Монгол Туркийн хамтарсан “Эмпати” сургуулийн /өдгөө эзэмшигч Герман болж өөрчлөгдсөн/ багш Акчайг гэрээс нь хулгайлсан гэх шуугиан өнгөрсөн долдугаар сард дэгдсэн билээ. Түүнийг Монголын хууль, хүчний байгууллага хамтран Турк улсад хүлээлгэж өгөх гэж байна гэсэн хардлага тухайн үед үүссэн ч нэр бүхий улстөрчид “Акчайг Туркт хүлээлгэж өгөх гээгүй, гэрээс нь хулгайлсан гэдэг мэдээлэл худлаа” хэмээн шуугианыг нам дарсан. Акчайг аваачих гэж ирсэн хэмээн хардагдсан Туркийн иргэний агаарын тээврийн онгоцыг “Монголд шатахуунаа цэнэглэх гэж түр бууснаас өөр зүйлгүй” хэмээн Зам тээврийн дэд сайд асан Б.Цогтгэрэл Твиттер хуудсандаа жиргэсэн.   

Тэгвэл манай хууль хүчнийхэн ч, улстөрчид ч огт худал хэлж, гал намжаах арга хэрэглэж байсан нь тодорхой боллоо. Манайхан Акчайг Туркт хүлээлгэж өгөх гэж байсан нь үнэн юм байна. Туркийн эрх баригчдаас Монгол Улсад ирүүлсэн мэдэгдэл, Монгол Улсаас Турк улсад суух Элчин сайд Равдангийн Болдын Туркийн эрх баригчдад хандсан хариу мэдэгдлийн агуулга үүнийг баталж байгаа юм. Хэрвээ Монгол Улс В.Акчайг Туркт штилжүүлэн өгөх гээгүй байсан бол Анкара хатуу мэдэгдэл гаргахгүй байсан.  

Энэ талаар мэдээлсэн “Дэйли сабах” сонины нийтлэл “Монгол Улс Гюлений террорист бүлэглэлийн гишүүнийг Туркт шилжүүлэн өгөөгүйгээс болж Турк-Монголын харилцаа хүйтрээд байгаа билээ. Шилжүүлэн өгөх ажиллагаа бүтэлгүйтсэний дараа Туркийн эрх баригчид Монгол Улсад хандан “Гюлений террорист бүлэглэлийг чөлөөтэй ажиллах боломжоор хангасаар байвал хоёр улсын харилцаанд асуудал үүснэ” гэсэн утгатай мэдэгдэл ирүүлжээ. Элчин сайд Р.Болд үүний хариу болгон явуулсан албан бичигтээ Турк улс террористуудын үйл ажиллагаа эрчимжиж байгаад санаа зовниж буйг Монгол Улс ойлгож байна. Туркийн тэрс үзэлтнүүдийн эзэмшиж байсан бүх сургуулийг Боловсрол соёл, шинжлэх ухаан, спортын яаманд шилжүүлсэн бөгөөд Гюлений террорист бүлэглэлийн гишүүнийг Монгол Улсад амьдрах визээ дахин сунгуулах боломжгүй болгосон /Туркээс нэрсийн жагсаалтыг манай улсад өгсөн байх магадлалтай/, тиймээс энэ ондоо багтаад манай улсаас гарах болно гэжээ. Мөн Монгол дахь Гюленистуудын төв гэгдсэн, 1994 оноос үйл ажиллагаа явуулж буй “Эмпати” сургуулийн үйл ажиллагаа явуулах тусгай зөвшөөрлүүдийг олгохгүй байгаагаа тайлагнасан байна. Эмпати сургуулиудад нэг  үе 3000 гаруй хүүхэд суралцдаг байсан бол одоо1300 орчим болж, өдрөөс өдөрт сурагчдаа алдаж байгаа гэжээ. “Эцэг эхчүүд үүсээд байгаа нөхцөл байдлыг сайтар ойлгож, хүүхдүүдээ өөр сургуульд шилжүүлж байгаа” гэсэн өгүүлбэрийг ч хэлсэн байна.  

Р.Болд мөн Монгол нэг хэсэг дэлгэрсэн Мүүний шашны талаар ярилцлагадаа дурдаж, Гюлений үзэл санаа, Гюлений бүлэг, Мүүний шашин хоёр нэг зоосны хоёр тал гэжээ. Ерөнхийдөө Монгол Улс Туркийн эрх баригчдын талд ажиллах учраас хамтын ажиллагаагаа хөгжүүлэх хүсэлтэй байна гэсэн санааг илэрхийлж.

Үүнээс үзвэл, эх орондоо Гюлений бүлэглэлийн гишүүд гэж Эрдоганы хардаад байгаа жирийн турк багш нарыг Туркийн хуулийн байгууллагад хүлээлгэж өгөхөөр манай улс ажиллаж байгаа юм байна.