НИТХ-ын ээлжит бус IX хурал өчигдөр болж автозам ашигласны татварыг нэмэгдүүлэх асуудлыг цуцалж, нийслэлийн ирэх оны төсвийг шинэчлэн баталлаа. Ингээд төсөвтэй холбоотой зарим асуудлаар Нийслэлийн өмчийн ашиглалт, удирдлагын газрын дарга Ш.Үнэнбатаас дараахь тодруулгыг авлаа.
-Ирэх оны төсөвт өмч хувьчлалд хэчнээн төгрөг төсөвлөсөн бэ?
-2020 оны нийслэлийн төсөвт өмч хувьчлалын орлогоос 68.3 тэрбум төгрөг төвлөрүүлэхээр заасан. Үүнийг бүрдүүлэхийн тулд долоон ширхэг барилга байгууламж, нийслэлийн мэдлийн нэг компанийн 49 хувийг хувьчилж, дуудлага худалдаагаар зарахаар төлөвлөсөн. Өчигдөр хийсэн төсвийн өөрчлөлтөөр Нийслэлийн өмч худалдах удирдлагын газрын нийслэлд төвлөрүүлэх орлого долоон тэрбум төгрөгөөр нэмэгдэж байна. Ингээд нийт 75.3 тэрбум төгрөгийг нийслэлийн өмчид бүрдүүлэхээр ажиллах нь. Тиймээс дээрх долоон барилга байшин нийслэлийн өмчийн 49 хувьтай нэг компанийн үнэлгээний асуудлыг чанартай хийх шаардлагатай байна.
-Автозам ашигласны татварыг нэмэгдүүлсэн шийдвэрийг цуцалсан. Үүнтэй холбогдуулан нийслэлд төвлөрүүлэх орлогыг нэмэгдүүлж байгаа гэсэн үг үү?
-Өмч хувьчлалын ирэх оны төсөв дээр 68.3 тэрбум төгрөгийг төвлөрүүлэх байсан бол нийслэлийн ирэх оны төсөвт өчигдөр хийсэн өөрчлөлтөөр автозамын төлбөр хураамжийг хасч, орлогоо нэмэгдүүлэх асуудалд өмч хувьчлалын орлого дээр долоон тэрбум төгрөг нэмж олгохоор батлагдсан.
-Долоон тэрбум төгрөгийг нэмж олгоно гэлээ. Яаж олгох юм бэ?
-Сая батлагдсан төсөвт нийслэлийн өмчийн таван барилга байгууламж, нийслэлийн мэдлийн 49 хувийг эзэмшдэг нэг компанийг дуудлага худалдаагаар долоон тэрбум төгрөг бүрдүүлэх юм.
-Үнэлгээг хийхдээ чанартай хийх шаардлагатай байгаа гэлээ. Үнэлгээг хэрхэн хийдэг юм бэ. Үүнд өөрчлөлт орно гэсэн үг үү?
-Өмч хувьчлалын жагсаалт батлагдсаны дараа нийслэлийн өмч хувьчлах комисс үнэлгээний компанийг шалгаруулдаг. Өөрөөр хэлбэл, дуудлага худалдаанд орох барилга байшингаа үнэлэх юм. Хамгийн гол нь үнэлгээний компаниудаа нээлттэй зарлана. Ингээд тэдгээрийн зах зээлийн ханшаар үнэлсэн үнэлгээгээр Нийслэлийн өмч хувьчлалын комисс шийдвэр гаргаж, дуудлага худалдаа зохион байгуулдаг. Дуудлага худалдаа явуулахад бүх нийтийн өрсөлдөх боломжтойгоор зарлах бөгөөд хамгийн өндөр үнэ санал болгосон иргэн, аж ахуйн нэгжид хуулийн дагуу шилжүүлнэ. Яг л энэ зарчмын дагуу явагдана.
-Энэ оны өмч хувьчлалын жагсаалтад орсон зарагдаагүй хэчнээн барилга байгууламж үлдсэн бэ?
-Энэ оны өмч хувьчлалын жагсаалтад орсон ч зарагдаагүй үлдсэн барилга байшинг ирэх оны өмч хувьчлалд орох барилга байгууламж дээр нэмж дуудлага худалдаанд оруулах ёстой. Ингээд нийт 75 тэрбум төгрөг бүрдэнэ гэж тооцоолж байгаа.
Б.Лхам
