Эмэгтэй хүн бол хатан ухаан, хатан зориг, халамж хайр бүхнийг өөртөө шингээж чадсан байдаг. Хэдий дэлхийн улс гүрнүүдийн хөгжилд цохон тэмдэглэсэн эмэгтэйчүүд цөөн байдаг ч, тэдэн дунд эрэгтэй хүнээс илүү зориг, ухаан, тэвчээр, дайчин зан гаргаж ард түмэн, эх орныхоо төлөө тэмцсэн хатад олон бий. Мөн гоо үзэсгэлэн, ур чадвараараа үлгэр дуурайлал, үнэлэмжийг бий болгож байсан эмэгтэйчүүд ч байсан. Тэгвэл тэдний бодит түүхэн дээр сэдэвлэсэн шилмэл кинонуудыг 24tsag.mn сайт хүргэж байна.
    Мари Антойнетте нь Францын түүхэн дэх хамгийн урагшгүй хааны урагшгүй хатан гэдгээр алдаршсан. Гэсэн ч тэр өөрийн амьдралаа хэн хүнээс илүү тансаг өнгөрүүлсэн юм. 15-хан насандаа Францын XVI Луис хаантай гэрлэ, 19 насандаа хатан хаан болсон тэрбээр багаасаа эрх ямбатай, тансаг хангалуун өсч, мэдлэг боловсролоос илүү зугаа цэнгэл, наадам наргианыг тавьж иржээ. Шведийн залуухан цэрэгтэй нууцаар учир ургуулж, эд хөрөнгөндөө хайр найргүй үрэлгэн бөгөөд мунхаг загнаж байсанд нь Францын ард түмэн түүнд дургүйлхэж байлаа. Түүнийг хатан хаанаар суусан жилүүдэд Францад их өлсгөлөн гарч санхүүгийн байдал нь асар доройтон, 1789 онд бослого гарчээ. Marie Antoinette кино бол “Их өрийн хатан”-ы амьдралаас сэдэвлэсэн инээдмийн түүхэн кино юм. Гол дүрийг Кристен Данст амилуулсан ба, энэ кино Оскараас шилдэг хувцаслалттай киноны шагналыг авч байжээ. Хэдий урагшгүй хатны тухай өгүүлсэн ч үзэхэд илүүдэхгүй бөгөөд хөгжилтэй, түүхэн ач холбогдолтой кино юм.
    Бүх цаг үеийн хамгийн сайхан хүүхнүүдийн нэг Роми Шнайдерын тоглосон “Хатан хаан Сисси” кино. Энэ кино нь I Франц Жозефын эхнэр, Унгарын хатан хаан Элизабетын амьдралыг өгүүлжээ. Сисси хатан Унгарын улс төр, өнөөгийн хөгжилд том үүрэг гүйцэтгээгүй ч, ард түмний хайртай эмэгтэй, түүхэн хатан болж чадсан юм. Гурван ангит энэ киног үзээгүй хүн гэж бараг байхгүй байх. Монголын олон телевизүүдээр орчуулагдан цацагдсан энэ романтик, түүхэн кино нь “Сисси”, “Сисси-Залуу хатан”, “Сисси-Хатан хааны үнэнч жилүүд” гэсэн нэртэйгээр гарч байжээ. Харин англи хэлнээ “Сисси-Миний үүрдийн хайр” нэрээр гарчээ. Шүлсээ нулимж байгаад гутлаа тосолдог гэнэн цайлган хатан хааны тухай кино хүүхэд насны дурсамжийг сэргээх шиг л болдог.
    Чадварлаг жүжигчин Кейт Бланшеттын гол дүрд тоглосон Английн хүчирхэг Хатан хаан I Элизабетын амьдралын сүүлийн жилүүдийн тухай кино. Хатан хаан Элизабетыг “Онгон хатан” ч гэх нь бий. Учир нь тэр 40 жил хаан ширээг барихдаа хүнтэй гэрлээгүй бөгөөд өөрийгөө Англи улстай гэрлэсэн гэж хэлсэн байдаг. Түүний төр барих хугацаанд Англи улс маш хурдацтайгаар хөгжиж, тухайн үедээ хамгийн өндөр хөгжилтэй орон болсон байна. Түүнийг нас барсны дараа удалгүй тэмцэл гарч Англи улс сулран доройтоход хүрчээ. I Элизабет бол Англичуудын хайртай хатан, дэлхийн түүхэн дэх онцгой хүмүүсийн нэг яахын аргагүй мөн юм.
    Залуу Викториа бол Их Британийн хатан хаан Викториагийн анхны жилүүдийн тухай, мөн түүний хунтайж Алберттай хэрхэн гэрлэж, ахадсан хувь тавиландаа өөрийгөө бэлтгэсэн тухай кино юм. Энэ киноны нэг онцлог нь түүхийг нэг ч хувь гуйвуулахгүй байхаар хичэнэгүйлэн хийсэн оршино. Хатан хаан Викториа 1837 он буюу 18 настайгаасаа Их Британи болон Ирландын вант улсыг удирдан залж, 63 жил энэ албыг хашсан юм. Тэрээр өөрөө 9 хүүхэд төрүүлсэн ба, тэд болон тэдний хүүхдүүд боло 26 ач зээ нар нь тивийн Хааны удмынхантай гэрлэсэн аж. Тиймээс түүнийг “Европын эмэг эх” хэмээх нь ч бий. Түүний хатан хааны ширээнд суусан он жилүүдийг Викториагийн эрин хэмээн нэрийддэг. Энэ үед Их Британи улс газар нутаг, соёл иргэншил, улс төр, шижнлэх ухааны хувьд өргөжин тэлж, улам хүчирхэг болсон юм.
