Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх нар давж заалдах шатны шүүхийн шийдвэрийг эсэргүүцэж Улсын дээд шүүхэд хандсан. Шүүх хурал өнгөрсөн долоо хоногийн сүүлээр болно гэх мэдээлэл байсан ч Улсын дээд шүүхээс шүүх хуралдааныг товлоогүйн улмаас 14 хоногоос хойшилсон.

Уг нь хэргийг хяналтын шатны шүүх 2016 оны нэгдүгээр сарын 26-ны өдөр хүлээн авсан. Эрүүгийн байцаан шийтгэх хуулийн 346.2-т "Шүүх хэргийг хүлээн авснаас хойш 30 хоногийн дотор хянан шийдвэрлэх ба хэргийн ээдрээ түвэгтэй байдлыг харгалзан энэ хугацааг Танхимын тэргүүн шүүгч 14 хүртэл хоногийн хугацаагаар сунгаж болно" гэсэн байдаг. Тэгэхээр хэргийг хяналтын шатаар хэлэлцэх хугацаа хоёрдугаар сарын 25-нд дууссан гэсэн үг. Үүнээс хойш 14 хоногоор хугацааг сунгасан гэхээр өнгөрсөн 7 хоногт шүүх хурал болохоор байжээ. Гэтэл товыг гаргаагүйн улмаас шүүх хурал хойшилсон юм. Эцсийн байдлаар гуравдугаар сарын 10-ны дотор шүүх хуралдааны тов тодорхой болох ёстой. Гэтэл хэрэг хэлэлцэх хугацаа өнгөрчихөөд байхад шүүх хуралдааны товоо товлоогүй байж дахин 14 хоногоор сунгачихсан нь УДШ-ийг хууль зөрчсөн гэж дүгнэхэд хүргэж байгаа талаар олон нийт ярьж байна.  УДШ ийм шийдвэр гаргаж байсан тохиолдол ховор хэмээн шүүгдэгч Л.Гансүхийн өмгөөлөгч Ц.Баасандорж хэлжээ.

Өмгөөлөгч Ц.Баасандорж энэ талаар “Уг нь дээд шүүх ямар ч тохиолдолд хуулиа барьж ажиллах ёстой. Л.Гансүх өөрийн биеэр Улсын Дээд шүүхийн шүүх хуралдаанд оролцох, олон нийтийн хэвлэл мэдээллийн хэрэгслээр шүүх хуралдааныг шууд дамжуулах боломжоор хангах хүсэлтээ УДШ-д хүргүүлсэн. Гэвч шүүх хуралдааны тов зарлагдаагүй байхад дахиад хойшлогдчихлоо. Ямар ашиг сонирхол нуугдаж байгаа нь сонин байна. Цаашид ямар арга хэмжээ авах вэ гэдгийг бусад өмгөөлөгчидтэй ярилцаж байгаад шийдэнэ. Тийм. Улсын Дээд шүүхийн шүүх ажиллагаанд шүүгдэгчийг оролцуулдаггүй. Энэ нь Үндсэн хууль зөрчсөн жишээ юм. Тиймээс Л.Гансүх шүүх хуралд оролцох хүсэлтээ илэрхийлсэн” гэв.

“Нүүрс” хөтөлбөрийг хэрэгжүүлэх явцдаа улсад онц их хэмжээний хохирол учруулсан гэх үндэслэлээр Л.Гансүх нарт шүүхээс 4.6 жилийн хорих ял оноосон. Анхан болон давж заалдах шатны шүүхээс гаргасан дээрх шийдвэрийг яллагдагч талаас эсэргүүцэн Улсын Дээд шүүхэд хандсан юм.

Т.Энхэлээ