Цагдаагийн генерал, хурандаа нар 7-р сарын нэгний үймээний үеэр албан үүрэгтээ хариуцлага алдаж жирийн цагдаа сум галт зэвсэг хэрэглэх нөхцөл үүссэнийг шүүх батлалаа. Шүүхээс Цагдаагийн Ерөнхий газрын даргын үүрэг гүйцэтгэгч байсан, хошууч генерал Ч.Амарболд, Эргүүл хамгаалалтын газрын даргаар ажиллаж байсан, цагдаагийн хурандаа Ш.Батсүх нарт 6.6 жилийн, Нийслэлийн цагдаагийн газрын дарга асан, цагдаагийн хурандаа О.Зоригтод 5.6 жилийн, Хэв журмын хэлтсийн дарга асан, цагдаагийн дэд хурандаа Г.Ганбаатарт 2 жилийн ялыг тус тус оноож, Өршөөлийн хуульд хамруулснаар тэдэнд ноогдсон ялын хэмжээг 2.6-3.6 жил хүртэл бууруулж, жирийн дэглэмтэй хориход ялыг эдүүлэхээр шийдвэрлэсэн. Хэв журмын хэлтсийн дарга асан, цагдаагийн дэд хурандаа Г.Ганбаатар өршөөлөөр ял эдлэх шаардлагагүй болсон.
Шүүх ийм шийдвэр гаргасанаар цагдан хоригдож байгаа жирийн цагдаа нарын хувьд хууль эрх зүйн нөхцөл байдал эрс нааштайгаар өөрчлөгдөхөөр байна. Дарга нар нь гэм буруутай болохыг шүүх тогтоолоо. Дайны талбарт командлагч алдаа гаргавал цус урсдаг нь цэрэг армид бичигдээгүй хууль байдаг. Хүн буудсан хэргээр цагдан хоригдож байгаа жирийн 7-8 цагдааг яллах биш одоо хэргийн зүйчлэлийг эргэж харах, эрх зүйн орчин бий боллоо. Харин тэд хэн хэний тушаалаар байлдааны галт зэвсэг хэрэглэснийг шүүхийн өмнө хэлэх нь гэмт хэргийн гэм бурууг олж тогтооход ач тустай болох нь гарцаагүй.
Генерал Ч.Амарболд Онц байдлын шуурхай ажлын штабын командлал дор шууд үүрэг гүйцэтгэсэн дээд тушаалын офицер. Дээд тушаалтны үүргийг тушаал авсан цэрэг,офицер, хурандаа, генерал хэнч гэсэн буруу ч байсан үг дуугүй биелүүлэх үүрэгтэй. Хариуцлагыг тушаал биелүүлсэн офицер,цэргүүд хүлээдэггүй. Тушаал өгсөн дарга нь хүлээдэг. Цэргийн ёсоор генерал Ч.Амарболд биш Онцгой байдлын Шуурхай ажлын хэсгийн штабын даргаар үүрэг гүйцэтгэж байсан ХЗДХ-ийн сайд асан УИХ-ын гишүүн Ц.Мөнх-Оргил хариуцлагыг шууд хүлээх учиртай. Генерал Ч.Амарболдын байр суурь ингэж харагдсан бол ёстой цэргийн хүн, генералын ноён нуруутай гэж мөн ч их хүндлэл хүлээх байлаа. Харамсалтай нь тэгсэнгүй. Цэргийн хүн биш энгийн иргэн болох гэж, нэр төрөө баахан сэвтээж, эцэст нь шүүхээс ял сонслоо. “Долоон сарын нэгэн” ингэж цагдаагаар дуусах биш сонгуулийн луйвраар засгийн эрхэнд гарсан Ардын намтай хариуцлага тооцсон бол шударга ёсонд нийцэх байлаа.
Энэ хэрэг ингээд дуусахгүй. Хэзээ нэг цагт жинхэнэ тушаал өгсөн албан тушаалтан ялаа хүлээх цаг ирнэ гэж иргэд хүлээж байна.Л.Цэрэн-Очир
