БҮТ: ЭЕШ-ын сэдэв, даалгавар нь задрах нууцлал алдагдах боломжгүй, үүнд ЦЕГ, ТЕГ бүрэн хяналт тавьдаг

Элсэлтийн ерөнхий шалгалтын талаар “Боловсролын үнэлгээний төв”-өөс цахим ертөнцөөр гарч буй шалгалтын материал задарсан гэх мэдээлэлтэй холбогдуулан мэдэгдэл гаргасан билээ.

Тодруулбал, “Мэдэхгүй зүйлээ асуу” фэйсбүүкийн группэд англи хэл, монгол хэлний шалгалтын тестийг 500 000 төгрөгөөр зарна гэсэн мэдээлэл тарснаар худал, үнэн мэдэгдэхгүй цуу яриа дэгдээд байсан юм. Үүнтэй холбоотой асуудлаар  “Боловсролын үнэлгээний төв”-ийнхөн “Буруу ташаа, иргэдийг төөрөгдүүлсэн энэ мэдээлэл худал бөгөөд Цагдаагийн байгууллагатай хамтран хяналт хийсний дүнд хүүхдүүдийн сэтгэл зүйг ашиглан залилан хийж байсан нь тогтоогдсон" хэмээн мэдэгдэл гаргажээ.

Мөн ЭЕШ-ын сэдэв, даалгавар нь задрах нууцлал алдагдах боломжгүй бөгөөд тус ажлыг ЦЕГ, ТЕГ-тай хамтарч тэдний бүрэн хяналт, хамгаалалт дор зохион байгуулдаг тул нийт шалгуулагч, эцэг эхийг анхаарал болгоомжтой байж, эдийн засаг сэтгэл санаагаар хохирохгүй байхыг анхааруулсан юм.

БҮТ-ийн мэдэгдэл бүрэн эхээрээ

Их дээд сургүуль, коллежид элсэгчдээс авдаг Элсэлтийн ерөнхий шалгалтыг 2016 оны 06 дугаар сарын 15, 16, 18, 19 ны өдрүүдэд улс орон даяар нэгэн зэрэг зохион байгуулж байна. Эдгээр өдрүүдэд шалгалттай холбоотой буруу ташаа ойлголт төрүүлсэн, иргэдийг төөрөгдүүлсэн зарим мэдээлэл олон нийтийн дунд гараад байна.

Тухайлбал, шалгалтын материал задарсан худалдаж авч байна гэсэн мэдээлэл гарсны дагуу БҮТ-өөс холбогдох цагдаагийн байгууллагатай хамтарч хяналт шалгалт хийж энэ мэдээлэл нь худал бөгөөд зарим нэг ашиг хонжоо хайгч этгээдүүд хүүхдүүдийн сэтгэл зүйг ашиглаж амар хялбар аргаар ашиг, мөнгө олох зорилготой хууран мэхлэх, залилан хийж байсан нь тогтоогтоод холбогдох газраар шалгуулж байна.

ЭЕШ-ын сэдэв, даалгавар нь задрах нууцлал алдагдах боломжгүй бөгөөд тус ажлыг ЦЕГ, ТЕГ-тай хамтарч тэдний бүрэн хяналт, хамгаалалт дор зохион байгуулдаг. Иймд нийт шалгтулагч, зцэг эхчүүдэд анхааруулахад дээрх худал ташаа мэдээлэлд итгэж эдийн засаг болоод бие, сэтгэл санаагаар хохирохгүй байхыг сануулж шалгуулагчид зөвхөн өөрөө өөртөө итгэж мэдлэг чадвараа бодитой үнэлүүлж шалгалтандаа амжилттай дүн үзүүлэхийг хүсье.

Л.Ганбат: Шалгалтыг гар утасгүйгээр бүрэн камер хяналтын дор  битүүмжилдэг

Харин энэ талаар Боловсролын үнэлгээний төвийн элсэлтийн болон улсын шалгалт хариуцсан мэргэжилтэн Л.Ганбат “ЭЕШ-ын сэдэв, даалгавар нь задрах нууцлал алдагдах боломжгүйгээс гадна тус ажлыг ЦЕГ, ТЕГ-тай хамтран тэдний бүрэн хяналт, хамгаалалт дор зохион байгуулдаг. Материал задарсантай холбоотой 20 орчим хүнийг байцааж байгаа. Гар утасгүйгээр бүрэн камер хяналтын дор шалгалтыг битүүмжилдэг. Байцаагдаж буй хүмүүсийн талаар дэлгэрэнгүй мэдээлэл өгөх боломжгүй” гэв.

