Зуны улиралд амжуулан зам засварын ажлыг эхлүүлдэг. Энэ дагуу газар газрыг хэсэгчлэн хааж, зам засварын ажлыг хийж байгаа билээ.  
    Зуны улиралд амжуулан зам засварын ажлыг эхлүүлдэг. Энэ дагуу газар газрыг хэсэгчлэн хааж, зам засварын ажлыг хийж байгаа билээ. Тиймээс засварын ажилтай холбогдуулан Нийтийн тээврийн зарим маршрутад өөрчлөлт орсон байна.   Тодруулбал, Сансарын туннелийн зүүн уулзварыг өчигдрөөс эхлэн, есдүгээр сарын 01-нийг хүртэл хааж, нүхэн гарцны ажил гүйцэтгэхээр болсон. Тиймээс зүүн 4 замаас хойш Сансарын ШТС хүртэлх замын хөдөлгөөнийг бүрэн хязгаарлаж байгаа юм. Есдүгээр сарын 1-нд автозамын зорчих хэсгийг нээж, тээврийн хэрэгслийн хөдөлгөөнийг хэвийн явуулах бөгөөд нүхэн гарцны дотоод засал, гаднах фасадны ажлыг аравдугаар сарын 31 хүртэл гүйцэтгэх юм байна. Нүхэн гарц нь 4 тал руугаа гарах гарцтай, 6.3 м өргөн коридортой, Сансарын туннелийн талын урт хэсэг нь 54.1 м, харин нүхэн гарцны зүүн талын буюу богино хэсэг нь 25.6 м өргөнтэй хийгдэх аж. Автозамын явах ангийн өргөн 23.7 метр байхаар болжээ. Уг нүхэн гарцад нэг тэрбум 321 сая төгрөгийн төсөв тооцоологдсон бөгөөд “Хотынзам” ХХК гүйцэтгэх юм байна.
    Мөн Сэлбийн хос гүүрийн засвар шинэчлэлтийн ажил эхэлсэнтэй холбогдуулан урд гүүрний хөдөлгөөнийг энэ сарын 16-ны өдрөөс эхлэн хязгаарлаад байгаа. Урд гүүрний шинэчлэлтийг есдүгээр сарын 7 хүртэл, есдүгээр сарын 7-ноос хойд гүүрний шинэчлэлтийг арваннэгдүгээр сарын 30 хүртэл хийхээр төлөвлөн ажиллаж байгаа аж. Гүүрийн барилгын ажлыг “МоторСервис” ХХК гүйцэтгэж байгаа юм байна.

    Тиймээс тус замаар явдаг М:2 буюу “Шархад – 7 буудал” чиглэлийн автобус Сансарын аюулгүйн тойргоор чигээр тойрч, Доржийн гудамжаар явж Шархадны эцэс орно. Буцахдаа мөн адил замаар явах аж.
    Харин  М:6а буюу “Өнөр хороолол – Халдвартын эмнэлэг” чиглэлтийн автобус МУИС-ийн уулзвараар Бага тойруу руу урагшаа эргэж, Энхтайваны өргөн чөлөөгөөр явж Халдвартын эмнэлэг хүрнэ.
- М:6б буюу “Өнөр хороолол-Баянбүрд-Халдвартын эмнэлэг” чиглэлийн автобус 11-р хорооллын хойд уулзвараар урагшаа эргээд Эрхүүгийн гудамж, Бээжингийн гудамж, Токиогийн гудамж, Энхтайваны өргөн чөлөөгөөр явж Халдвартын эмнэлэг хүрнэ. Буцах чиглэлдээ Энхтайваны өргөн чөлөөгөөр бөхийн өргөөний уулзвараар хойш эргэж Токиогийн гудамжаар нэвт хойшоо гарч ОХУ-ын Соёл, шинжлэх ухааны зүүн талаар явж Сансарын аюулгүйн тойргоор буцаж эргэн үндсэн чиглэлдээ орно.

