Замын хөдөлгөөний аюулгүй байдлын тухай хуулийн шинэчилсэн найруулгын төслийг энэ удаагийн УИХ-ын хаврын чуулганаар хэлэлцэхээр болсон. Тус хуулийн төсөлд замын хөдөлгөөнд оролцож буй явган зорчигч, жолооч нарт хүлээлгэх торгуулийн хэмжээг нэлээд өндөр тогтоож өгчээ.

Одоо мөрдөгдөж буй хуулинд 1000-10.000 төгрөг гэх байдлаар мөнгөний тоог зааж өгсөн бол шинэ хуулинд хөдөлмөрийн хөлсний доод хэмжээний хорин таван хувьтай тэнцэх төгрөгөөр торгох, хуулийн этгээдийг хөдөлмөрийн хөлсний доод хэмжээтэй тэнцэх төгрөгөөр торгох гэх зэргээр торгуулийн хэмжээг тогтоож өгчээ.

Өөрөөр хэлбэл энэ нь хөдөлмөрийн хөлсний доод хэмжээ ихсэх тусам торгуулийн мөнгөн дүн нэмэгдэж байгаагаараа онцлог юм байна. Эдгээр зүйл заалтуудыг сийрүүлэн хүргэе.

Энэ хуулиар замын хөдөлгөөнд оролцохдоо гар утас хэрэглэхийг хориглосон заалтыг оруулжээ. Тухайлбал тээврийн хэрэгсэл жолоодох үедээ хөдөлгөөнт утас хэрэглэсэн бол хөдөлмөрийн хөлсний доод хэмжээний таван хувьтай тэнцэх төгрөгөөр торгох шийтгэл оногдуулахаар төсөлд оруулсан байна.

Харин замын хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хэрэгсэл жолоодсон бол хөдөлмөрийн хөлсний доод хэмжээний хорин таван хувьтай тэнцэх төгрөгөөр торгох шийтгэл хүлээлгэнэ. Харин дээрх этгээдэд жолоогоо шилжүүлсэн бол хөдөлмөрийн хөлсний доод хэмжээний арван хувьтай тэнцэх төгрөгөөр торгох шийтгэл хүлээлгэнэ хэмээн заажээ.

Согтууруугаар тээврийн хэрэгсэл жолоодсон, эсхүл мансууруулах бодис, сэтгэцэд нөлөөлөх эм, бэлдмэл хэрэглэсэн эсэхийг зохих журмын дагуу шалгуулахаас зайлсхийсэн этгээд тээврийн хэрэгсэл жолоодсон бол хөдөлмөрийн хөлсний доод хэмжээг хоёр дахин нэмэгдүүлсэнтэй тэнцэх төгрөгөөр торгож, жолоодох эрхийг зургаан сараас хоёр жил хүртэл хугацаагаар хасна гэж хуулийн төсөлд заажээ. Харин тээврийн хэрэгслийн жолоог шилжүүлсэн бол хөдөлмөрийн хөлсний доод хэмжээний тавин хувьтай тэнцэх төгрөгөөр торгох шийтгэл хүлээлгэнэ.

Тээврийн хэрэгсэл жолоодох эрхгүй буюу эрхээ хасуулсан этгээд тээврийн хэрэгсэл жолоодсон бол хөдөлмөрийн хөлсний доод хэмжээг хоёроос дөрөв дахин нэмэгдүүлсэнтэй тэнцэх хэмжээний төгрөгөөр торгож, долоо хоногоос гуч хоног хүртэл хугацаагаар баривчлах шийтгэл хүлээлгэх аж. Мөн энэ зөрчлийг давтан үйлдсэн бол 30 хоногийн хугацаатай баривчлах, тээврийн хэрэгсэл жолоодох эрхийг гурван жилийн хугацаагаар хасах шийтгэл хүлээлгэнэ гэсэн хуулийн төслийг өргөн барьжээ.

Түүнчлэн жолооч эсрэг урсгал сөрсөн бол хөдөлмөрийн хөлсний доод хэмжээний тавин хувьтай тэнцэх төгрөгөөр торгож, тээврийн хэрэгсэл жолоодох эрхийг зургаан сараас нэг жил хүртэл хугацаагаар хасах шийтгэл хүлээлгэнэ хэмээн заасан байна. Түүнчлэн бичиг баримтгүй жолоо барьвал 48 мянган төгрөгөөр торгох аж. Тодруулбал тээврийн хэрэгслийн жолооч баримт бичиггүй этгээдэд тээврийн хэрэгслийг шилжүүлсэн бол хөдөлмөрийн хөлсний доод хэмжээний арван хувьтай тэнцэх төгрөгөөр торгох шийтгэл хүлээлгэнэ гэх зэрэг жолоочийн хариуцлагатай холбоотой асуудлыг нэлээд тусгаж өгчээ. Харин Замын хөдөлгөөний дүрэмд зааснаар тээврийн хэрэгслийн жолооч болон зорчигч хамгаалах бүс хэрэглээгүй бол хөдөлмөрийн хөлсний доод хэмжээний таван хувьтай тэнцэх төгрөгөөр торгох шийтгэл хүлээлгэх юм байна. Харин гарцгүй газраар гарсан явган зорчигчийг 19200 төгрөгөөр торгоно гэж заажээ.

Харин манай улсад тэр бүр хэрэгжээд байдаггүй явган зорчигчийн тухай ч хуульд тусгажээ. Гарцгүй газраар гарсан явган зорчигчийг 19200 төгрөгөөр торгоно. Тодруулбал явган зорчигч замын хөдөлгөөний дүрэм зөрчсөн бол хөдөлмөрийн хөлсний доод хэмжээний арван хувьтай тэнцэх төгрөгөөр торгох шийтгэл хүлээлгэнэ гэжээ. Харин явган зорчигч согтуугаар Замын хөдөлгөөний дүрэм зөрчсөн бол 48 мянган төгрөгөөр торгох аж