Пентагоны удирдлагууд шинэ төрлийн супер зэвсэг бүтээх мөрөөдлөө биелүүлэхэд тун дөхжээ. АНУ-ын “Лайвсаенс” хэмээх сэтгүүл аянга цахилгааныг эзэмшихийг оролдож байгаа Амеркийн цэргийн эрдэмтдийн шинэ төслийн  талаар мэдээлсэн байна. Судлаачдын ярьж буйгаар, тэд мэдэгдэхүйц амжилтанд хүрч чаджээ.  Шинэ төрлийн супер зэвсгийн лабортарийн туршилтыг Нью-Жерси муж дахь “Пикатинни” хэмээх судалгааны төвд явуулж байгаа ажээ.  “Лайвсаенс” сэтгүүлд бичсэнээр, Америкийн  эрдэмтэд аянгыг лазерын тусламжтайгаар бий болгосон бөгөөд лазер нь агаарт тусгай суваг үүсгэн, түүгээр цахилгаан цэнэг илгээдэг байна. Лазерийн туяагаар чиглүүлсэн аянга нь газарт байгаа байг онохдоо маш нарийвчлалтай тусах юм. Түүний тусламжтайгаар цэргийнхэн газарт булсан минаг эсвэл дайсны хуягт техникийг устгаж чадна гэж төслийн удирдагч Жорж Фишер ярьжээ. Шинэ үеийн зэвсгийг тун удахгүй байлдааны нөхцөлд ашиглах болно гэдэгт Пентагоны удирдлагууд итгэлтэй байна.