- М:9 буюу “Зүүн салаа – Зурагт – Сансар”, М:10 буюу “Сансар хороолол – 3, 4-р хороолол” чиглэлүүдийн автобус Бээжингийн гудамжаар яваад “Чингис” зочид буудлын зүүн хойд уулзвараар Токиогийн гудамж руу эргэж Энхтайваны өргөн чөлөөгөөр буцаж явна.
- М:15 буюу “Баруун салаа-МУИС-БЗД-ийн 6-р хороо” чиглэлийн автобус МУИС-ийн уулзвараар бага тойруу руу урагш эргээд Энхтайваны өргөн чөлөөгөөр явж БЗД-ийн 6-р хороонд хүрнэ. Буцах чиглэлдээ Энхтайваны өргөн чөлөөгөөр яваад Бөхийн өргөөний уулзвараар хойш эргэж Токиогийн гудамжаар нэвт хойш гарч Сансарын аюулгүйн тойргоор буцаж эргэн үндсэн чиглэлдээ орно.
- М:20 буюу “СБД-ийн 20-р хороо – Дарь-Эх–Вокзал” чиглэлийн автобус Энхтайваны өргөн чөлөөгөөр яваад Бөхийн өргөөний уулзвараар хойш эргэж Токиогийн гудамжаар нэвт хойш гарч Сансарын аюулгүйн тойргоор буцаж эргэж үндсэн чиглэлдээ орно. Буцахдаа мөн адил замаар явна.
- М:38 буюу “Шархад–Сансар–Тунель -ТЭЦ” чиглэлийн автобус Шархад талаасаа Дандарбаатарын гудамжаар урагшаа эргээд Энхтайваны өргөн чөлөөгөөр явж үндсэн чиглэлдээ орно. Буцахдаа Энхтайваны өргөн чөлөөгөөр явж Токиогийн гудамжаар нэвт хойшоо гараад Доржийн гудамжаар явна.
- М:40 буюу “Хайлааст – Сансар – Амгалан” чиглэлийн автобус Зуун айл талаасаа явахдаа Сансарын ШТС-ын арын уулзвараар урагш эргэж Токиогийн гудамж, Энхтайваны өргөн чөлөөгөөр явж үндсэн чиглэлдээ орно.
- М:46 буюу “Чингис Соосэ- 3, 4-р хороолол - Их засаг ИС-Офицеруудын ордон” чиглэлийн автобус Сансарын аюулгүйн тойргоор дайран Б.Доржийн гудамж, Дандарбаатарын гудамжаар офицеруудын ордон хүрч БЗД-ийн Засаг даргын Тамгын газрын хойд уулзвараар буцаж эргэн уг замаар буцаж явна.
- М:42 “Улиастай- Сансар – ЗГАБааз” болон М:52 буюу “Тоосгоны үйлдвэр – Сансар – Жанжин клуб” чиглэлийн автобусууд хоёр талын чиглэлдээ их тойруугаар яваад Сансарын аюулгүй тойргоор эргэн дайран өнгөрч Б.Доржийн гудамжаар явж байгаад Цайзын уулзвараар урагшаа эргээд Дандарбаатарын гудамжаар явж үндсэн чиглэлдээ орно.
- М:56 буюу “Монелийн 38-Офицеруудын ордон-Сансар” чиглэлийн автобус үндсэн чиглэлийн дагуу Энхтайваны өргөн чөлөөгөөр явж байгаад Кино үйлдвэрийн уулзвараар буцаж эргэн уг замаар буцаж явна.

    Сүхбаатарын гудамжинд Засгийн газрын ордны баруун урд уулзвар буюу Жуулчны гудамжнаас хойш Байгалийн түүхийн музейн уулзварын урд уулзвар хүртэлх 200 м авто замын шинэчлэлтийн ажлыг хийж гүйцэтгэхээр энэ сарын 17-ны 00:00 цагаас 24-ний 00:00 цаг хүртэл уг замын хөдөлгөөнийг хязгаарлахаар төлөвлөсөн. Цаг агаарын байдлаас шалтгаалан хөдөлгөөн хаахыг түр хойшлоод байгаа бөгөөд замын хашлага суурилуулах ажил явагдаж байна. Тус ажлын хүрээнд борооны ус зайлуулах байгууламж, холбоо, цахилгааны шугам сүлжээ, авто замын өргөтгөл шинэчлэлтийн ажлууд хийгдэх юм. Гүйцэтгэгч нь “Наранбулаг-Хан” ХХК аж.
Үндсэн хуулийн гудамж буюу Тээврийн товчооноос Баруун 4 замын уулзвар хүртэлх 0.3 км авто замын өргөтгөл, шинэчлэлтийн ажил эхэлсэнтэй холбогдуулан тус замын зүүн талын урсгалыг хэсэгчлэн түр хаасан. Тус замыг энэ сарын 18-ны 22.00 цагаас эхлэн 14 хоногийн хугацаатайгаар хөдөлгөөнийг хязгаарлаж, инженерийн шугам сүлжээний ажлуудыг /цэвэрус, цахилгаан, холбоонышугам/ хийнэ. Гүйцэтгэгч "Тосгол" ХХК юм байна.