УИХ-ын чуулганы ээлжит бус хуралдаанаар Батлан хамгаалахын сайд Ж.Энхбаярыг огцруулах эсэх асуудлыг хэлэлцэж байгаа юм. Түүнийг нийтийн эмх замбараагүй байдал үүссэн тохиолдолд байлдааны зэвсэг хэрэглэхээр зэхэж байна хэмээн буруутгаж байгаа билээ. Чуулганы үеэр УИХ-ын гишүүн Ч.Сайханбилэг "Ж.Энхбаярт өгөх зөвлөгөө байна. Ам нээх бүртээ өөрийгөө асуудалд оруулаад байх юм. Хэвлэлээр янз бүрийн юм яриад улам ороогдоод байна. Дээр нь байнгын хорооны хурал дээр тараасан материал дунд нь төрийн нууцад хамаарах материал хүртэл байсан" гэв.

   Харин Ж.Энхбаяр сайдыг МАН-ын гишүүд нь огцруулахгүй хэмээн хамгаалсаар байна. Тухайлбал, УИХ-ын гишүүн Д.Балдан-Очир “Сайдын зөвлөл дээр ярьсан яриаг нь өлгөөд байгаагаас төрийн захиргааны шийдвэр гэж хэлбэржсэн зүйл байхгүй. Энэ хүнийг огцруулъя гэсэн үндэслэл, нотлох баримт байхгүй” гэв. Мөн тус намын гишүүн, УИХ-ын гишүүн С.Бямбацогт “Төрийн нарийн бичгийн даргыг өөр ажилд шилжүүлсэнтэй холбогдож энэ асуудал үүслээ. Анх Ш.Сүхбаатар хурандаа АН-ын бүлгийн хурал дээр сайдаас асуулгүй оролцох ёсгүй байсан.  Байлдааны бэлэн байдал гэсэн үгэн дээр дөрөөлж улс төржүүлээд байна” гэж өмөөрөв. Ж.Энхбаяр сайдыг огцруулах саналыг УИХ-д оруулсан Э.Бат-Үүл гишүүн  “Сайдтай хариуцлага тооцох нь парламентын эрх, үүргийн асуудал. Нотлох баримтын тухайд шаардлагатай бол өөрийнх нь амнаас унасан үгийг, ярилцлагыг нь сонсгож болно” гэлээ.