Улаанбаатараас Ховд чиглэлд зорчиж байсан “МИАТ” ХК-ийн онгоцны дугуй салж, нислэгийн зурвасаас гарсан хэрэг өчигдөр гарсан. Тэгвэл үүнтэй холбогдуулан Иргэний нисэхийн ерөнхий газраас мэдэгдэл гаргажээ.

Тус мэдэгдэлд “2016 оны тавдугаар сарын 03-ны өдрийн Ховд-Улаанбаатар чиглэлийн ОМ7056 дугаартай Боинг-737/800 агаарын хөлөг төлөвлөгөөт цагтаа хөөрөхөөр нислэгийн зурваст гүйлт хийх явцад хөөрөлтийн өмнөх гүйлтийн техникийн саатал гарсны улмаас нислэгийн аюулгүй ажиллагааг ханган, зогсоосон болно. Зорчигчдын аюулгүй байдлыг хангах үүднээс тус чиглэлд өөр хоёр онгоц нэмэлтээр гарган, тээвэрлэж, Улаанбаатар авч ирлээ. Эхний нислэг үүрээр 05.48 цагт газардсан бол сүүлийн нислэг өнөө өглөө 08.39 цагт Улаанбаатарт буугаад байна” гэжээ.

Мөн “МИАТ” ХК энэ талаар цахим хуудастаа мэдээлсэн байна. Ингэхдээ “2016 оны тавдугаар сарын 3-ны өдрийн Ховд-Улаанбаатар чиглэлийн ОМ7056 дугаар аялал саатсантай холбогдуулан зорчигчдыг Улаанбаатар хотод “Аэромонголиа” ХХК-ийн агаарын хөлгөөр тээвэрлэн ирүүлэх ажлыг шуурхай зохион байгууллаа. Эхний 47 зорчигчид тавдугаар сарын 4 буюу өнөө өглөө 5:45 цагт, дараагийн 48 зорчигч 8:39 цагт Улаанбаатар хотод ирсэн байна” гэжээ. 

Түүнчлэн Ховдоос Улаанбаатарыг зорих гэж байсан МИАТ ХК-ийн ОМ7056 онгоцны аяллын талаар МИАТ-аас “Зууны мэдээ” сонины Үндэсний мэдээллийн төвд өнөөдөр 10.30 цагт шуурхай хурал зарласан юм. Бид энэ талаар удахгүй мэдээлэх болно.