Энэ сарын 11-ний өдөр "Шинэ төмөр зам" болон Сайншандын аж үйлдвэрийн парктай холбогдуулан Баянгол зочид буудалд байрлах "Түмэн хишигтэн", "Баялгийн хувь" хоёр компанид Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсээс санхүүгийн шалгалт хийсэн. Ингэхдээ тусгай албаныхныг шалгалтын ажиллагаанд оролцуулсан нь өнөөдрийг хүртэл хэл ам дагуулсаар байгаа. Нөгөөтэйгүүр эл асуудлыг улс төржүүлэх хандлага их гарч байгаа юм. Тэгвэл дөнгөж сая Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн дарга, цагдаагийн хошууч Б.Оргил, Тусгай ажиллагааны газрын дарга, цагдаагийн хуранлаа Б.Алтанбагана, ЦЕГ-ын хэвлэл мэдээллийн төвийн дарга, цагдаагийн дэд хурандаа Б.Баатархүү нар цаг үеийн асуудлаар мэдээлэл хийлээ.

Б.Оргил: Сайншанд, төмөр замын хэргийг шалгах явцад залилан мэхлэхээс гадна хууль бус үйл ажиллагаанууд илэрсэн

Шалгалтын ажиллагааны талаар мөрдөн байцаагч Б.Оргилын мэдээлж буйгаар "Төмөр замын хэрэгт УЕПГ-ын тушаалаар УЕПГ, АТГ-ын хамтарсан ажлын хэсэг гарч ажиллаж байгаа. Гашуун сухайт -Ухаа худаг чиглэлийн 267 км төмөр замын төслийг "Монголын төмөр зам" ТӨХК-д концессийн гэрээгээр хэрэгжүүлэх эрхийг олгосон байдаг. Энэ хугацаанд ЗТЯ болон "МТЗ" ТӨХК-ийн албан тушаалтнууд Монгол Улсын холбогдох хууль тогтоомжийг зөрчиж Ерөнхий гүйцэтгэгчээр БНСУ-ын хөрөнгө оруулалттай нэр бүхий компанид хууль бусаар эрхийг олгосон байгаа юм. БНСУ-ын компани уг төслийн ерөнхий гүйцэтгэгчээр ажиллахдаа Монгол Улсад гэрээгээр халхавчилж хуурамч бичиг баримт үйлдэж, залилан мэхэлж 20 гаруй сая ам.долларын хохирол учруулсан хэрэг шалгагдаад явж байна. Засгийн газраас 2013 оны гуравдугаар сард 76-р тогтоолоор Сайншанд аж үйлдвэрийн цогцолборын бүтээн байгуулалтыг эхлүүлэхэд шаардагдах 14.1 тэрбумыг шийдэж өгсөн байдаг. Дээрх мөнгийг тухайн үеийн Үйлдвэр хөдөө аж ахуйн яамны эрх бүхий албан тушаалтнууд хууль бусаар зарцуулсан, мөн онц их хэмжээний хохирол учруулсан хуурамч гүйцэтгэл гаргаж залилан мэхэлсэн асуудал манай хэлтэст шалгагдаж байгаа. Дээр дурдсан хэргүүдийн санхүүжилтийг шалгах явцад зарим аж ахуй нэгж, төрийн өндөр албан тушаалтнуудын туслахаар ажиллаж байсан иргэдийг шалгах зайлшгүй шаардлага гарсан. Эдгээр аж ахуй нэгжүүдийн захирал, нягтлан бодогч болон бусад иргэдийн нэрээр эх үүсвэр нь тодорхойгүй 10 тэрбум төгрөгний гүйлгээ хийгдсэн байдаг. Мөн дээр дурьдагдсан төслүүдэд УИХ-ын гишүүний туслахаар ажиллаж байсан иргэд хууль бус шийдвэр гарахад нөлөөлсөн, мөн шийдвэр гарахад нөлөөлөх албан тушаалд ажиллаж байсан байдаг.

Шалгалтын ажиллагааны хүрээнд Баянгол зочид буудлын оффисын өрөөг түрээсэлж байсан "Баялгийн хувь", "Түмэнхишигтэн" гэх аж ахуй нэгжүүдэд нэгжлэгийн ажиллагааг прокурорын зохих зөвшөөрлийн дагуу явагдсан.  Нэр дурдагдсан хоёр компанид УИХ-ын гишүүн Х.Баттулга хувь эзэмшдэг болох нь тогтоогдоогүй" гэсэн юм.

