УИХ-ын ээлжит бус чуулганаар Ж.Энхбаяр сайдыг огцруулах тухай хэлэлцэж байгаа нь АН, МАН-ын гишүүдийг талцуулж, өмнөх баримтуудыг сөхөхөд хүргэв. Тухайлбал, УИХ-ын гишүүн Л.Гүндалай цахим иргэний үнэмлэхийг хугацаанд нь гаргахгүй гэж Хууль зүйн сайд Ц.Нямдорж зүтгэж байна гэж хэлсэн нь ширүүн маргаан үүсгэв.

Хууль зүйн сайд Ц.Нямдорж: "Бодь” группээс болж цахим үнэмлэхийн ажил хойшилсон
  - Цахим иргэний үнэмлэхийг тендергүйгээр авсан нь “Бодь интернэйшнл” /Батлан хамгаалахын сайд асан, УИХ-ын гишүүн Л.Болдын эзэмшилд байдаг/. Н.Алтанхуяг энэ ажлыг хариуцаж байхдаа 5 сарын хугацаа алдсан. Бас “Бодь интернэйшнл”-тэй бэлдэц нийлүүлэх гэрээ хийсэн ч бэлдэцийн загвараа өөрчлөхгүй бол хэвлэж чадахгүй гэж дахин хойшлуулсан. Ямар ч ажил хийгээгүй байж сайд нь огцорсон байгаа шүү дээ. Ийм юм хийчихээд хүн рүү дайрахаа больцгоо. Хэн будлиан эхлүүлчихээд зугтлаа, хэн МҮОНРТ-рүү дайрлаа.  2008 оны 7 сарын нэгэнд  хоёр сая хүний нүд 24 цагийн турш харсан шүү. Хариуцаж байсан сайд, УБЕГ-ын дарга байсан хүмүүс, "Бодь" гээд хувийн эзэмшлийн компаний хариуцлагагүй байдлаас болж ажил хойшилж байна.

УИХ-ын гишүүн Л.Гүндалай: Өрөөндөө хүн боогоод унагаасныг чинь нуугаад өнгөрсөн шүү
 - Үндсэн хуулийг зөрчиж жорлондоо, орондоо хууль зассан гээд УИХ-ын даргаас огцорсон этгээд шүү дээ, та. Та өнөөдөр өөрөө өөгүй юм шиг ярьж байна. Хууль зүйн сайд хүн байж өрөөндөө хүн боогоод унагаасны чинь хоёр жилийн өмнө нуугаад өнгөрсөн. Та хуулийг 20 жил будлиуллаа.

УИХ-ын гишүүн Л.Болд: Ц.Нямдорж сайд гүтгэлэг тарааж байгаа бол шүүхэд хандана
- Хувийн компанийг ингэж ялгаварлан гадуурхаж байгааг эсэргүүцэж байна. Энэ компани хууль зөрчсөн бол Хууль зүйн сайд өөрөө шалгах ёстой. Хэрэв Ц.Нямдорж сайд ийм гүтгэлэг тарааж байгаа бол би шүүх, хуулийн байгууллагад хандана. Ж.Энхбаяр сайд ч өмнө хэлсэн үгнээсээ татгалзаж байна. Хурандаа Ш.Сүхбаатар гэдэг төрийн албан хаагчийг ажилдаа тэнцэхгүй гэж яллаж байгааг хүлээн зөвшөөрөхгүй. Нэг өдрийн дотор төрийн нарийн бичгийн үүрэг гүйцэтгэгчээр гурван хүн томилж, өөрчилсөн байгааг хууль зөрчсөн гэхээс аргагүй гэлээ.