УИХ-ын чуулганаар улсын дээд шүүгчид нэр дэвшигчдийн асуудлыг хэлэлцлээ.

Шүүхийн ерөнхий зөвлөл Улсын дээд шүүхийн шүүгчийн сул орон тоонд сонгон шалгаруулалт зохион байгуулж, Г.Алтанчимэг, П.Золзаяа, П.Соёл-Эрдэнэ, Ч.Хосбаяр нарыг Улсын дээд шүүхийн шүүгчийн албан тушаалд томилуулах тухай саналыг УИХ-д танилцуулж,  Ерөнхийлөгчид өргөн мэдүүлэхээр шийдвэрлэсэн байна.

Энэ үеэр гишүүд нэр дэвшигчдээс асуулт асуусан юм. Тухайлбал, УИХ-ын гишүүн З.Баянсэлэнгэ, нийгэмд шүүхийн нэр хүнд унасан, хүн бүр хууль шүүхийн өмнө тэгш эрхтэй гэдэгт эргэлзэж эхэлсэн хэмээлээ. Тэрбээр, хүний эрхийг хангахын тулд хууль үйлчилдэг байтал хүнийг удаан хугацаагаар хорьдог, мөрдөж мөшгөдөг явдал хэрээс хэтэрлээ гээд хүний эрхийг хангах тал дээр хэрхэн ажиллаж байна вэ гэж лавласан.

Шүүхийн ерөнхий зөвлөлийн дарга Н.Лүндэндорж, шүүгчдийн нэр хүнд сайнгүй байгааг хүлээн зөвшөөрөөд энэ нь ч шүүхийн шинэтгэлийн хөтөлбөрийг боловсруулж хэрэгжүүлэх нэг шаардлага нь болсон гэж хэлсэн. Гэхдээ шүүхийн шинэтгэлийн хөтөлбөрийг хэрэгжүүлж эхэлснээр шүүгчдийн нэр хүнд эргэж дээшлэх сэргэх хандлага ажиглагдаж байгаа хэмээсэн.

Цалин мөнгө, шударга ёсыг тогтоох уу гэж УИХ-ын гишүүн Г.Уянга нэр дэвшигчдээс асуулаа.

Харин нэр дэвшигчид түүний асуултад хариулахдаа шүүгчид ямар ч тохиолдолд хуульд захирагдаж шударга ажиллах ёстой гээд шүүгч өөр ажил эрхэлж болдоггүй, харилцах харилцаа, хүрээ хязгаарлагдмал байдаг болохоор олон улсын жишгээр шүүгчдийн цалинг тогтоодог хэмээгээд энэ нь ар гэртээ санаа зовохгүй, сэтгэл хуваагдахгүй ажиллахад нөлөөлдөг чухал нөхцөл юм гэж хариулсан.

Мөн УИХ-ын гишүүн Д.Тэрбишдагва “Оруулж ирж байгаа албан тушаалтнууд Монголд шударга ёсыг тогтооё гэж байгаа юм бол нэг бүрчлэн чихнээс нь чангааж, ажиллах хэрэгтэй байна. Шүүхийн Мэргэжлийн хорооноос хамгийн өндөр оноог Данзан, Өлзийсайхан, Сүнжид,  Эрдэнбулган гэсэн хүн авсан байхад тэдний асуудал яригдахгүй байна. Ийм байхад Шүүхийн Мэргэжлийн хороод хуралдаад яах юм. Шүүгч нарын цалинг өндөр баталсан, гэтэл энэ нэр дэвшигчид дунд “Монгол Улсад хэлмэгдүүлэлтийг таслан зогсоохын төлөө шударга ажиллана гэж ярих хүн нэг ч алга” гэсэн юм.

Шүүхийн ерөнхий зөвлөлийн дарга Н.Лүндэндорж “Шүүгчдийн ёс зүйн төлөвшлийг  тууштай байх, нийгмийн мэдрэмж зэрэг олон шалгуураар сонгон шалгаруулдаг. Мөн хуульчдаас шүүгчдийг шилж олохыг чухалчилдаг. Олон шалгуураар шүүсний үндсэн дээр Шүүхийн ерөнхий зөвлөлийн гишүүд шалгаруулсан” гэсэн. Харин УИХ-ын гишүүн Г.Уянга цалин мөнгө, шударга ёсыг тогтоох уу гэж нэр дэвшигчдээс асуусан.  Шүүгчид ямар ч тохиолдолд хуульд захирагдаж шударга ажиллах ёстой гээд шүүгч өөр ажил эрхэлж болдоггүй, харилцах харилцаа, хүрээ хязгаарлагдмал байдаг болохоор олон улсын жишгээр шүүгчдийн цалинг тогтоодог хэмээгээд энэ нь ар гэртээ санаа зовохгүй, сэтгэл хуваагдахгүй ажиллахад нөлөөлдөг чухал нөхцөл юм гэж нэр дэвшигчид хариуллаа.

Гишүүд нэр дэвшигчидтэй холбоотой асуудлаар асуулт тавьж дууссаны дараа тэднийг танилцуулсан тухай УИХ-аас Ерөнхийлөгчид бичгээр мэдээлэхээр болов.

Т.Энхэлээ