Х.Сайнбилэг: Шалгалтын бүх хариу таарч байсан

Элсэлтийн ерөнхий шалгалтын хариу задарсан талаар мэдээлэл гараад байна. Энэ талаар өчигдөр Монголын сурагчдын холбооны тэргүүн О.Сэлэнгэ, “Шинэ зуун” сургуулийн математикийн багш Х.Сайнбилэг, Нийслэлийн 113 дугаар сургуулийн 12А ангийн сурагч Г.Мандах нарын хүмүүс мэдээлэл хийсэн.

Энэ талаар “Шинэ зуун” сургуулийн математикийн багш Х.Сайнбилэг “ЭЕШ-ын явцад тест тарсан, хариу задарсан зэрэг мэдээлэл өмнөх жилүүдэд ч гардаг байсан. Гэвч үүнийг би худал мэдээлэл, тест задрах ямар  ч боломжгүй гэдгийг хүүхдүүддээ байнга хэлдэг байсан юм. Гэтэл энэ жилийн математикийн шалгалтын дараа нэг шавь маань бид олон сар үнэнчээр бэлдээд орж байхад тестийн хариу аль хэдийн задарчихсан байна. Зарим хүүхдүүд шалгалтаа өгч гарч ирээд ийм амархан байсан юм уу гээд инээлдээд ярьж байна гээд уйлаад залгасан.  Тэгээд надад фэйсбүүк мессенжерээр бар код явуулсан юм. Энэ нь ямар учиртай юм бэ гээд Б хувилбарын даалгаврыг нь бодоод үзсэн чинь тухайн бар кодон дээр байгаа хариу нь яг таарч байсан. ЭЕШ-ын С хувилбарын бодолтыг нь хийгээд үзэхээр бар кодон дээрхи тооны нэг нь л зөрсөн. Бусад нь бүгд таарсан. А хувилбар нь хоёр л зөрсөн. Үнэлгээний төв бол маш их хичээж ажилласан. Шударга зохион байгуулах гэж маш их хөдөлмөрлөсөн гэдгийг үнэлж байна. Гэхдээ та нарын дунд ажиллаж байгаа нэг хүн шалгалтын хариуг задласан байгаа учраас та бүхэн үүнд хяналт тавиад Тагнуулын ерөнхий газартай хамтран энэ бар код хэрхэн гарч ирсэн бэ гэдгийг тогтоож тайлбар хийгээсэй гэж хүсмээр байна” хэмээв.

Харин эцэг эхчүүд болон сурагч ийнхүү ярьж байна.

 113 дугаар сургуулийн 12А ангийн сурагч Г.Мандах: Хариу нь яг таарч байсан

ЭЕШ эхлэхээс өмнөхөн надад манай зарим найзуудаас шалгалтын хариу задарсан талаар фэйсбүүкээр маш олон мэдээлэл ирсэн. Тухайн үед би итгээгүй. Тэгсэн харин сүүлдээ химийн шалгалтын хариу таараад, нөгөө хариуг нь худалдаж авсан хүүхдүүд яг таарч байсан. Одоо 800 авсан байхаа гэдэг зүйлийг хэлж байсан учраас өөрийн эрхгүй мөнгө хайж олоод тэр хариуг нь олж аваад би ч гэсэн 800 оноог авдаг байж гэж битүүхэндээ атаархаж л байсан. Үнэхээр ЭЕШ ийм худлаа болчихсон юм уу. Хэн нэгэн хүн үүнд тайлбар хийгээсэй гэж хүсэж байна.

 Д.Хишигдэлгэр /эцэг эх/: Бүх хичээлийн хариу задарсан

Манай охин энэ жил Их засаг их сургуулийн лицей сургуулийн 12 дугаар ангийг төгсөж байгаа. ЭЕШ-аа өгч гарч ирээд “Ээжээ та надад сургалтын төлбөр бэлдэж байсан дор бол 500 мянган төгрөгөөр тэр хариуг нь худалдаад авчихсан бол илүү амар байж дээ” гэж хэлсэн. Шалгалт эхлэхээс 10 минутын өмнө шалгалт өгөх танхимд байсан бүх хүүхдүүд гар утсаараа дамжуулан даалгаврын хариуг хүлээж авсан байсан гэсэн. 16-хан настай охин маань нүдэнд нь нулимс цийлэгнээд “ээжээ шударга юм гэж байдаг юм уу” гэж байсан. Энэ бүхнийг хараад би эх хүний хувьд ЭЕШ-ыг хууль бус явуулсан гэж үзэж байна. Өнөөдөр шалгалтыг худлаа авлаа. Маргааш дипломыг ч хууль бусаар авна. Шударга юм гэж байдаг юм уу. Монголд сурах шаардлага байна уу. Хими, математик гэлтгүй бүх хичээлийн хариу задарсан. Үүнийг би хариуцлагатай хэлнэ.