Сонгуулийн сурталчилгаа эхлээд долоо хонож байна. Энэ өдрүүдэд иргэдийн анхаарал өөр зүйлд хандахтай зэрэгцэн зарим хууль хүчний байгууллагад халаа, сэлгээг хийх гэж оролдлоо. Тодруулбал, Увс аймгийн Цагдаагийн газрын дарга, цагдаагийн хурандаа Д.Бадамрагчааг үүрэгт ажлаас нь чөлөөлсөн ч  удалгүй эгүүлэн ажилд нь томилов. Учир нь Д.Бадамрагчаад өөртнь урьдчилан мэдэгдэлгүй, ажлын үр дүнг нь удирдлагын зөвлөлөөр хэлэлцүүлэхгүйгээр үүрэгт ажлаас нь чөлөөлсөн нь тогтоогдсон байна. Тиймээс Хууль зүйн сайд  түүнийг ажлаас нь чөлөөлөх тушаалыг хүчингүй болгожээ.

Хууль зөрчин байж Х.Бадамрагчааг албан тушаалаас нь чөлөөлөх гэж оролдсон нь ямар учиртайг олон нийт сонирхож байна. Зарим хүмүүсийн мэдээлж буйгаар Увсын цагдаагийн газарт улс төрийн нөлөөг оруулах гэж байсан гэх.   Сонгуулийн санал хураалт болохоос өмнө тус байгууллагын удирдлагыг өөрчилсөн нь ингэж хардахаас өөр аргагүйд хүргэж байж мэдэх юм. Бүр тодруулбал, УИХ-ын гишүүн Н.Алтанхуягийг улс төрөөс шахах төлөвлөгөөг явуулсан ч бүтэлгүйтлээ гэж хардах хүмүүс байгаа юм. УИХ-ын гишүүн Н.Алтанхуягийг сонгуульд ялуулахгүй байх сонирхолтой хүмүүс Ардчилсан нам, Монгол Ардын намын аль алинд нь бий. Тиймдээ ч түүний нийслэлийн дүүрэгт нэр дэвших эрхийг нь хасч, тойргийн нь булаасан гэдэг. Харин Н.Алтанхуяг Сонгинохайрхан дүүргээс шахагдаж гарсан ч төрсөн нутаг Увсдаа нэр дэвшсэн юм. Гэтэл түүнийг Увсад ялуулахгүй байх ажиллагааг улс төрийн зарим бүлэглэл хийж эхэлсэн нь ийнхүү бүтэлгүйтсэн байх магадлалтай байна. Өмнө нь санал өгөх, хураахтай холбоотой асуудлыг Сонгуулийн Ерөнхий хороо дангаараа шийдвэрлэж шүүхээс эцэслэн тогтоодог байсан. Харин шинээр баталсан хуулиар сонгуулийн төв байгууллага бус цагдаагийн газраас хянасныг шүүхээс эцэслэн дэнслэхээр болсон.

Тиймээс Увс аймгийн Цагдаагийн газрыг даргыг сонгуулийн өмнө үүрэгт ажлаас нь чөлөөлсөн нь сонгуультай холбоотой маргаанд улс төрийн нөлөөг оруулах гэсэн зорилготой нь холбоотой байж мэдэх юм. Өөрөөр хэлбэл, Увс аймгийн Цагдаагийн газрын шинэ даргаар очих хүн улс төрийн нөлөөлөлөөр томилогдох магадлалтай байсан юм. Тэгсэн тохиолдолд өөрийг нь томилсон улс төрчийн талд л ажиллах нь тодорхой. Тэгэхээр нэр дэвшигчтэй холбоотой маргаан цагдаагийн байгууллагад очсон тохиолдолд гадны нөлөө орох магадлал өндөр байсан гэсэн үг. Хууль хүчний байгууллагыг ашиглаж өрсөлдөгчөө намнах гэсэн увайгүй оролдлого уг сонгуулиар бүү гараасай хэмээн иргэд хүсч байна. Цаашилбал нам дотроо биенээ үгүйсгэх, хорлох ажлыг хийх нь эргээд намаараа сонгуульд ялагдах шалтаг ч болж мэднэ гэж улс төрийн хүрээнийхэн ярьж байна.

Т.Энхэлээ