Үндэсний их баяр наадмын нээлтийг найруулсан урлагийн гавьяат зүтгэлтэн, найруулагч Ч.Ганхуяг “Хязгааргүй” моно операа жүжгээ БНСУ-д толилуулахаар болсон ажээ. “Хязгааргүй” жүжгийн хувьд “Гэгээн муза 2010” наадмын олонхи төрөлд шилдгээр шалгарч Гранпри шагналыг хүртсэн билээ. Түүнчлэн энэ ондоо багтаан “Нохой сүрэг”, “Ромео, Жульетта” гэсэн хоёр жүжиг найруулан үзэгчдийн хүртээл болгох юм байна. Тэрээр “Ромео, Жульетта”-г зөвхөн монголчуудад зориулж бус, дэлхийн театрын хамгийн том фестиваль болох Францын Авинионы наадамд оролцох зорилготой тавихаар төлөвлөж байгаа ажээ. Сонирхуулахад, найруулагч Ч.Ганхуягийн найруулан тавих “Ромео, Жульетта” жүжиг АНУ, Орос, Францын утга найруулгаас тэс өөр байх гэнэ.