаалаа урвуулан ашиглах үйлдэл бүр хэрээс хэтэрч Орхон голын эхийг хамгаалах нэрийдлээр Архангай аймгаас газар авч, түүнийгээ 250 сая төгрөгөөр бусдад худалдсан аж.

  Мөн Аймгийн “А” зэрэглэлийн газарт аймгийн Засаг даргыг тойрон хүрээлэгчид газар эзэмшдэг бол жирийн иргэдэд аймгийн төвийн хаалганы цаана газар олгогдож байгаа юм байна. Нөгөөтэйгүүр аймгийн ИХТ-ийг татвар төлөгчдийн мөнгөөр гадаадад аялуулдаг байдал уламжлал болсон гэнэ. 2011 оны улсын төсвийн хөрөнгө оруулалтаар Өндөр гэгээн Занабазарын сэрэг дүр бүхий хөшөөт цогцолборын барилгын ажлыг “Өндөрбуянт холдинг” ХК-иар хийлгэхээр гэрээ байгуулсан байна. Энэ ажлын хүрээнд Засаг дарга 200 орчим сая төгрөгийг хувьдаа завшсан нь тогтоогдсон гэж АН-ын гишүүд мэдэгдэж байгаа юм. Засаг дарга Д.Тогтохсүрэн дөнгөж өчигдөр намдаа 8474 гишүүн шинээр элсүүлж, аймгийнхаа нийт хүн амын 14.1 хувийг МАН-ын гишүүн болгож чадсаныхаа төлөө намын шилдгийн шагнал хүртээд байгаа аж. Гэтэл Өвөрхангай аймагт МАН-д гурван хүн элсүүлэх юм бол 100 мянган төгрөгийн шагналтай, нийт элсүүлсэн хүн нь 40 хүрсэн тохиолдолд сая төгрөг нэмж олгоно гэсэн зар тараасныхаа хүчинд намдаа ийм олон хүн элсүүлсэн гэж Өвөрхангай аймгийн АН-ын төлөөлөгчид хэлж байлаа.