АСЕМ-ын дээд түвшний уулзалтын дагалдах хурлуудын нэг “Редакторуудын дугуй ширээний 8 дугаар уулзалт” Улаанбаатар хотноо, “Туушин Премьер” зочид буудалд хоёр дахь өдрөө үргэлжилж байна.

“Ази-Европын цахим харилцаа” сэдвийн дор, “Хэвлэл мэдээллийн үүрэг, ач холбогдол”, “Өнөөгийн хэвлэл мэдээллийн орчин”, “Орон нутгийн дуу хоолойгоор дэлхийн өгүүлэл гаргах” гэсэн гурван хэлэлцүүлгийн хүрээнд өрнөж буй энэхүү уулзалтад Ази-Европын 20 гаруй орны  нөлөө бүхий 30 орчим хэвлэл мэдээллийн байгууллагын төлөөлөгчид оролцож байна.

Редакторуудын дугуй ширээний 8 дугаар уулзалтыг нээж, Гадаад хэргийн сайд Л.Пүрэвсүрэн хэлсэн үгэндээ “20 жилийн өмнө  Ази Европын хэд хэдэн  орнуудын Засгийн газрууд санаачлан Тайландын Бангкок хотноо АСЕМ-ын үйл ажиллагааг эхлүүлснийг та бид мэднэ. Өнөөдөр АСЕМ эгнээндээ 53 орныг багтаагаад байгаа төдийгүй цаашид  хүрээгээ өргөжүүлэн тэлж, улам олон гишүүнийг эгнээндээ татахаар байгаа нь АСЕМ-ын ач холбогдол, эрч хүч саараагүй байгаагийн илэрхийлэл юм.

Орчин үед дэлхий ертөнц цахим сүлжээнд тулгуурласан харилцаа холбооноос улам бүр хамааралтай болж байна. Ийм ч учраас  та бүхний энэ удаад хэлэлцэхээр төлөвлөж буй “Цахим харилцаа”-ны тухай сэдэв  нь сайтар судалж, хэлэлцэх асуудлын нэг билээ” гээд энэ удаагийн дугуй ширээний уулзалт үр өгөөжтэй болж, улс үндэстэн, хүмүүс хоорондын уялдаа холбоог улам бүр бэхжүүлэх үйлсэд илүү алсыг харсан санаа бодлыг түгээн дэлгэрүүлж чадна гэдэгт найдаж буйгаа онцлов.

Үүний дараа дугуй ширээний уулзалтад оролцогсод өөрсдийн хамгийн их сонирхдог сэдвүүд болон технологи даган өөрчлөгдөж байгаа нийгэмд эзлэх байр суурь зэргийн талаар санал солилцсон бөгөөд хэлэлцүүлгийг даргалсан олон улсын зөвлөх Майк МкКласки Ази-Европын сангаас боловсруулсан “Цахим уялдаа холбооны судалгаа”-г танилцууллаа.

“Дугуй ширээний уулзалтын төгсгөлд оролцогчид маань хэвлэл мэдээллийн салбарыг хөгжүүлэх, цахим эриний талаарх ойлголтоо сайжруулах чиглэлээр цуврал зөвлөмж гаргах юм. Иймээс бид уулзалтаар яригдаж буй шинэ санаа сэдлийг орхигдуулахгүйн тулд чөлөөт хэлэлцүүлэг өрнүүлж байгаа” гэж зөвлөх Др. Майк МкКласки мэдэгдлээ.

Уулзалтыг зохион байгуулахад Монгол Улсын Засгийн газар, төрийн болон төрийн бус байгууллагууд, Ази Европын Сан, Германы Конрад Аденоур Стифтунг Хэвлэлийн газраас дэмжлэг үзүүлж байна. Энэ удаагийн уулзалт оролцогчдын тоо, цар хүрээгээрээ өмнөх хурлуудын түвшинд зохиогдож байгаа бөгөөд Ази-Европ хоёр тивийг ойртуулан, ялангуяа сэтгүүл зүйн чиглэлээр хамтын ажиллагааг бэхжүүлэх, хоёр тивийн сэтгүүлчдийн харилцаа холбоог нэмэгдүүлэх төдийгүй Монгол Улсын гадаад сурталчилгаанд үнэтэй хувь нэмэр оруулна  гэж зохион байгуулагчид дүгнэж байна.