Шинэ Засгийн газрын бялуунаас хүртэж чадахгүй хүндхэн байдалд ороод байгаа МАН-ынхан маргааш Бага хурлаа хийн даргаа томилох гэж байна. Энэ зуур маш олон сонирхолтой үйл явдлууд өрнөж байна. Тухайлбал МАН-ын даргад нэр  дэвшиж, хамгийн их сонгогдох магадлалтай хүн гэгдэж байгаа МАН-ын УИХ дахь бүлгийн дарга Ө.Энхтүвшин МАХН-ын дарга Н.Энхбаяртай ойр ойрхон уулзах болсон тухай зарим эх сурвалж ам нээж эхэллээ. Энэ нь МАН, МАХН салаагүй бол ялах байсан гэж өнгөрсөн рүүгээ өнгийх болсонтой нь холбоотой гэнэ. Учир нь хэрэв хоёр тусдаа улс төрийн хүчин болоогүй байсан бол МАН 25, МАХН 11, дээр нь намаасаа салсан бие даагч хоёр гишүүн /Ц.Даваасүрэн, Х.Болорчулуун/ гээд 38 суудал авах байжээ. Намын залуучууд ч сонгуульд ялагдсан дарга нараа өөрчлөхийг шаардаж зүгээр суулгахгүй чичилж байна. Тиймээс намын дарга, генсекээ сольж байгаа дээрээ МАХН-ын хувьд арай өөр бодлого барихаар зэхэж эхэлсэн гэх яриа МАН-ын Бага хурлын гишүүдийн дунд тархаж эхэлжээ.

   Энэ өөрчлөлтийн гол хүн нь Ө.Энхтүвшин гишүүн байх талаар ч яригдаж байна. Тэрбээр МАН-ынхан эргээд МАХН-тай нэгдэх асуудлыг гардан хийх хүнээр тодроод байгаа аж. Учир нь тэрбээр МАН-ын фракциудаас гадна МАХН-ынханд ч нүүр улайхааргүй харилцаатай хүн юм. Эргэн санавал Н.Энхбаярыг 5-р сарын 12-ны орой АТГ-ынхан сүр дуулиантайгаар оймстой нь өргөөд явсны дараа Ө.Энхтүвшин түүнийг өмөөрөх ёстой гэсэн байр суурьтай байсан юм. Н.Энхбаярыг баривчилсны маргааш тэрбээр УИХ дахь бүлгийн даргын хувьд гишүүдээ цуглуулж хуралдуулсан. Харин Н.Энхбаярын асуудлыг авч хэлэлцэхэд нь намын нарийн бичгийн дарга байсан У.Хүрэлсүх ихэд дургүйцэж, муудалцсан. У.Хүрэлсүх МАХН-ын даргыг яасан ч өмөөрөхгүй гэсэн бол Ө.Энхтүвшин өмнөөс нь хүн чанар ярьж “Би бүлгийн даргын хувьд ажлаа мэдье” гэж тас гүрийж хурлаа хийсэн юм. Харин Н.Энхбаярыг өмөөрөх тухайд ерөнхий сайд С.Батболд дэмжсэн тухай яриа байдаг.

  Ер нь Ө.Энхтүвшин бол Н.Энхбаяртай ч, С.Батболд, У.Хүрэлсүх нартай ч, М.Энхболд, Н.Энхболд нартай ч сайн харилцаатай улс төрч. Нэг ёсондоо хагаралд хүрээд байгаа МАН-ыг нэгтгэж чадах ганц хүн болоод байгаа аж. Түүний энэ “алтан дундаж” чанар нь  МАН-ын дараагийн даргаар томилогдох шансыг нь нэмэгдүүлж байгаа хэрэг гэж үзэх хүн намын дотор олон байна. 1996 онд МАН мөн ийм ялагдал хүлээж байв. Харин 1997 онд Н.Энхбаяр намын даргаар сонгогдож, 2000 оны сонгуулиар 72 суудал аван үнэмлэхүй ялалт байгуулж байсан юм. Ялагдлын дараа намаа сэргээх удирдагч МАН-д яг одоо л хэрэгтэй байна.

   Одоогоор Ө.Энхтүвшин, Н.Энхбаяр нар юуны тухай ярилцаж, ямар тохироо хийж байгаа мэдээлэл ил болоогүй байна. Гэхдээ МАН-ынхан бага хурлаараа МАХН-тай эргэн нэгдэх эс бөгөөс тэдэнтэй аядуу зөөлөн байдлаар харлцах талаар бодитойгоор ярилцах аж. Үүнийг нам дотроо “бөөлжсөн бөөлжсөө эргэж долоодоггүй” гэж эсэргүүцэн зөрөх хүн олон байгаа ч намын ирээдүйг бодоод нааштайгаар хандах нь ч бас цөөнгүй байгаа аж.   Ямартаа ч МАН-ынхан маргааш Бага хурлаа хийнэ, шинэ даргаа сонгоно, бас Н.Энхбаярын талаар ярих нь.