МАХН-ын дарга Н.Энхбаяр намын жагсаалтаар УИХ-ын гишүүн болох боломжтой гэж Үндсэн хуулийн цэцэд хандаад байсан. Тэдний гаргасан гомдлыг өнгөрсөн баасан гаригт Бага суудлын хуралдаанаар дахин хэлэлцэж, Т.Лхагва шүүгчийн гаргасан шийдвэрийг үндэслэлтэй хэмээн үзжээ. Ингэснээр Н.Энхбаяр нар хуулийн дагуу дахин өргөдөл гомдол гаргах эрх нь дуусч байгаа аж.

   МАХН-ын дарга Н.Энхбаяр намын жагсаалтаар УИХ-ын гишүүн болох боломжтой гэж Үндсэн хуулийн цэцэд хандаад байсан. Түүнийг хэрэгт шалгагдаж байгаа тул сонгуульд нэр дэвших боломжгүй гэж СЕХ-ноос мэдэгдэж, эрхийг нь түдгэлзүүлсэн. Н.Энхбаяртай хамт академич С.Нарангэрэл, С.Авирмэд, Э.Батшугар, хөдөлмөрийн баатар З.Ойдов, Санжаадорж нарыг мөн нэр дэвшүүлээгүй. Харин Н.Энхбаяр тэд СЕХ-г улс төрийн захиалгаар ийм шийдвэр гаргалаа гэж  Үндсэн хуулийн Цэцэд гомдол гаргасан билээ. Н.Энхбаяр ийнхүү тахимаа өгөхгүй байсан тул намын жагсаалтаар орж ирэх О.Баасанхүү, Ц.Цолмон, Ц.Оюунбаатар нар ч гишүүний тангаргаа өргөхгүй өнөөг хүргэсэн.

  Тэгвэл Н.Энхбаярын дахин УИХ-ын гишүүн болох гэсэн  гомдлыг энэ сарын 9-нд Үндсэн хуулийн цэц Бага суудлын хуралдаанаар хэлэлцэж, хуралдааны шүүгч Т.Лхагва “МАХН-ын дарга Н.Энхбаярыг УИХ-ын сонгуулийн тухай хуулийн 27 дугаар зүйлийн 27.5.2, 29 дүгээр зүйлийн 29.11.4 дэх хэсэг, Сонгуулийн төв байгууллагын тухай хуулийн 12 дугаар зүйлийн 12.3 дахь хэсгийг, С.Нарангэрэл, С.Авирмэд нарыг УИХ-ын сонгуулийн тухай хуулийн 26 дугаар зүйлийн 26.6., 26.7 дугаар зүйлийг, Н.Санжаадоржийг УИХ-ын сонгуулийн тухай хуулийн 26 дугаар зүйлийн 26.6 дугаар зүйлийг, Э.Батшугарыг УИХ-ын сонгуулийн тухай хуулийн 26.4-г зөрчсөн”  гэсэн гомдол нь Үндсэн хуулийн зарим зүйл заалтыг зөрчөөгүй. Тиймээс маргаан үүсэх үндэслэлгүй хэмээн үзсэн. Харин түүний гаргасан уг шийдвэрийг Н.Энхбаяр нар эсэргүүцэж, дахин гомдол гаргаад байсан билээ.

  Тиймээс тэдний гаргасан гомдлыг өнгөрсөн баасан гаригт Бага суудлын хуралдаанаар дахин хэлэлцэж, Т.Лхагва шүүгчийн гаргасан шийдвэрийг үндэслэлтэй хэмээн үзжээ. Ингэснээр Н.Энхбаяр нар хуулийн дагуу дахин өргөдөл гомдол гаргах эрх нь дуусч байгаа аж. Нэгэнт Үндсэн хуулийн цэцийн шийдвэр гарсан учраас Н.Энхбаяр нар ийнхүү УИХ-ын гишүүн болохгүй хэвээр үлдлээ. Харин намын жагсаалтаар УИХ-д сонгогдоод байсан О.Баасанхүү, Ц.Цолмон, Ц.Оюунбаатар нар удахгүй тангарагаа өргөх болж байна.