Б.Баатархүү: Хуурамч мэдээлэл тараасан нэр бүхий хүмүүсийг шалгаж эхэлсэн

Энэ үеэр Цагдаагийн ерөнхий газрын хэвлэл мэдээллийн албаны дарга Б.Баатархүү "Баянгол зочид буудлын байранд түрээсээр үйл ажиллагаа явуулдаг "Баялгийн хувь", "Түмэн хишигтэн" компаниудын байранд прокурорын зөвшөөрөлтэй нэгжлэг хийх үйл ажиллагааг энэ сарын 11-нд зохион байгуулсан. Үүнтэй холбоотойгоор олон нийтийн дунд ташаа мэдээлэл гарсан. Мөрдөн байцаагч нар тухайн компаниудын удирдлагуудад прокрорын зөвшөөрлийг танилцуулж, мөрдөн байцаалтын үйл ажиллагаанд саад учруулахгүй нэгжлэг хийлгэх тухай дээрх байгууллагын удирдлага, албан тушаалтан, өмгөөлөгчдөд нь мэдэгдсэн. Гэвч тэдгээр хүмүүс нэгжлэг хийх нөхцлөөр хангаж өгөөгүй. Мөрдөн байцаалтын ажиллагаанд саад учруулсан. Энэ бүхэн тодорхой бичлэг, баримтуудаар нотлогдоно. Үүнтэй холбогдуулаад тухайн мөрдөн шалгах ажиллагаа, нэгжлэг хийх үйл ажиллагааг явуулж байгаа алба хаагчдын аюулгүй байдлын хангах, нөхцлийг бүрдүүлэх замаар Тусгай ажиллагааны газрын долоон алба хаагч, хэв журам хамгаалах албаны гурван алба хаагчийг тухайн байрны хамгаалалтанд ажиллуулсан. Тусгай ажиллагааны газрын үйл ажиллагааны журам, дүрэм гэж бий. Үүнд гэмт хэрэгтэй тэмцэх, олон нийтийн аюулгүй байдлыг хангах, үйл ажиллагаанд дэмжлэг үзүүлэх, гэмт хэрэгтэй тэмцэх, хэрэг бүртгэх мөрдөн байцаах ажиллагаанд оролцох, тодорхой албан тушаалтны аюулгүй байдлыг хангах чиглэлээр хамгаалалтанд ажиллах зэрэг нь чиг үүрэгт нь байдаг. Тухайн үед тусгай ажиллагааны алба хаагчид ямар нэгэн дүрэм журам зөрчөөгүй. Холбогдох эрхзүйн орчных нь хүрээнд нэгжлэгийн үйл ажиллгааг саадгүй явуулах үүднээс оролцуулсан байгаа. Гэтэл шалгалт явуулж байхад хүмүүс зохион байгуулалтайгаар дуудах, гадна нь УИХ-ын гишүүнийг баривчлах гэж байна, 500 цагдаа нэмэлтээр ирнэ гэх мэт ташаа мэдээлэл олон нийтэд түгээж мөрдөн байцаах үйл ажиллагаанд санаатайгаар саад хийсэн.  Тиймээс хуурамч мэдээлэл тараасан нэр бүхий хүмүүсийг хууль тогтоомжийн дагуу шалгах ажлыг эхлүүлж байгаа" гэлээ.

Б.Алтанбагана: Тусгай ажиллагааныхан оролцсоноор шалгалтын ажиллагаа амжилттай болсон

Тусгай ажиллагааны газрын дарга, цагдаагийн хурандаа Б.Алтанбагана "Тусгай ажиллагааны газрын дэмжлэг үзүүлэх зайлшгүй шаардлага тулгарсан учраас тусгай ажиллагаа явуулах дүрмийн дагуу үүрэг гүйцэтгэсэн. Хуулийн дагуу үүрэг гүйцэтгэсэн. Цагдаагийн байгууллага болон бусад албадад дэмжлэг үзүүлэх гэдэг үүднээс үүргээ хэвийн гүйцэтгэсэн. Дэмжлэг үзүүлэн ажилласан долоон алба хаагчийн хувьд ямарваа нэг өдөөн хатгалга хийгээгүй. Ямар учраас тусгай ажиллагааны газрын алба хаагчид үүрэг гүйцэтгэсэн гэхээр, тэнд үүрэг гүйцэтгэж байгаа хэрэг бүртгэгч мөрдөн байцаагч, алба хаагчдын аюулгүй байдлыг хангах, мөн тэнд зорчиж байгаа энгийн иргэдийн аюулгүй байдлыг хангах үндсэн чиг үүрэгтэйгээр оролцсон. Энэ  үйл ажиллагаанд зарим өдөөн хатгалга, худал мэдээлэл их явж байна. Мэргэн буудагч ажиллуулсан, бөөнөөрөө очиж хүч түрэмгийлсэн зүйл байхгүй. Энэ мэтээр мэдээлж байгаа нь цагдаагийн байгууллагын нэр хүндэд халдах гэсэн үйл явдал болж байна. Тусгай ажиллагааны дүрмийн 3.1.2-т заасны дагуу цагдаагийн байгууллагын хэрэг шалгах ажиллагаандзэвсгийн чанартай мэс ашигласан, орчин тойронд үймээн самуун дэгдээх гэж оролдсон, биеийн хүч алдар хүндээрээ алба хаагчдын хууль ёсны шаардлагыг эсэргүүцсэн тохиолдол бүрт цагдаагийн болон хууль сахиулах бусад байгууллагын хүсэлтээр ЦЕГ-ын даргын тушаалын дагуу үүргээ гүйцэтгэдэг. Дашрамад хэлэхэд, Цагдаагийн тусгай ажиллагааны газар очсон газар бүртээ зэвсэг хэрэглэж, хүчний үйл ажиллагаа явуулдаг гэж ойлгож болохгүй. Урьдчилсан сэргийлэх, үүрэг гүйцэтгэж байгаа цагдаагийн алба хаагчдын амь нас эрүүл мэндийн хамгаалах хуулиар олгосон үүрэгтэй" гэсэн

Ж.Цэцэн: Цагдаагийн байгууллага анх ирэхдээ л тусгай ажиллагааныхантай ирсэн

Тэгвэл хэвлэлийн хурлын үеэр УИХ-ын гишүүн Х.Баттулгын хэвлэлийн төлөөлөгч Ж.Цэсэн ирсэн байлаа. Тэрбээр "Цагдаагийн байгууллагынхан өөрсдөө ингэж худал мэдээлэл өгч болохгүй. Нэгжлэг эхлэхээс л би Баянгол зочид буудалд байсан. Цагдаагийн байгууллагынхны өөдөөс байгууллагынхан ямар ч эсэргүүцэл үзүүлээгүй. Цагдаагийн байгууллагынхан анх ирж, прокурорын зөвшөөрөл танилцуулахдаа л тусгай ажиллагааны албаныхантай ирсэн" гэсэн юм.