Сарын осол: Хоёр ч лифт эвдэрч унажээ
    Нийслэлд яаралтай шинэчлэх шаардлагатай 284 цахилгаан шат байдгийн хоёр нь энэ сард уналаа. Клиникийн нэгдүгээр эмнэлгийн цахилгаан шат эвдэрч унахад хоёр сувилагч ухаан алдаж, эм тариа хагарсан гэсэн ч албаныхан нь үгүйсгэв. Мөн “Централ тауэр”-ын цахилгаан шат ажлын цагаас өмнө унахад дотор нь хүн байгаагүй аж. “КОНЕ корпораци”-ийн үйлдвэрлэсэн шатыг “Цаст Холдинг” компани суурилуулжээ.

Сарын гэмт хэрэг: Банк дээрэмдэгч хүн алав
   Хоёрдугаар сар гараад удаагүй байхад Налайх дүүрэгт байдаг “Хаан” банкны салбарт буутай дээрэмчин хүний аминд хүрчээ. Урьдаас төлөвлөсөн хэргийн уршгаар салбарын эрхлэгчийн нөхөр амь алдаж, өөр нэг бүсгүй шархадсан юм. Хэрэгтэн хотоос холдоогүй, таксины жолооч барьцаалан явахад нь баривчиллаа.

Сарын амбиц: “Толгойгүй” шонхор мэндэллээ
    Ардчилсан намын гишүүн З.Энхболдын тэргүүлдэг Ардчилсан хүчний холбооны чуулганы дараа “Шонхор” мэндэллээ. Ардчилсан нам дотроо амбицтай гишүүд болох З.Энхболд, С.Эрдэнэ болон Д.Ганхуяг, Д.Одхүү, Г.Баярсайхан, Х.Баттулга нар шинэ фракцын гишүүн юм. Тэд мөн АХХолбоо бол нам, хүчин, фракц биш ТББ гэж залруулга хийсэн юм.

Сарын гүтгэлэг: “Асашёрюү Д.Мөнхбаатарын толгой руу хутгалав”
   Ийм мэдээлэл энэ сард гэнэт гарч ирээд, маш хурдан тарсан ч тодорхой бололгүй замхрав. Яг үнэндээ Асашёрюү тэгээгүй гэж, Д.Мөнхбаатар хутгалуулаагүй гэсэн нь үнэн байв. Сар шинийн барилдаанаар гар барин инээмсэглэн мэндэлж байлаа.

Сарын ухаарал: Ард түмэндээ очъё, УИХ баяртай
   Э.Бат-Үүл ард түмнийхээ дунд орж, байрны үнийг буулгах ажил хийх гэтэл “Битгий шоуд” гээд иргэд хүлээж авахгүй байгаа аж. Тиймээс УИХ-д дахиж нэр дэвшихгүй, ард түмэндээ очно хэмээн мэдэгдэл хийв. Ардчилсан намд хүндээр тусах уг шийдвэрийг намынхан нь болиулахаар оролдож байгаа аж.

Сарын харуусал: Баяртай Уитни
   “I’ll always love you” хэмээн дуулсан попын хатан хаан Уитни Хьюстон нас барав. Хар тамхи хэтрүүлэн хэрэглэсний улмаас зочид буудлын өрөөнд амьсгал хураасан байхыг нь олжээ.

Сарын сюрприз: Байраа аваарай, төр тусална
   Сар шинийн битүүний өдөр Засгийн газар шийдвэр гаргаж, гишүүд болох Ц.Дашдорж, Д.Хаянхярваа нар хотын дарга Г.Мөнхбаяртай хамтран бүх монголчуудад сюрприз барив. Зургаан хувийн хүүтэй, 55 м.кв талбайтай байрыг зээлээр авахад Засгийн газар туслахаар болсон. Ажил гуравдугаар сараас эхлэх бөгөөд одоо бэлтгэл ажил үргэлжилсээр байна.

Сарын тэмдэглэлт өдөр: Нийслэл хүрээ ба нэгэн зуун
    Улаанбаатарыг “Нийслэл хүрээ” гэж нэршсэний 100 жилийн ой өнгөрсөн сард эхэллээ. Ойн хүрээнд гэрэл зураг, түүхийн үзмэрээр үзэсгэлэн гаргах, тэмцээн зохиож, шашны ном хурж, урлаг, спортын тоглолт зохион байгуулсан. Эндээс нийслэлийн таван нэр бүрийн тэгш ойг Улаанбаатарчууд тэмдэглэх үү гэсэн асуулт гарч иржээ.

Сарын бүтэлгүйтэл: Засгийн газар хэлсэндээ хүрсэнгүй
   Эдийн засаг үнийн хөөрөгдлийг намжаах, үнийг бууруулах амлалтыг Засгийн газар МҮЭ-д өгч, хоёрдугаар сарын нэгэнд тодорхой үр дүнд хүрнэ гэсэн. Гэвч өнөөдрийг хүртэл үнэ тогтворжуулах ажлын хэсэг байгуулагдсанаас өөр бодитой үр дүн гараагүй байна.

Сарын амралт: Сар шинэдээ сайхан шинэллээ
   Баясгалан хэмээх луу жилийг угтах цагаан сарын баяраар монголчууд албан ёсоор тав хоног, албан бусаар найм хоног амарлаа. Шинийн гуравнаас хойш томоохон сүпермаркетуудын гурилан бүтээгдэхүүний лангуу хоосорсон байв. 2.7 сая монголчууд бүгд сайхан амарч шинэллээ.