Хэдэн толгойлогчид цаазын ял оноовол энэ улс орон зөв гольдролдоо орох болов уу гэж УИХ-ын гишүүн Х.Баттулга хэлжээ. Ийм үгийг олон нийтийн сайтаар түгээсэн нь санаандгүй хэрэг биш гэдэг нь тодорхой ч толгойлогч гэж чухам хэнийг хэлсэн нь ойлгомжгүй.  Ерөнхий сайд болно гээд л, АН-ын даргыг унагана гээд л нийгэмд гэнэт гэнэт цойлж байсан түүний цааз тулгасан толгойлогч нь хэн бэ? Үгний утгаар нь хөөн бодвол улс төрийн нам, фракцын тэргүүлэгчдээс өөр дүр төрх орж ирэхгүй. Н.Алтанхуяг, С.Батболд нар толгойлогчдын жагсаалтыг эхлүүлэх болов уу? Учир нь тэрбээр хувьсгал хийх, сэрж босох тухай сүүлийн үед өглөө бүр далд сануулдаг болсон. Хувьсгал гэдэг нь одоо байгаа засаглагчдад л хамгийн түрүүнд ханддагаараа цаазын ялын тухай үгтэй нь утга нийцэх биз. Хувьсгал хийе гэж дандаа ярьдаг О.Магнайг МАХН, МҮАН-ын Нээлттэй хуралдаанд урьсан бол мөн Х.Баттулгыг урьсан гэх мэдээлэл нэг хэсэг тархсан. Үнэний хувьтай мэдээллийн дараагийн алхам нь толгойлогчдыг цаазлах асуудал бололтой.

    Солонгос, Сингапур, Малайз, Тайланд зэрэг хэд хэдэн орон ийм аргаар улсаа мандуулсан гэж тэрбээр нотлон өгүүлжээ. Бусдын аргаар замнах нь зөв хэдий ч нөгөө талаар алдаанаас нь суралцах хэрэгтэй ч гэж мэргэд хэлдэг. Удирдагчдаа цаазалсан нь үнэхээр улсыг хөгжүүлсэн үү гэдгийг тогтооход бэрх. Харин улс орон, иргэдийн ухамсар, ойлголтыг өөрчлөх шинэчлэх нь илүү үр дүнтэй.

   Гишүүний хэлсэн үгэнд эгдүүцсэн, эсэргүүцсэн хүмүүст “Эргэн тойронд болж байгаа, болох гэж байгааг мэдээлэх мэдрэх нь УИХ-ын гишүүний үүрэг” гэж Х.Баттулга хариулсан байна. Тэгвэл цаазлах тухай дээрх үгс нь түүний бат байр суурь биш зүгээр л эргэн тойрноос нь мэдрэгдсэн зүйл ч байж болох. Өнөөх хувьсгалд уриалагч хүмүүс, намууд гишүүнийг тойрон хүрээлээд байгааг далдуур мэдээлсэн байхыг ч үгүйсгэхгүй. Ямар ч байсан твиттерт цаазлах тухай нийтэлсэн жиргээг нь 30 орчим хүн өлгөн авч цааш түгээжээ. Харин дөрвөн хүн таалагдлаа гэсний дотор О.Магнай яах аргагүй багтсан биз ээ.