Өнөөдөр 10.00 цагаас Чингис зочид буудалд Улс төрийн холбооны таван нам болох МАХН, МҮАН, МЛН, БНН, МАХөН-ын эмэгтэйчүүд “Өнөөдрийн Монгол орон ба Эмэгтэйчүүд” сэдэвт уулзалт ярилцлагыг зохион байгууллаа. Уг уулзалт ярилцлагыг нээж Н.Энхбаяр үг хэлж, МУ-ын бүх эмэгтэйчүүдэдээ, эхчүүдэдээ баярын мэндчилгээг дэвшүүлсэн юм. Үүний дараа МАХН-ын ЕНБД Н.Удвал “Монголын эмэгтэйчүүдийн аж байдлыг тольдохуй” илтгэлээ уншлаа. Тэрээр Монголын долоон эмэгтэй тутмын нэг нь гэр бүлийн хүчирхийлэлд байна. Эх хүүхдийн хоол тэжээлийн дутагдал сүүлийн жилүүдэд өссөн, өсвөр насны охидын нөхөн үржихүйн эрх сүүлийн жилүүдэд ноцтойгоор зөрчигдөж байна зэрэг эмэгтэйчүүдэд тулгамдаад байгаа олон асуудлуудыг дурдаад хүүхэд эмэгтэйчүүд гэр бүлийн аж байдлыг сайжруулах, аюулгүй байдлыг хангах бодлого боловсруулах шаардлагатай байгааг хэлсэн юм.
Түүнчлэн эмэгтэйчүүдийн эрхийг зөрчиж байгаа ажилгүйдэл, ядуурал, хүчирхийлэл, хүний наймаа, хүнсний аюулгүй байдал, хүүхдийн эндэгдлийг бууруулах тусгай хөтөлбөр гаргах цаг болсоныг тэрбээр онцоллоо.
МАХН-ын ЕНБД Н.Удвалаас цөөн зүйлийг тодрууллаа.
-Өнөөдрийн уулзалт хэлэлцүүлгийг зохион байгуулсан гол зорилго юу байв?
-Өнөөдөр МАХН, МҮАН, МЛН, БНН, МАХөН зэрэг таван намын дэргэдэх эмэгтэйчүүдийн байгууллага нэгдээд Монгол эмэгтэйчүүдийнхээ аж байдлыг тольдох, оношлох хурлыг хийлээ. Хүн амын маань 51 хувийг эзэлж байгаа Монгол бүсгүйчүүд маань ардчилсан гэгдээд байгаа 21-р зуунд хэрхэн амьдарч байгааг дэлгэн ярилцлаа.
-Эмэгтэйчүүдийнхээ аж байдлын талаар ярилцаж байхад хамгийн ихээр тулгамдаад байгаа асуудал нь юу байна вэ?
-Эмэгтэйчүүдийн маань эрүүл мэндийн асуудал, эх хүүхдийн эндэгдэл өндөр байгаа явдал байна. Мөн эмэгтэйчүүд маань хоол тэжээлийн хомсдол дутагдалтай амьдарч байна. Түүнчлэн ажлын байрны хүчирхийлэл, гэр бүлийн хүчирхийлэл, ажлын байран дээрээ ялгаварлан гадуурхагдах, хүнд хэцүү нөхцөлд ажил эрхлэх эрхээ зөрчүүлэх явдал их байна. Монгол эмэгтэйчүүд маань ийм хүнд хэцүү байж болохгүй ш дээ. Тиймээс тэднийхээ эрхийг хамгаалах бодлогыг боловсруулах ажлыг хийх хэрэгтэй байна. Төр эмэгтэйчүүдийнхээ эрхийг нэг бүрчлэн хамгаалж чаддаггүй юм аа гэхэд эрхийг нь хамгаалах стандартыг тогтоож өгөх шаардлагатай. Сүүлийн үед хүний наймаа их гардаг болж. Манай улс хүний намайг нийлүүлэгч, дамжуулагч орон болоод хувирчихсан байна. Биеэ үнэлэлт, архидалт зэрэг олон асуудлууд өнөөгийн нийгэмд байна.
-Эдгээр асуудлуудыг шийдвэрлэхийн тулд ямар ажлуудыг хийх шаардлагатай байгаа вэ?
-Төрийн бодлогоор зохицуулах ёстой. Өнөөдрийн хуралдаанаар өнөөдрийн нийгмээ тольдож, тулгамдсан асуудлуудаа тогтоосон. Одоо тэдгээр асуудлуудыг шийдвэрлэх бодлогын ажлаа боловсруулж, ирэх сонгуульд оролцох мөрийн хөтөлбөртөө тусгана гэж зорьж байгаа.
Б.Чимэг
