"Малчны тухай хууль" 2024 оны зургаадугаар сарын 5-ны өдөр батлагдсан билээ. Тус хуулийн 4.2.5 дугаар заалтад “Малчнаар 10-аас доошгүй жил тасралтгүй ажилласан малчны нэг хүүхдийг мал аж ахуй, тэжээл, бэлчээр судлалын чиглэлийн мэргэжлээр төрийн өмчийн дээд боловсролын сургалтын байгууллагад үнэ төлбөргүй суралцуулах” гэж тусгажээ. Тэгвэл эл заалт есдүгээр сарын 1-ний өдрөөс буюу энэ хичээлийн жилээс эхлэн хэрэгжих юм. Иймд малчны хүүхэд ямар сургуульд, ямар мэргэжлээр үнэ төлбөргүй суралцах, ямар шаардлагыг хангасан байх ёстой талаарх мэдээллийг хүргэж байна.
10 жил мал малласан малчны 1 хүүхэд Хөдөө аж ахуйн их сургуульд үнэ төлбөргүй суралцах боломжтой. Ингэхдээ "Мал аж ахуй", "Тэжээл, бэлчээр судлал", "Бэлчээр хамгаалал, нөхөн сэргээлт" чиглэлээр суралцах юм.
- Монгол Улсын иргэн байх;
- Зохих журмын дагуу элссэн, боловсролын цахим мэдээллийн системд бүртгэгдсэн байх;
- Дээд боловсролын сургалтын байгууллагын үндэсний эрэмбийн үнэлгээний сургалтын хэсэгт 50-аас дээш хувийн үнэлгээ авсан сургалтын байгууллагад суралцах;
- Магадлан итгэмжлэгдсэн сургалтын хөтөлбөрөөр суралцах;
- Дэд бакалаврын үндсэн хөтөлбөрт элсэн суралцагч нь элсэлтийн шаардлага хангасан байх, үргэлжлүүлэн суралцагч нь өмнөх улирлын голч дүн 2.8-аас доошгүй байх.
- Дотоодын сургалтын байгууллагад элсэн суралцагч бол элсэлтийн шалгалтад тухайн мэргэжлийн чиглэлийн шалгалтад 501-ээс дээш оноо авсан тохиолдолд 100 хувийн, үргэлжлүүлэн суралцагч бол өмнөх улиралд 3.0, түүнээс дээш голч дүнтэй суралцсан тохиолдолд 100 хувийн, 2.8-3.0 хүртэл голч дүнтэй суралцсан тохиолдолд 70 хувийн сургалтын төлбөрийн тэтгэлэг олгоно.
Хөгжлийн бэрхшээлтэй хүүхдэд боловсрол олгох чиглэлээр заасан мэргэжлийг 2 дахь мэргэжлээр сонгон дэд бакалавр, бакалаврын үндсэн хөтөлбөрөөр суралцаж болно.
Суралцагч нийтлэг шаардлагаас гадна төгссөнөөс хойш орон нутгийн байгууллагад 3 жил, нийслэлд 5 жил мэргэжлээрээ тогтвортой ажиллах нөхцөлийг хүлээн зөвшөөрсөн байна.
Дотоодын сургалтын байгууллагын суралцагч нь дараах материалыг бүрдүүлж, сургуульдаа
өгнө.
- Хүсэлт (батлагдсан маягтаар)
- Иргэний үнэмлэхийн хуулбар (И-Монгол цахим системээс)
- Дэд бакалавр, бакалаврт шинээр элсэгч элсэлтийн ерөнхий шалгалтын батламж (И- Монгол цахим системээс)
- Суралцагчийн голч дүнг тусгасан сургуулийн тодорхойлолт
- Тухайн улиралд судалж байгаа хичээлийг баталгаажуулсан жагсаалт
- Төрсний лавлагаа (И-Монгол цахим системээс)
- Зээлийн шаардлага хангаж буй суралцагчид:
Оюутны хөгжлийн зээлд хамрагдах хүсэлтэй бөгөөд дээрх шаардлагыг хангасан суралцагчид бүрдүүлсэн материалаа 2025 оны 08 дугаар сарын 31-ний өдөр хүртэл бүрэлдэхүүн сургуулийнхаа сургалтын албанд /Сургалтын менежер/ өөрийн биеэр хүлээлгэн өгөх зэрэг мэдээллийг ХААИС-ийн цахим хуудаст нийтэлсэн байна.
Сэтгэгдэл (1)