Монголын Морин спорт, уяачдын холбооны 30 жилийн ой, Монголын уяачдын өдрийг тохиолдуулан “Их хурд-10” шигшмэл хурдан морьдын наадам энэ сарын 8-10-ны өдрүүдэд Хүй 7 худагт зохион байгуулагдах гэж буй. Иймд "Их хурд-10" морин уралдааны тухай дараах мэдээллийг хүргэж байна.
Монголын шигшмэл хурдан морьдын “Их хурд” уралдаан нь Монгол орны бүх аймаг, бүс нутгаас шалгарсан хурдан морьд, уяачид оролцдог, үндэсний хэмжээний, хамгийн дээд зэрэглэлийн уралдаан юм. Анхны уралдаан 1998 онд Өвөрхангай аймгийн Хархорины Харганатын хөтөлд болж байжээ. Тэр цагаас буюу 1998 оноос эхлэн 3 жил тутамд нэг удаа Засгийн Газрын шийдвэрээр зохион байгуулдаг болжээ.
-Үүсгэн байгуулагч-
Монголын шигшмэл хурдан морьдын “Их хурд” уралдаан, Бүсийн уралдааныг анх санаачилсан хүн бол Адъяагийн Баярмагнай. Тэрбээр Төв аймгийн Бор-Өндөр суманд 1944 онд төрсөн. Монголчуудын хурдан морины соёл, түүхэн уламжлалын сэдвээр 40 гаруй жил судалгааны ажил хийж, 10 гаруй нэр төрлийн 100 гаруй хэвлэлийн хуудас судалгаа, сурталчилгааны бүтээл туурвисан нэгэн. Мөн ММСУХ-г үүсгэн байгуулагчдын нэг юм.
"Их хурд" уралдаанд Төв аймгийн Дэлгэрхаан сумын уугуул Ш.Мөнгөншагайн хүрэн морь нийт дөрвөн удаа түрүүлж байжээ.
-Түрүү морины бай нь автомашин-
“Их хурд” анхны уралдааны түрүү морийг “Мон Хангай” группийн ерөнхийлөгч С.Сэргэлэн “УАЗ-469” машинаар ивээн тэтгэсэн түүхтэй. Тэрхүү цагаас хойш энэхүү нэр хүндтэй уралдааны түрүү морины эзнийг автомашинаар шагнадаг уламжлалтай болжээ.
-Өвөрхангай аймагт хамгийн олон зохиогдсон-
Анхны "Их хурд" морин уралдаан Өвөрхангай аймгийн Хархорин сумын нутаг, Харганатын хөтөлд болж байжээ. Нийт есөн удаа зохион байгуулагдахад Өвөрхангай аймгийн Хархорин болон Арвайхээр суманд нийт таван удаа, Хүй долоон худагт гурван удаа, Хэнтий аймагт нэг удаа зохион байгуулагдаж байжээ. Хамгийн сүүлийн буюу 2022 онд Хэнтий аймгийн Чингис хотод болсон юм. Хари энэ жил Хүй долоон худагт болно.
-Энэ жилийн ИХ ХУРД-
Энэ жилийн наадмын хүрээнд Улс, аймаг, цэрэг, сумын алдар цолтой 256 бөхийн барилдаан болно. Мөн Шигшмэл хурдан морьдын уралдаан олон түмний анхаарлын төвд байх бөгөөд уламжлал, спорт, соёлыг хослуулсан баялаг хөтөлбөртэйгөөр өрнөх юм.