    Жүжигчин Мишел Виллиамс Мэрилин Монрогийн дүрийг амилуулжээ. Энэ кинонд нөхрийгөө явсны дараах The Prince and the Showgirl киноны зураг авалтын үеэр Лондонд өнгөрүүлсэн нэг долоо хоногийн бодит түүхийг өгүүлэх болно. Мэрилин болон залуухан кино найруулагч Колины богинохон болоод нууцхан хайр, зузаан уруулт шаргал үст, Холливудын хамгийн алдартай бүсгүйн нэр төр дэлхий дахинаа хэрхэн түгэж байсныг харуулах энэ кино шүүмжлэгчдийн зүгээс маш сайн үнэлгээг аваад байгаа юм.
    Дэлхийн хамгийн анхны эмэгтэй ерөнхий сайд Маргарет Тэтчерийн амьдралыг “Төмөр хатагтай” кино харуулжээ. Мэрил Стрипийн карьерынхаа туршид хамгийн чадварлаг бүтээсэн дүрээр Iron Lady тодроод байгаа юм. Маргарет Тетчерийн 40 жилийн амьдралыг дэлэгцнээ амилуулж чадсанаараа Мэрил Стрип Оскар болон Алтан Бөмбөрцөгийн наадмуудаас шилдэг эмэгтэй жүжигчний шагналыг авчээ.
    Тэр бол Атлантын далайг ганцаараа хөндлөн гулд нисэх онгоцоор туулсан анхны эмэгтэй. Тэрээр 1887 онд төрсөн бөгөөд 1932 оны 5 дугаар сарын 20-нд Парисын онгоцны буудлаас аялалаа эхлүүлжээ. Хүйтэн агаар, хүчтэй салхи шуургыг үл тоон “эрх чөлөөг эдлэхээр” дэлхийг нисэж тойрох шийдвэрийг гаргасан түүний эр зоригийг үнэлж олон гавъяа шагнал гардуулж байжээ. Эрсдлийг үл тоон, хүсэл мөрөөдлөө дагаж шийдэмгий алхам хийсэн энэ эмэгтэйн амьдралаар хийсэн киноны гол дүрийг жүжигчин Хилари Свэнк бүтээжээ.
    Soul Surfer бол усан цанын спортоор хичээллэгч тамирчин Бетани Хэмилтоны бодит түүхээс сэдэвлэсэн кино юм. Гэхдээ тэр жирийн нэг тамирчин биш. 13 настайдаа зүүн гараа аварга загасанд тасдуулсан ч, шантрана гэдгийг мэддэггүй шаргал үст охин зөвхөн нэг гараараа усан дээр тэнцвэрээ олж, тэр ч байтугай үүгээрээ том амжилтанд хүрч чадсан юм. Сэтгэлийн тэнхээ, шаргуу хөдөлмөрөөрөө гайхагдсан Бетанигийн тухай кино хийх санал анх 2003 онд яригдаж байсан ба түүнээс хойш 8 жилийн дараа бодит биеллээ олсон юм.
    Романтик адал явдалд дуртай, хийсвэр сэтгэлгээтэй, ялангуяа уран зохиолд сонирхолтой бүсгүйчүүдийн заавал үзэх кино бол Силвия. Жүжигчин Гвинет Пелтроу, Даниел Крейг нар 1950-аад оны нэрт яруу найрагчид болох Силвия Плэт, Тед Хьюс нарын ер бусын хайр дурлалыг дэлгэцнээ амилуулсан байна. Силвия бол 8-хан насандаа анхны шүлгээ сонинд хэвлүүлж өөрийн зохиолчийн авъяасыг нээж байжээ. Тэр бол шүлгийн түүврээрээ Пулитцерийн шагнал хүртсэн анхны яруу найрагч юм.
    Бурхнаас эх орноо хамгаалах мессеж авсан баатарлаг дайчин Жанна бол Английн эсрэг цэрэг удирдан тэмцсэн зоригт бүсгүй юм. Газар нутгаа хамгаалах нь түүний хувь заяа хэмээн итгэсэн залуу бүсгүй Францын хаан ширээг эргүүлэн авахад нь туслахын тулд шууд үсээ тайран, цэрэг хувцас өмсөн тулаанд бэлэн болжээ. Тэрээр удаа дараалан тулаанд ялалт байгуулж, түүхэнд нэрээ үлдээсэн байна. Жанна Д’Аркын дүрийг Америкийн нэрт загвар өмсөгч, жүжигчин Мила Жовович бүтээжээ.
    Дэлхийн түүхэн дэх хамгийн зальтай боловч мэргэн, үзэсгэлэнтэй хатдын нэг Клеопатрагийн амьдралаас сэдэвлэсэн кино юм. Гэхдээ энэ кино зөвхөн таамаг төдий түүх дээр тулгуурласнаараа бусдаас ялгаатай. Юлий Цезарь, Клеопатра хоёрын хайр дурлал Ром, Египетийн хувь заяаг хэрхэн эргүүлснийг энэ кино харуулна.
    Загварын ертөнцийн классик хатан хаан, хэв маягийг эвдэгч дизайнер Коко Шанелийн эрт амьдралын түүхээс сэдэвлэсэн кино. “Тренд бол цаг үеийнх. Стиль бол мөнхийх” хэмээн хэлсэн Коко нэрд гарахаасаа өмнө ямар замыг туулсан гэдгийг энэ киноноос үзээрэй.