“Монголын Усан спорт сонирхогчдын холбоо”-ны 2006 оны 6 дугаар сарын 9-ний өдрийн ээлжит Их хуралд багш дасгалжуулагч, тамирчид, усан спортыг дэмжигч байгуулагуудын төлөөлөл зэрэг 53 хүн мандатаар оролцож МУССХ-ны шинэ дүрмийг хэлэлцэн батлаж, дүрмийн дагуу тухайн үеийн Их хурлын гишүүн, Засгийн газрын гишүүн Ч.Улааныг холбооны Ерөнхийлөгч бөгөөд Удирдах зөвлөлийн тэргүүнээр, нэр бүхий 11 хүнийг Удирдах зөвлөлийн тэргүүлэгчээр тус тус сонгон баталжээ.

Шинэ дүрмийн дагуу 4 жил тутамд Их хурлаа хийж МУССХ-ны Удирдах зөвлөлийн буюу Ерөнхий нарийн бичгийн даргын ажлын тайланг хэлэлцэн шинээр Удирдах зөвлөл болон түүний тэргүүн, ЕНБД-ын сонгон батлах энгийн дүрэм одоог хүртэл хүчинтэй үйлчилж байгаа болно. Гэтэл 2010 оны эхээр ээлжит Их хурлыг хуралдуулалгүй МУССХ-ны дэд ерөнхийлөгчийн санаачлагаар ЕНБДарга Г.Баясгалангийн ажлыг Холбооны дүрмийг бүдүүлгээр зөрчин тэргүүлэгч Х.Энхмандахад шилжүүлэн өгсөн байна.

Ерөнхий нарийн бичгийн дарга Х.Энхмандах нь улмаар Холбооны дүрмийн дагуу их хурлыг одоог хүртэл зохион байгуулж ажлын тайлангаа хэлэлцүүлэхгүй МУССХ-ны нэрийг ашиглан хувийнхаа эрх ашгийн төлөө өнөөдрийн энэхүү багш, дасгалжуулагч, тамирчдын хооронд үл ойлголцлыг бий болгож усан спортыг дэмжигч байгууллага, эцэг эхчүүдийг талцуулсан үйл ажиллагаа явуулж ирсэн болно.

Хамгийн инээдэмтэй бөгөөд эмгэнэлтэй нь 2016 оны 4-р сарын 27-ны лхавга гаригийн “Өдрийн сонин”-ы 099 дугаарт хэвлэгдсэн “Монголын чөлөөт бөхийн холбооны удирдлага бичиг баримтыг хуурамчаар үйлджээ” нийтлэлд дурдагдсан бүхий л үйлдлийг нэг бүрчлэн гүйцэтгэсэн байгаа нь тэдэнд Х.Энхмандах өөрийн шинэ санаачлагаа хуваалцсан мэт байгаа юм.

Тухайлбал, тэрбээр 2006 оны 6 дугаар сарын 9-ний өдрийн холбооны Хоёрдугаар Их хурлын огноотой давхардуулан өөр нэг огт хуралдаагүй хурлын тэмдэглэлийг хуурамчаар үйлдэж “Монголын Усан Спорт Сонирхогчдын Холбоо-ТББ” хэмээх байгууллагыг 2010 онд байгуулж Улсын бүтгэлийн ерөнхий газар бүртгүүлж шинээр гэрчилгээ авчээ.

Х.Энхмандах нь хууль бус тэмдэглэлээ үндэслэн “Монголын Усан Спорт Сонирхогчдын Холбоо-ТББ” дүрмийг батлах, 1 үүсгэн байгуулагчтайгаар Удирдах Зөвлөлийг 5 гишүүнтэй байх шийдвэр гаргажээ. Хуурамч хурлын тэмдэглэл, бичиг баримтдаа МУССХ-ны тэргүүлэгч гишүүн Р.Бадрах, Г.Баясгалан, Ш.Дөрвөнжин нарын гарын үсгийг мөн дуурайлган хуурамчаар зурж ашигласан явдал нь Эрүүгийн хэргийн тусгай ангид заасан гэмт хэрэгт тооцогдож болох ноцтой асуудал юм. /Өдрийн сонины нийтлэлийг бүрэн эхээр нь анхааралтай уншихад түүний үйлдэл бүр нь адилхан болно/

Иймээс холбооны Ерөнхийлөгч Ч.Улаан бүрэн эрхийнхээ дагуу “Монголын Усан Спорт Сонирхогчдын Холбоо”-ны ээлжит хурлыг хуралдуулахтай холбогдуулан ЕНБДарга Х.Энхмандахыг үүрэгт ажлаас нь чөлөөлөх, ээлжит их хуралд бэлтгэх ажлын комиссыг шинээр томилох цагаа олсон зөв шийдвэрүүдийг гаргаж Х.Энхмандахад уг шийдвэр, тогтоолуудыг гарын үсэг зуруулж батлуулах, холбооны тамга, албан бланк, баримт бичгийн эх хувиуд зэргийг өөртөө хүлээлгэн өгөхийг даалгасан байна.

Гэвч Х.Энхмандах өнөөдрийг хүртэл ерөнхийлөгчийн өгсөн уг үүрэг, даалгаврыг биелүүлэхгүй байгаа нь мэргэжлийн багш, дасгалжуулагчид, тамирчид болон усан спорт сонирхогчдын зүгээс уг үйлдлийг холбооны цаашдын үйл ажиллагаа, нэр хүндэд сөргөөр нөлөөлнө хэмээн үзэж буй тул ээлжит МУССХ-ны их хурлаар ЕНБД-аар ажилласан хугацааныхаа тайлангаа тавьж хэлэлцүүлэн, шинээр сонгогдох ЕНБД-д үүрэгт ажлаа албан ёсоор нэр төртэй хүлээлгэн өгнө гэдэгт ТҮҮНД холбооны гишүүдийн зүгээс итгэж байна.