УИХ-ын андугаар чуулган сонгуулийн үр дүнтэй холбоотой ширүүн маргаанаар эхэллээ. Намын төлөөллүүд өөрдийнхөө асуудлыг СЕХ-ноос  тодруулахыг хүсч байв. СЕХ-ны дарга Н.Лувсанжав үг хэлсний дараа МАН-ын УИХ дахь бүлгийн дарга Ө.Энхтүвшин асуулт асуулаа. Тэрбээр Өвөрхангайд МАН-аа нэр дэвшигчид гишүүний түр үнэмлэхээ авчихсан байхад яагаад тангарга өргүүлэхгүй байгааг асуув. Мөн Орхон аймаг, Хэнтий аймаг, Баянзүрх дүүрэг гэх зарим тойргуудын саналыг дахин тоолох хүсэлтийг яагаад хүлээж авахгүй байгаад хариу хүссэн юм. Үүнд Н.Лувсанжав “Өвөрхангай аймгийн нэр дэвшигчид хууль зөрчсөн гэдгийг Хан-Уул дүүргийн шүүхээс тогтоосон. Мөн саналыг дахин гараар тоолох хууль, эрх зүйн орчин байхгүй” гэв. Харин Ө.Энхтүвшин гишүүн “Өвөрхангайн тойргийн хороо түр үнэмлэхийг нь олгочихоод байхад Хан-Уул дүүргийн ганц шүүгч ийм шийдвэр гаргасанд гайхаж байна. Дээрх хэдэн тойргийн саналыг дахин тоолохыг олон нам хүссэн. Тэгээд ч улс орон даяа дахин тоолъё гээгүй” гэлээ.
    Мөн АН-ын дарга Н.Алтанхуяг “СЕХ 7-р сарын 4-нд хуралдаад хэрэг зөрчил үүүссэн гэж үзсэн Өвөрхангай, Увс, Орхон гэсэн гурван аймагт нэр дэвшигчийн нэрийг ерөнхийлөгчид өргөн барихгүй гэж шийдсэн. Гэтэл унтаад босоод ирэх хооронод энэ шийдвэрийг өөрчилсөн байна. Хууль зөрчсөн гэдэг нь баримттай гэж байсан Увсын нэр дэвшигчид яагаад ороод ирэв ээ?” гэв. Хариуд нь СЕХ-ны дарга “СЕХ ерөнхийлөгч нэр дэвшигчийн нэрийг танилцуулах нэг л шийдвэр гаргасан. Харин Увс аймгийн хувьд хуулийн байгууллага шалгаж байгаа ч түр үнэмлэхийг нь хүчингүй болгох үндэслэл байхгүй” гэлээ.