Луу жилийн тэргүүн сарын шинийн найманд IX Богд Жавзандамба таалал төгссөн билээ. Хутагтыг хойд төрлөө олсон гэсэн шинж тэмдэг үзэгдэхээс нааш биеийг нь хөндөхгүй гэж байсан юм. Тэгвэл IX Богдыг маргааш хүндэтгэн үдэхээр болсныг Гандантэгчинлэн хийдийн хэвлэл, мэдээлэл хариуцсан төлөөлөгч дуулгалаа. Тэрбээр “Хүмүүсийн төсөөлж байгаа шиг гашуудах ёслол маргааш болохгүй. Харин энэ агуу хутагтыг хүндэтгэн үдэх ёслол болно. Монголчууд бид Жавзандамба хутагтын есөн дүрийг угтан авч, есөн дүрийг үдэж байна. Түүний үгүйд буддын шашин болон манай сүсэгтнүүдийн хувьд ямар нэгэн өөрчлөлт гарахгүй” гэсэн юм. Энгийн хүнийг таалал төгсөхөд гашуудан оршуулдаг бол хутагт, хувилгаад хойд төрлөөрөө эргэн ирдэг учир гашуудах хэрэггүй гэж Буддын шашинд үздэг тухай тэрбээр тайлбарласан юм. Маргааш өглөөний 10 цагаас 13 цаг хүртэл энэ үйл ажиллагаа үргэлжлэх бөгөөд сүсэгтэн олныг ирж, хүндэтгэл үзүүлэхийг урьж байгаа юм.
    IX Богдыг өнгөрсөн өдрүүдэд тугдам буюу бясалгалын байдалтай байгаад түүнээсээ гарсан тухай бид гадны эх сурвалжаас уламжилан мэдээлж байсан билээ. Энэ ёслолыг БСШУ-ны сайд Ё.Отгонбаярын ахалсан ажлын хэсэг хариуцан зохион байгуулж байгаа ч одоогоор дэлгэрэнгүй мэдээлэл өгөөгүй байна.
    Монголын бурхан шашны тэргүүнээр заларсан есдүгээр Богд 1932 онд Төвдийн Лхас хотын ойролцоо төрсөн бөгөөд дөрвөн настайд нь Халх Монголын наймдугаар богд Жавзундамбын хойд дүрээр тодруулсан байна. 29 нас хүртлээ номын өргөөнд шавилан сууж байгаад Энэтхэг улс руу дүрвэжээ. Харин 2010 онд Монгол улсад заларч ирээд 2011 онд монголын бурхан шашны тэргүүнээр өргөмжлөгдсөн юм.