Монгол Улсын Хүнс, хөдөө аж ахуй, хөнгөн үйлдвэрийн сайд Ч.Улаан тэргүүтэй төлөөлөгчид өнгөрсөн пүрэв, баасан гаригт Ром хотноо зохион байгуулагдсан НҮБ-ын Хөдөө аж ахуйг хөгжүүлэх олон улсын сан (ХААХОУС)-гийн Удирдах зөвлөлийн 42 дугаар хуралдаанд оролцлоо.
ХААХОУС-гийн Удирдах зөвлөлийн хуралдааны үеэр сайд Ч.Улаан НҮБ-ын Хүнс, хөдөө аж ахуйн байгууллагын Ерөнхий захирлын орлогч Даниель Густафсон, ХААХОУС-ийн Дэд ерөнхийлөгч Корнелиа Риктер нартай уулзаж, эдгээр байгууллагатай хөгжүүлж буй хамтын ажиллагааны талаар санал солилцов. Уулзалтын үеэр Монгол Улс зах зээлийн нийгэмд шилжсэн үеэс эхлэн мал аж ахуй, хөдөө аж ахуйн салбарт НҮБ-ын ХХААБ болон ХААХОУС-гаас үзүүлсэн дэмжлэг тусламж, хэрэгжүүлсэн төсөл, хөтөлбөрүүд чухал ач холбогдолтой байсныг онцлоод цаашид эрчимжсэн мал аж ахуйг хөгжүүлэх, малын эрүүл мэндийг сайжруулах чиглэлээр төсөл, хөтөлбөр шинээр хэрэгжүүлэхэд хамтран ажиллахаар тохиролцжээ. Түүнчлэн ХААХОУС-гаас 2018-2021 онд хэрэгжүүлж буй “Зах зээл ба бэлчээрийн удирдлагын хөгжил” төслийг үр дүнтэй гүйцэтгэхэд хоёр талаас бүхий л дэмжлэг үзүүлэхээ амлажээ.
Мөн Монгол, Италийн Засгийн газар хоорондын холимог комиссын Монголын хэсгийн даргын хувиар тус комиссын Италийн хэсгийн дарга, Эдийн засгийн хөгжлийн яамны Төрийн нарийн бичгийн дарга Микелэ Жерачитай уулзжээ. Уулзалтаар Монгол, Италийн худалдаа, эдийн засгийн хамтын ажиллагааг өргөжүүлэх талаар санал солилцсон төдийгүй бизнес эрхлэгчдийн хамтын ажиллагааг идэвхжүүлэх, Италийн дэвшилтэт технологийг Монголын түүхий эдтэй хослуулан нэмүү өртөг шингэсэн эцсийн бүтээгдэхүүн үйлдвэрлэх талаар олон жил яригдсан асуудлыг ажил хэрэг болгоход онцгойлон анхаарахаар тохиров. Монгол, Италийн Засгийн газар хоорондын холимог комиссын гуравдугаар хуралдааныг ээлжийн дагуу энэ оны эхний хагаст Ром хотноо зохион байгуулахаар тохиров.
