Америкийн үр тарианы гол бүс нутгууд гантай байгаа учраас ургац хураалт буурч, үр тарианы үнэ нэмэгдэх болсныг фермерүүд хэлж байна.

Дэлхийн улаан буудайн үр, эрдэнэ шишийн хамгийн том эх үүсвэрт тооцогддог АНУ-ын үр тарианы гол бүс нутагт дахин нэг сарын турш бороо хур багатай, халуун үргэлжилсээр байх болно гэж цаг уурчид мэдээлж байна. Ерөнхийлөгч Барак Обама ХАА-н яамны сайд Том Вилсэктэй уулзаж, нөхцөл байдлыг хэлэлцжээ. Мөн Дэлхийн банкныхан АНУ-д ургац хураалт буурсан нь дэлхийн хүнсний нийлүүлэлтэд хэрхэн нөлөөлөх талаар судалгаа хийж байна. Өнгөрсөн зургадугаар сараас хойш хэт халуун үргэлжилж, одоогийн байдлаар АНУ-ын газар нутгийн 60 гаруй хувьд нь ган гачиг нүүрлээд байгаа юм. Дийлэнх нутагт агаарын хэм 38 цельсээс дээш, бороо хур багатай байгаа ажээ.